16 шілде күні Израиль қорғаныс армиясы (ЦАХАЛ) Сирия астанасы Дамаскінің орталығында орналасқан Қорғаныс министрлігінің штаб-пәтеріне әуе шабуылын жасады, деп хабарлайды "Адырна" ұлттық порталы.
Бұл туралы Израиль әскери күштері Telegram парақшасында хабарлады.
“Біраз уақыт бұрын Израиль армиясы Дамаск ауданында Сирия режимінің әскери штаб-пәтерінің кіреберісіне соққы жасады”, – делінген ресми мәлімдемеде.
Сирия денсаулық сақтау министрлігінің ақпаратына сәйкес, шабуыл салдарынан 1 адам қаза тауып, 18 адам жарақат алған.
Бұл оқиға Таяу Шығыстағы жағдай ушығып тұрған тұста болды. Бұған дейін Израиль шекара маңына қосымша әскер жіберетінін мәлімдеген еді. Ал Сирия үкіметі Эс-Сувейда провинциясына қарулы қақтығыстар болып жатқан аймаққа әскери бөлімшелер жөнелткен. Онда друздар мен бедуин тайпалары арасында қақтығыстар жалғасып жатыр.
