Ақтөбеде 14 наурыз – Көрісу күніне орай қарттар үйінде ерекше мерекелік концерт ұйымдастырылды. Ізгі шара барысында Ахмет Жұбанов атындағы музыкалық колледждің өнерлі жастары аға буын өкілдеріне ән мен жырдан шашу шашып, мерекелік көңіл күй сыйлады.
Мерекелік кеште жас әншілер халық әндерін орындап, күмбірлеген күй тартылып, әсерлі өлеңдер оқылды. Жастардың өнерін тамашалаған қарттар ризашылықтарын білдіріп, ақ баталарын берді.
Шараның басты мақсаты – ұрпақтар сабақтастығын нығайтып, үлкендерге құрмет көрсету. Өнерпаз жастар қарттарға гүл шоқтарын табыстап, жылы лебіздерін жеткізді.
Көрісу күні – қазақ халқының ежелден келе жатқан ізгі дәстүрлерінің бірі. Бұл күні адамдар бір-бірімен қауышып, амандық сұрасып, үлкендерге құрмет көрсетеді.
Ақтөбедегі мерекелік концерт те осы дәстүрдің жалғасы іспетті болды. Жастардың ықыласына бөленген қарттар мерекелік кештен ерекше әсер алып, ұйымдастырушыларға алғыстарын білдірді.
Өнерпаздар алдағы уақытта да осындай тағылымды шараларды жалғастыруға ниетті екендерін жеткізді.
