Фото: REUTERS
Иран билігі елдегі ұзаққа созылған құрғақшылыққа байланысты жасанды жолмен жаңбыр шақыру мақсатында бұлттарды өңдеу процесін іске қосты. Бұл туралы Irna мемлекеттік агенттігі жазды, деп хабарлайды "Адырна".
Бұлттарды егу – күміс немесе калий йодиді сияқты арнайы реагенттерді ұшақтардан немесе жер үсті құрылғыларынан бұлтқа шашу әдісі. Мұндай реагенттер су буларының тезірек конденсациялануына әсер етіп, жаңбырдың түсуін жылдамдатады.
Сенбі күні бұл процесс тұзды Урмия көлі үстінде жүзеге асырылды. Урмия – Ирандағы Каспийден кейінгі ең ірі көл, алайда соңғы жылдары болған ұзақ құрғақшылық салдарынан оның үлкен бөлігі кеуіп, айдын орны тұзды далаға айналған.
Алдағы уақытта бұлттарды егу жұмысы Шығыс және Батыс Әзербайжан провинцияларында (Иран құрамындағы облыстар) жалғасады.
Иран метеорология ұйымының мәліметінше, биыл елде жауын-шашын көлемі көпжылдық орташа көрсеткіштен 89% төмен болған.
9 миллионнан астам халқы бар астана Тегеранда да жағдай қиын. Қаладағы су қоймаларының деңгейі өз көлемінің 10%-дан да төмен түскен. Билік су беруді шектеу мүмкіндігін жоққа шығармайды, ал президент Масуд Пезешкиан тіпті кей аймақтарда халықты эвакуациялау қажеттілігі туындауы мүмкін екенін айтқан.
Бұлттарды егу тәсілі бірнеше ондаған жылдар бойы қолданылып келеді. Соңғы жылдары су тапшылығымен күресу мақсатында бұл әдісті Біріккен Араб Әмірліктері белсенді пайдаланған.
Кей елдерде, мысалы Ресейде, бұл әдіс мерекелер кезінде жаңбыр жаумауы үшін қолданылған.
1986 жылғы Чернобыль АЭС апатынан кейін Кеңес Одағы да бұлттарды егуді қолданған. Танымал нұсқалардың біріне сәйкес, радиоактивті бөлшектерді сіңірген бұлттар Мәскеу мен басқа да халық тығыз орналасқан аймақтарға жаңбыр әкелмеуі үшін жасанды түрде жауын Беларусьтің оңтүстік өңірлеріне түсірілген.
