Армения премьер-министрі Никол Пашинян Армения мен Әзербайжан ара-қатынасы туралы айтты, деп хабарлайды "Адырна" ұлттық порталы.
Report агенттігіне сәйкес, премьер бұл туралы Ереванда өткен «Орбели: бейбітшілікті және көпжақты ынтымақтастықты қалыптастыру» атты халықаралық форумда айтты.
"Екі ел арасында бейбітшілік орнады. Бірақ негізгі қиындық дипломатиялық деңгейде емес, жаңа шындықты қабылдауда болып отыр. Мен бейбітшілік туралы айтқанда, бұл көпшілікке жат немесе түсініксіз көрінеді. Бейбітшілік — Армения мен Әзербайжан үшін жаңа ұғым мен жаңа орта", — деді Пашинян.
Сонымен қатар, ол Қарабаққа армяндардың қайта оралу мәселесін қауіпті деп атады. Оның айтуынша, мұндай бастама қақтығыстың бастапқы жағдайына қайта әкелуі мүмкін.
"Қарабаққа оралу тақырыбы қауіпті, өйткені бұл қақтығыстың алғашқы параметрлеріне қайта оралу дегенді білдіреді", — деп атап өтті Армения премьері.
Пашинян сөз соңында елде тұрақтылық пен бейбіт қатар өмір сүру саясатын жалғастырудың маңызын атап өтті.
