Автобус апатында екі аяғынан айырылған Алуа Бекен протезбен алғашқы қадамдарын жасап жатыр, деп хабарлайды «Адырна» тілшісі.
Қайғылы оқиғадан кейін 8 жастағы қызға бірнеше күрделі ота жасалды. Қазір ол оңалту курсын өтіп, қайтадан жүруді үйреніп келеді. Алуаның алғашқы қадамдары түсірілген видео Instagram-дағы арнайы қайырымдылық парақшасында жарияланды.
Желі қолданушылары кішкентай қыздың ерік-жігеріне тәнті болып, жылы пікірлер қалдыруда.
«Дәрігерлер мен ата-анасына мың алғыс! Бұл – үлкен жеңіс!» – деп жазды олар.
Еске салайық, 2 маусымда Астанада автобус бағанға соғылып, Алуа Бекен зардап шеккен болатын. Дәрігерлер оның екі аяғын ампутациялауға мәжбүр болды.
