Қазақстанның Энергетика министрлігі Новоресей портында болған оқиғаға байланысты жағдайды бақылауда ұстап отырғанын мәлімдеді. Бұған дейін «Шесхарис» терминалына дрондар шабуыл жасағаны хабарланған еді, деп жазады «Адырна».
Ведомствоның мәліметінше, қазіргі таңда қазақстандық мұнай экспортына ешқандай әсер тіркелмеген.
«Бүгінде магистральдық мұнай құбырлары жүйесі арқылы қазақстандық шикізатты қабылдау және тасымалдау штаттық режимде жүзеге асырылуда. Экспорттық жоспарлар кестеге сай орындалып жатыр», – деді Энергетика министрінің кеңесшісі, ресми өкіл Әсел Серікбаева.
Ресейлік БАҚ дерегінше, 5 сәуір күні ұшқышсыз ұшу аппараттары Ресейдің Краснодар өлкесіне бірқатар шабуыл жасаған. Ең көп зардап шеккен қала – Новоресей. Онда сегіз адам жараланған.
Шабуылдың негізгі нысаны – «Шесхарис» мұнай терминалы. Бұл нысан Ресейдің оңтүстігіндегі мұнай мен мұнай өнімдерін қайта тиеуге арналған ең ірі кешендердің бірі саналады және Новороссийск теңіз порты үшін стратегиялық маңызға ие.
Аталған терминал арқылы қазақстандық мұнай транзиті жүзеге асырылады. Алайда экспорттың негізгі бөлігі Новороссийскіде орналасқан Каспий құбыр консорциумының теңіз терминалы арқылы жөнелтіледі.
