Қостанай қаласындағы М.Көбеев атындағы жалпы білім беретін мектептің оқушысы Жанель Тансықпаева наурыздағы Ұлттық бірыңғай тестілеуде жалпы 140 балдан 139 балл жинады. Бұл туралы Оқу-ағарту министрлігі мәлімдеді, деп хабарлайды "Адырна".
"Жанельдің жоғары жетістігі кездейсоқтық емес, басқа түлектерге үлгі бола алатын саналы көзқарастың жемісі, жүйелі дайындықтың нәтижесі. Шәкірттің табысының басты факторларының бірі халықаралық IELTS емтиханына сапалы дайындық болды", – деп жазды министрліктің баспасөз қызметі.
7.0 балл алған сертификат оған бейіндік пән бойынша ең жоғары балды автоматты түрде растауға мүмкіндік берді. Бұл тіл құзыреттіліктерін жалпы оқу бағдарламасына кіріктірудің маңыздылығын тағы бір рет дәлелдейді.
Кез келген салаға жол ашатын ең жоғары нәтижеге қарамастан, Жанель педагогика мамандығына түсуді шешіпті.
"Менің мақсатым жай ғана білім беру емес, балаларды шабыттандыру. Мені бір кезде алғашқы мұғалімім Торғын Ибрагимова шабыттандырған еді", – деп атап өтеді түлек.
Жанельдің таңдауы дарынды жастар арасында педагог мамандығы беделінің артып келе жатқанын көрсетеді. Қазір түлек мемлекеттік грантқа конкурста өз нәтижесін растау үшін ҰБТ-ның негізгі кезеңіне дайындалып жатыр.
