"قارا باتىر" لاقاپ اتىمەن تانىلعان چەمپيون: اۋىل بالالارىن سپورتقا تاربيەلەگىم كەلەدى

4503
Adyrna.kz Telegram

«قارا باتىر» لاقاپ اتىمەن كوك تۋىمىزدى جەلبىرەتىپ، قازاقتىڭ اتىن ايقارا اسىرىپ جۇرگەن سپورتشىلارىمىزدىڭ ءبىرى – مەيرامبەك ايعاليەۆ.

قۇلسارى قالاسىنىڭ تۋماسى مەيرامبەك دجيۋ-دجيتسۋدان الەم چەمپيوناتىنىڭ بىرنەشە دۇركىن جۇلدەگەرى. «ادىرنا» ۇلتتىق پورتالىنىڭ ءتىلشىسى سپورتشىمەن تىلدەسىپ، الداعى جوسپارلارىمەن ءبولىستى.

قازىرگى تاڭدا 11 سىنىپتا وقيتىن مەيرامبەك الداعى ءبىلىمىن دە وسى سپورتپەن بايلانىستىرعىسى كەلەتىنىن جەتكىزدى.

ۇستازى، جەتەكشىسى الەمنىڭ بىرنەشە دۇركىن چەمپيونى، «قازاقستاننىڭ ءجۇز جاڭا ەسىمىنە» ەنگەن، اسكەري سامبودان قازاقستان رەسپۋبليكاسىنىڭ سپورت شەبەرى – تالعات جۇماعاليەۆ.

العاشقى قادام

-سپورت جولىنا قىزىعۋشىلىڭ قاي جاستان پايدا بولدى؟

-سپورتقا دەگەن قىزىعۋشىلىعىم 9 جاسىمدا باستالدى. ءوزىمنىڭ اعام ءارى جەتەكشىم، ۇستازىم تالعات جۇماعاليەۆ مەنىڭ شيراقتىعىمنان سپورتقا يكەمىمدى بايقاپ، جاتتىعۋ زالىنا اپاردى. ءبارى سول جەردەن باستالعان ەدى. «وسى بالادان بىردەڭە شىعادى» دەگەن لەپپەن ۇستازىمنىڭ ارقاسىندا قازىر جاتتىعۋسىز ءبىر كۇنىم دە وتپەيدى.

-ەڭ العاش رينگكە شىققان كەزىڭدە قانداي سەزىمدە بولدىڭ؟

-ەڭ العاش رينگكە 9 جاسىمدا وبلىس ارالىق تۋرنيردە شىقتىم. ارينە، سەنىمنەن كورى قورقىنىش باسىم بولدى. ماعان كورسەتىلگەن قولداۋدىڭ ارقاسىندا فينالعا ءوتتىم. وزىمنەن ءبىراز جاس ۇلكەندەرمەن باق سىناستىم. بىراق، جەڭىلىس تاپتىم. ودان قاناتىم قايىرىلمادى. كەرىسىنشە، جەڭىسكە قاراي قادامىم نىعايا ءتۇستى. جەڭىلىستى مۇمكىندىك رەتىندە قابىلدايمىن. دەمەك، ءالى جەڭۋگە مۇمكىندىك بار دەگەن سەنىم كۇشەيەدى.

-وڭىردە سەنى كوبى “قارا باتىر” لاقاپ اتىمەن تانىس. بۇل اتاۋدى كىم ۇسىندى؟

-شەشەنستان سپورتشىلارىمەن جارىس بولعالى جاتتى. قىزىعى جارىس ءبىزدىڭ اۋىلدا ءوتتى. باسقا ەلدەردەن كوپتەگەن سپورتشىلار ءبىزدىڭ اۋىلعا جينالدى. ۇلكەن مارتەبە. رينگكە شىعار الدىندا لاقاپ ات ىزدەستىرە باستادىق. باسىندا «چەرنىي پانتەرا،تيگر» دەگەن اتاۋلاردى قاراستىردىق. الايدا جەتەكشىم «قارا باتىر» اتاۋىن ۇسىندى. وزىمە قاتتى ۇنادى. ءبىر جاعىنان وزگە ۇلت وكىلدەرىنىڭ اراسىندا قازاقى ەسىممەن شىققانىمنىڭ ءوزى رۋحتى كوتەرەدى ەمەس پە؟

-بولاشاعىڭدى سپورتپەن بايلانىستىراسىڭ با؟ العا قويعان قانداي جوسپارلارىڭ بار؟

-بولاشاققا جوسپار كوپ، ارمان قۇرۋلى تۇر. باستى ماقسات كوك تۋىمىزدى الەمدىك ارەنادا جەلبىرەتۋدى توقتاتپاۋ. ءوزىم دە شاكىرتپىن. الداعى ۋاقىتتا مەنىڭ دە شاكىرتتەرىم بولعانىن قاتتى قالايمىن. اۋىلىمنان شىققان جاستاردى چەمپيون قىلۋ ويدا جۇرگەن ۇلكەن ارماندارىمنىڭ ءبىرى. بولاشاقتا UFC تورىنەن ءوزىمدى كورگىم كەلەدى. ءوزىم ول الاڭعا شىقپاسام دا، شاكىرتتەرىم بوي كوتەرەتىندەي ازامات بوپ وسكىم كەلەدى.

-جاراقات العان ساتتەرىڭ بولدى ما؟ دەنساۋلىعىڭا زيان كەلگەن كەزدەر شە؟

-سپورت دەنساۋلىققا پايداسىن تيگىزبەسە زيانى ەش تيمەيدى. ۇنەمى جاتتىقساق، سونداي-اق دارۋمەندەر قابىلداپ جۇرسەك دەنساۋلىق سىر بىلدىرمەيدى دەپ ويلايمىن. ازىرگە ەش جارىستان جاراقات المادىم. الماياق تا قويايىن.

-سوڭعى بارعان جارىس ءساتى قالاي بولدى؟

-ۋفا قالاسىندا ءوتتى. 2-ءشى ورىندى يەلەندىم. ادەتتەگىدەي، اسا ءبىر قيىنعا سوقپادى. ەندىگى ماقسات باس جۇلدەگە تالاسۋ، چەمپيون اتانۋ.

جوسپارلارىڭ ورىندالسىن! كوپ راقمەت!

ءىنجۋ ومىرزاق،

"ادىرنا" ۇلتتىق پورتالى 

 

 

پىكىرلەر