نەتكەن كۇشتى ادام! ەكى قولى مەن ەكى اياعى جوق ميلليونەر

4717

قول-اياعى جوق باتىل ادام تۋرالى عاجايىپ ءومىر وقيعاسى...

تانىس بولىڭىزدار – نيك ۆۋيچيچ. دۇنيە ەسىگىن قول-اياقسىز اشقان قايسار مىنەزدى، ءورشىل رۋحتى، الەمگە ايگىلى تابىستى ەر-ازامات.

مەن، وسىنداي وقيعالاردى بارىمىزگە، اسىرەسە، بوستان-بوسقا كۇيىنىپ، جۇمىستاعى ماسەلەلەرگە، جاقىندارىمەن ورىن العان جانجالدارعا جانە باسقا دا كىشىگىرىم جاعدايلارعا بايلانىستى ءجيى رەنجىپ، دەپرەسسياعا ۇشىراعان دەنى ساۋ ادامدار ءۇشىن قايتا-قايتا وقۋ قاجەت دەپ ويلايمىن...

سونىمەن، نيك وتباسىندا كوپتەن كۇتكەن تۇڭعىش بالا بولدى. الايدا، ونى تۋعاننان كەيىن اناسىنا كورسەتۋگە باس تارتتى، ءتىپتى مەديتسينا قىزمەتكەرلەرى دە نارەستەنىڭ قولسىز جانە اياقسىز تۋعانىنا قاتتى تاڭ قالعان كورىنەدى...

نيكتىڭ سول اياعىنىڭ ورنىنا تەك “تابانعا” ۇقساس بىرنارسە بار ەدى. وسىنىڭ ارقاسىندا نيك ءجۇرۋدى جانە ءجۇزۋدى، جازۋ-سىزۋدى، ءتىپتى كومپيۋتەردە ويناۋدى ۇيرەندى. ول كادىمگى قاراپايىم اۆستراليالىق مەكتەپكە وقۋعا بارعان العاشقى مۇگەدەك بالا بولدى.

ارينە، بالاعا ءوزىن وسىلاي “قابىلداۋ” قيىنعا سوقتى، ءتىپتى ول سەگىز جاسىندا اناسىنان ءوزىن سۋعا باتىپ كەتۋى ءۇشىن ۆانناعا اپارۋىن ءوتىندى. بىراق، ول ولاي ىستەمەدى ... ول اتا-اناسىنىڭ ونى قانشالىقتى جاقسى كورەتىنىن جانە ولارعا بۇلاي جاساي المايتىندىعىن ەلەستەتتى. بۇل ونىڭ وزىنە قول جۇمساماق بولۋىنىڭ العاشقى جانە سوڭعى ارەكەتى ەدى.

سودان كەيىن ول ءومىردىڭ شىن ءمانىن ىزدەي باستادى. «نەلىكتەن، ءبىز بۇل ومىرگە كەلدىك؟» جانە «بۇل ءومىردىڭ ماعىناسى نە؟» دەگەن سۇراقتار بارلىق جاسوسپىرىمدەردى مازالايتىنى ءسوزسىز. الايدا، بۇل «ەرەكشە بالاعا» ولارعا جاۋاپ ىزدەۋدىڭ قانداي بولعانىن ەلەستەتىپ كورىڭىزشى!

ون توعىز جاسىندا نيك ۋنيۆەرسيتەتتە قارجىلىق جوسپارلاۋ بويىنشا وقي باستادى. بىردە وعان ستۋدەنتتەر الدىندا ءسوز سويلەۋ ۇسىنىلدى. سويلەۋدىڭ العاشقى مينۋتتارىنان كەيىن زالداعى بارلىق قىزدار كوزدەرىنە جاس الدى... نيكتىڭ ايتقان ءسوزى دە، نيكتىڭ سىرتقى كەلبەتى دە ولارعا ايتارلىقتاي اسەر قالدىردى.

ساحناعا شىققان بويجەتكەن نيكتىڭ سويلەگەن ءسوزى ونىڭ ءومىرىن “وزگەرتكەنىن” مويىندادى، ويتكەنى ەشكىم وعان وسى ۋاقىتقا دەيىن ونى جاقسى كورەتىنىن جانە ونىڭ ءوزى سياقتى ادەمى ەكەنىن ايتقان ەمەس.

بۇگىندە نيك 1 جىلدىڭ تەك ەكى ايىن عانا ۇيدە وتكىزەدى ەكەن. قالعان ۋاقىتتارى الەم بويىنشا موتيۆاتسيا بەرۋگە، ادامداردى رۋحتاندىرۋعا جوسپارلانعان. قازىر ول كاسىبي سپيكەر رەتىندە بارلىق جەردە – تۇرمەلەر مەن مەكتەپتەردە، قارتتار ۇيىندە جانە ستاديونداردا ءسوز سويلەيدى. سپيكەردى وسى ۋاقىتقا دەيىن ءۇش ميلليوننان استام ادام ەستىگەن. ونىڭ جەتكەن جەتىستىگى قاراپايىم، سوزدەرى تۇسىنىكتى جانە ەڭ ماڭىزدىسى، ءار ادامنىڭ جانى مەن جۇرەگىنە اسەر ەتەرى ءسوزسىز...

«ومىردە ءسىز ءوزىڭىزدى قۇلاپ بارا جاتقانداي سەزىنەتىن قيىن كەزدەر بولادى، جانە قايتا كوتەرىلۋگە شاماڭىز جەتپەيتىندەي كورىنەدى... سول كەزدە ءسىز، مەندە ءوزى ءۇمىت بار ما دەپ تەرەڭ ويعا باتاسىز... مەنىڭ قولىم دا، اياعىم دا جوق! مەنىڭشە، مەن كەم دەگەندە ءجۇز رەت كوتەرىلۋگە تىرىسسام دا، قولىمنان كەلمەيتىن سياقتى. بىراق، كەزەكتى جەڭىلىستەن كەيىن مەن ءۇمىتىمدى ۇزبەيمىن. مەن، قايتا-قايتا تىرىسامىن. مەن، ءسىزدىڭ «ساتسىزدىگىڭىز» بارلىعىنىڭ سوڭى ەمەس ەكەنىن بىلگەنىڭىزدى قالايمىن. ەڭ باستىسى، ءسىز بارلىعىن قالاي «اياقتايتىنىڭىزدا». ءسىز مىقتى بولىپ، مارەنىڭ سونىڭا دەيىن جەتكىڭىز كەلەدى مە؟ دەمەك، ءسىز كوتەرىلۋگە قايتا ​​كۇش تابا الاسىز!»

 

زارينا اشىربەك،

"ادىرنا" ۇلتتىق پورتالى

پىكىرلەر
ۇقساس جاڭالىقتار