ات ابزەلدەرى

1605

اڭداتۋ

بالاپانىم – زاڭعارىم،

ەركەلەگەن قۇلىنىم،

الدا سەنىڭ ارمانىڭ،

الدا سەنىڭ عۇمىرىڭ.

 

جايناسىن گۇل ءومىرىڭ،

ەرتەڭىڭدى ويلادىم.

ازامات دەپ سەنى، ۇلىم،

تۇلپارىڭدى سايلادىم.

 

بۇل ومىردە بولاتىن

جەڭىس تە بار، سىناق تا،

قاي كەزدە دە سەنى اتىڭ

جەتكىزەدى مۇراتقا.

 

باتىرلارداي باس العا،

قولىڭا ەلدىڭ ال تۋىن.

ەر-تۇرمانىڭ قاشان دا،

ءبۇتىن بولسىن، التىنىم.

 

مىنبەي اتقا اۋەلى،

ابزەلدەرىن بىلەرسىڭ.

ءبىلىپ، تانىپ سەن ونى،

الامانعا كىرەرسىڭ.

 

ءداستۇرىڭدى جالعاعان

ءار ابزەلدىڭ سىرى بار.

كوڭىل قويىپ، جان  بالام،

ايتقانىمدى ۇعىپ ال.

 

جۇگەن 

كوڭىلىڭمەن ۇمتىلعان

بىلسەڭ ەلىڭ سۇيىنەر.

جۇگەن اتتى بۇل تۇرمان

ات باسىنا كيىلەر.

 

اتپەن كەزىپ الاپتى،

الىستارعا زاۋلايسىڭ.

ال جۇگەنسىز سەن اتتى

باعىندىرا المايسىڭ.

 

جۇگەننىڭ كوپ ءتۇر-ءتۇرى،

جاساۋ دا ونى ءبىر ەڭبەك.

نەبىر اساۋ جىلقىنى

ۇيرەتەرسىڭ جۇگەندەپ.

 

دالا كەزگەن، تاۋ كەزگەن

قارعىپ ءمىنىپ جىلقىعا،

جانۋاردى ءار كەزدە

كوندىرە ءبىل ىرقىڭا.

 

توقىم 

كوڭىل ءبولىپ، اقىلدىم،

نازار اۋدار توقىمعا!

قاي كەزدە دە اتىڭا

توقىم سالماي وتىرما.

 

جارامايدى قۇر تۇرعان،

كوپ بىلۋگە تالاپتان.

ازىرلەنەر بۇل تۇرمان

بارقىت، كيىز، ماناتتان.

 

ساپارىڭدى باستاساڭ،

ارتىق ەمەس بىلگەنىڭ.

توقىم سالساڭ،

ەشقاشان

جاۋىر بولماس مىنگەنىڭ.

 

ەر-توقىم  

بابام ايتىپ اقىلىن،

بىزگە ەر-توقىم  قالدىرعان.

ونى مىنگەن اتىنىڭ

ارقاسىنا قوندىرعان.

 

ءساندى ءارى قونىمدى،

سايگۇلىككە جاراسقان.

جاسالادى ەر كادىمگى

تەمىر مەنەن اعاشتان.

 

ەڭ باعالى جادىگەر،

بەس بولشەكتەن قۇرالعان.

التى الاشقا ءمالىم ەر،

ونىڭ دا بار ءتۇرى الۋان.

 

ەر-توقىمنىڭ كادەلى

الدىڭعى، ارتقى قاسى بار.

بەلاعاشقا ادەمى

ەكى قاپتال قوسىلار.

 

قازاقى ەر مەن قالماقى ەر،

قۇسباس، ويما،  بوقان ەر.

اقباس، قىرعىز، قانباس ەر،

قوزىقۇيرىق، قوقان ەر...

 

قاستەرلەيدى مۇرامدى ەل،

تارالعان كەڭ ءتۇر-ءتۇرى،

كورسەتەدى بۇل ابزەل

اسەم ەتىپ جىلقىنى.

 

ايىل 

تۇلپار مىنسەڭ، اقىلدىم،

ايىلىن تارت دۇرىستاپ.

تۇرادى ول اتىڭنىڭ

ەر-تۇرمانىن نىق ۇستاپ.

 

ابزەلدىڭ ءبىل ءتارتىبىن،

ات باۋىرىنان وتكىزىپ.

بار كۇشىڭمەن تارت، ۇلىم،

شەت-شەگىنە جەتكىزىپ.

 

ونىڭ ەكى ءتۇرى بار:

شاپ ايىل مەن ءتوس ايىل.

ءمانىن، بالام، ۇعىپ ال،

ماڭىزدى اتقا وسى ايىل.

 

ايىلدى اسەم ءار شەبەر

جاسايدى  ەسىپ قايىستان.

ايىل مىقتى بولسا ەگەر،

جەڭەرسىڭ سان سايىستا.

 

قانجىعا 

ەر جىگىتتىڭ جانىنان

قانجىعاسى سايلانار.

ولجاسىمەن تابىلعان

سول قانجىعا مايلانار.

 

قانسونارعا ساي بولسا،

اڭشى اتانار تاعى دا ەر.

ال قانجىعاڭ مايلانسا،

سۇيسىنەدى قالىڭ ەل.

 

ۇزەڭگى 

مىقتى بولسا ۇزەڭگى،

تۇلپارىڭمەن زاۋلايسىڭ.

مىعىم ۇستاپ تىزەڭدى،

ات ۇستىنەن اۋمايسىڭ.

 

قوس قاپتالدان بۇل قۇرال

ەر-توقىمعا جالعانعان.

تەك بيىككە ۇمتىلار

وعان اياق سالعان جان.

 

ات ابزەلى جالتىراپ،

سوعىلادى تەمىردەن.

ۇزەڭگىمەن ارعىماق

تارتىمدى بوپ كورىنگەن.

 

ومىلدىرىك 

ول داعى ەردىڭ بولشەگى،

اتقۇمار جان ۇعادى.

ومىلدىرىك بولسا، ەرىڭ

قوزعالماستان تۇرادى.

 

ارعىماققا ءار بەرىپ،

كەۋدەسىنە كيىلەر.

اشەكەيمەن ساندەنىپ،

شاشاق باۋمەن تۇيىلەر.

 

جاسايدى ونى شەبەرلەر

بىلعارى مەن قۇرىمنان.

ات ابزەلىن ونەرلى ەل

قازىنام دەپ ۇعىنعان.

 

تەبىنگى

ال ءبىر ابزەل – تەبىنگى،

ءجون ءبارى ساي بولعانى.

ساندەپ تۇرار ەرىڭدى

جۇقا كيىز ول داعى.

 

سالتاناتتى ەر كادىمگى

تابىلار ءۇي تورىنەن.

كيىمىڭدى تەبىنگى

ساقتايدى اتتىڭ تەرىنەن.

 

قۇيىسقان

ءار كەزدە سەن جاڭىلما،

قۇيىسقاندى قولىڭا ال.

كىم بىلەدى، جولىڭدا

كەدەرگىلەر جولىعار.

 

قۇيىسقانسىز سار جەلگەن

ارعىماقتىڭ ءسانى جوق.

ساقاداي ساي ابزەلمەن

قورقۋدىڭ ەش ءجونى جوق!

 

ءسات ساپار! 

اتقا ءمىنىپ بابالار،

ەلىن، جەرىن قورعاعان.

تۇلپارىمەن جانە ولار

جارتى الەمدى جاۋلاعان.

 

قامبار اتا تۇلىگىن

ەر قاناتى ساناعان.

جىلقىعا ارناپ عۇمىرىن،

سەرىگىنە بالاعان.

 

رۋحى بيىك، ءور ەلىڭ

سالتىمىزدى  دامىتقان.

اتقا ءمىنۋ ونەرىن

بار الەمگە تانىتقان.

 

التىننان دا زور قۇنى

قۇرمەتتەي ءبىل سالتىڭدى،

اتىڭ وزىپ ءار كۇنى،

اسىرا بەر داڭقىڭدى!

 

ولجاس قاسىم

 

پىكىرلەر
رەداكتسيا تاڭداۋى
Серіктестер/Партнеры
Студия IMA - создание сайтов Доставка цветов Астана - Lova Buket