جەرىمىز ونلاين-اۋكتسيوندا ساتىلماق

1861

ەلىمىزدە ەنەرگەتيكا مينيسترلىگىنىڭ العاش رەت وتكىزگەلى وتىرعان ونلاين-اۋكتسيونىندا ساتىلاتىن جەر ايماقتارىنىڭ باسىم بولىگى اتىراۋ وبلىسىنا تيەسىلى. اتاپ ايتقاندا، بۇل جەرلەر: ساعىز، قاراباۋ، زابۋرىن، بەگايدار، دەرەش، بالقۇدىق، بەستەرەك، ۇشتاعان، قوشالاق جانە سارايشىق ۋچاسكەلەرى دەپ حابارلايدى «ادىرنا» ۇلتتىق پورتالى inbusiness.kz سايتىنا سىلتەمە جاساپ.

بۇدان بولەك، اقتوبە مەن بقو-دان دا اۋكتسيونعا قويىلعان جەر ۋچاسكەلەرى بار.   قازىرگى كۇنى 29 مىڭ شارشى مەتر بولاتىن جەر اۋماعىن الۋعا وتىزدان استام تۇلعا نيەت ءبىلدىرىپتى. ايتا كەتەيىك، ساۋدا-ساتتىققا قاتىسۋ ءۇشىن قول قويۋ بونۋسى 20 ميلليون تەڭگەدەن باستالادى، ال جالپى مولشەرى – 400 ميلليون تەڭگە.   اتالعان ايماقتار مۇناي-گاز كەنىنە باي دەپ ەسەپتەلەدى. الايدا وندا قانداي جانە قانشا قوردىڭ بار ەكەندىگىن جەردى يەلەنۋ قۇقىعىن يەمدەنگەندەر زەرتتەپ بىلە الادى. زاڭعا سايكەس، ەگەر پايدالانۋشى العان ۋچاسكەسىنەن شيكىزات قورىن تاپسا، ول بولىك مەملەكەت تەڭگەرىمىنە الىنىپ، يەسىنە ونى وندىرۋدە باسىم قۇقىق بەرىلەدى. بارلاۋ مەن وندىرۋگە ارنالعان كەلىسىمشارتتار جۇمىس تۇرىنە قاراي 6 جىلدان 25 جىلعا دەيىن بەرىلەدى.    «بۇل شارانىڭ ءبىزدىڭ كورەتىن پايدامىز كوپ. بىرىنشىدەن، گەولوگيا سالاسىنداعى داعدارىستى قالپىنا كەلتىرىپ، دامىتۋعا مۇمكىندىك تۋادى. ەكىنشىدەن، قوسىمشا سالىق، جاڭا جۇمىس ورىندارى، شاعىن جانە ورتا بيزنەستى دامىتۋ ارقىلى ەل ەكونوميكاسىنا وڭ اسەرىن تيگىزەدى»، – دەيدى «اتامەكەن» قو ۇقپ رەسمي وكىلى اسىلبەك جاكيەۆ.  اۋكتسيوندى وتكىزۋ مەرزىمى 23 جەلتوقسانعا بەلگىلەنگەن. ءوتىنىش 29 قاراشاعا دەيىن قابىلدانباق. ايتا كەتەيىك، جەر ساۋداسىنا شەتەلدىك ازاماتتار دا قاتىسا الادى.

فوتو اشىق دەرەككوزدەن الىندى.

پىكىرلەر
رەداكتسيا تاڭداۋى