قازاننىڭ 3 ءشى جۇلدىزىندا قۇلسارىدا، ورتالىقتا ورنالاسقان «داۋلەت» مەيرامحاناسى جانىندا توسىن وقيعا ورىن الدى. قولدارىندا اۆتومات، الاباجاق كيىنگەن سپەتسسلۋجبانىڭ قىزمەتكەرلەرى جازىقسىز جاندى ۇستاپ قولىنا كىسەن سالدى. پوليتسيا قىزمەتكەرلەرى اتىراۋ وبلىسى ىشكى ىستەر دەارتامەنتىنەن كەلگەن. شاماسى، 2-3 كۇن بۇرىن كەلىپ جەمتىگىنىڭ قاقپانعا ءتۇسۋىن توسىپ جاتقان سىڭايلى دەپ جازادى سارمان مالىك Facebook الەۋمەتتىك جەلىسىندە.
«ەستەرىڭىزدە بولسا، جاقىندا الەۋمەتتىك جەلىگە «الاياق يمامنىڭ ارەكەتى» دەگەن ماقالا كەڭىنەن تاراعان بولاتىن. ماقالادا سەرىكباي ەسىمدى ازامات الاياق يمامنىڭ ارام پيعىلدى ءىس-ارەكەتىن تولىق اشكەرەلەگەن. ماقالا اقتوبە وبلىسىندا مەشىت ۇستاپ وتىرعان 27 جاسار يمام سابىرعاليەۆ نۇرلىبەك جايىندا بولاتىن. ول يمام وزىنە چات اشىپ الىپ، بويداق قىز-كەلىنشەكتەرمەن اڭگىمە-دۇكەن، سۇحبات قۇرۋدى ادەتكە اينالدىرعان ەكەن. كوزى تۇسكەن سۇلۋ قىزداردىڭ باسىن اينالدىرىپ، توقال قىلىپ نەكەسىن قيدىرىپ، كافەلەردەن سۋارىپ، قوناق ۇيلەرگە اپارىپ تۇنەتىپ، شارۋاسىن ءبىتىرىپ، كوپ كەشىكپەي تالاق بەرىپ قۇتىلىپ كەتە بەرەدى ەكەن. ياعني، زينانى حالالداندىرىپ جۇرگەن الاياق، زيناقور يمام كەزەكتى سۇلۋىن قۇشۋدى جوسپارلاپ قۇلسارى قالاسىنا دا كەلىپ جەتكەن. بۇل جولى سۇر مەرگەننىڭ جەبەسى بايگۋرشيموۆ راشيت ەسىمدى ازاماتتىڭ اپاسىن كوزدەگەن ەكەن. ەكىنشى ايەل قىلىپ الاتىن بولىپ قىزدىڭ اكە-شەشەسىنىڭ رۇقساتىن العان. مەشىت ۇستاپ وتىرعان يمامعا كىم كۇمان كەلتىرەدى؟
ر.بايگۋرشيموۆ اعايىن تۋمالارىن جيناپ، مال سويىپ، قوناعاسىن بەرىپ، الگى يمام مەن اپاسىنىڭ نەكەسىن قيدىرتقان. نەكەسى قيىلعان يمام سول كۇنى اقتوبەگە كەتىپ قالىپ، ەرتەسى كۇنى نەكەلەنگەن جارىنا اۆتوماتتى تۇردە تالاق بەرگەن. سەبەبى، قىزدىڭ اينالاسى كوپ ەكەن، ەرتەڭگى كۇنى جاۋاپكەردىڭ سۇرالاتىنىن سەزگەن يمام قۋلىعىن اسىرا المايتىنىن سەزىپ جىلىويدان تابانىن جالتىراتقان. بۇل ابىرويدان ايىرۋ! اعايىن-تۋما الدىندا اماناتقا قيانات جاساۋ، ەردىڭ باسىن جەرگە قاراتۋ، مازاق ەتۋ! ر.بايگۋرشيموۆ اقتوبە وبلىسى وكىل يمامىنا، كەيىن قمدب، مۋفتياتقا حابارلاسقان.
بولعان جايتتاردى كورشىسى سەرىكباي الەۋمەتتىك جەلىگە جاريالاعان. ر.بايگۋرشيموۆ الاياق يمامدى قۇلسارىعا شاقىرتقان. يمام شاقىرعان جەرىنە زورعا دەگەندە كەلىپ كەشىرىم سۇراعان. ايىپپۇلىنا 1 ملن تگ بەرەتىن بولىپ كەلىسكەن، قۇشاقتاسىپ قول الىسقان. جانە الەۋمەتتىك جەلىدەگى ءوزى تۋرالى شىققان ماقالانى الىپ تاستاۋىن سۇراعان. ر.بايگۋرشيموۆ الاياق نۇرلىبەكتى ۇرماعان، سوقپاعان، ءتىپتى داۋىس كوتەرىپ زەكىمەگەن. «يىلگەن باستى قىلىش كەسپەيدى» دەپ، كەشىرىم بەرگەن. يمام ءوز ەركىمەن حالىقتان، مۋفتياتتان كەشىرىم سۇراعان، ول بەينەتاسپانى ر.بايگۋرشيموۆكە ءوزى تۇسىرتكەن. اقتوبەگە جەتىپ العان يمام: «ر.بايگۋرشيموۆ مەنى ۇرىپ سوقتى، دوستارى جابىلدى، اقشا بوپسالادى، قورقىتىپ بەينەتاسپاعا ءتۇسىردى» دەپ، اتىراۋ وبلىسى ءىىد نە ارىز جازعان. ءىىد الاياق يمامدى ءوز قورعاۋلارىنا العان. اراعا ۋاقىت سالىپ الاياق يمام ر.بايگۋرشيموۆكە ۆاتتساپ ارقىلى حابارلاسىپ، «اقشانى بەرمەيمىن، بىرەسە بەرەمىن» دەپ ر.بايگۋرشيموۆتى ادەيى ىزالاندىرعان.
ر.بايگۋرشيموۆ: «نەگىزىندە ماعان سەنىڭ اقشاڭ قاجەت ەمەس، 1 ملن اقشا بەرەمىن دەپ ايتقان ءوزىڭ، مەن تىلىڭنەن تارتپادىم، ەڭ بولماسا كەتكەن شىعىندى وتەسەڭ بولدى، بار اقشاڭدى «حارەكەت» قورىنا اۋدارىپ جىبەر دە، ماعان تۇبىرتەگىن كورسەتسەڭ بولدى» دەگەن. الايدا، الاياق يمام پوليتسيامەن بىرىگىپ، ر.بايگۋرشيموۆتى تورعا ءتۇسىرۋدى ويلاستىرىپ، كەلىسىمشارتقا وتىرادى. الاياق يمام ر.بايگۋرشيموۆكە: «سويلەسەيىك، حابارلاسايىق، تيىندى بەرىپ تاستايىن» دەپ قايتا-قايتا بايلانىسقا شىعادى. ر.بايگۋرشيموۆ: «حارەكەت» قورىنا سالىپ جىبەر نەمەسە جوق-جىتىككە بەر» دەيدى. الاياق يمام: «قولىڭا بەرۋدى ءجون كوردىم» دەپ ءمۇلايىمسي قالادى. سەبەبى، الاياق يمامنىڭ ساسىق جۇرەگىندە ۇلكەن قۋلىق، شايتاني زۇلىمدىق جاسىرىنعان ەدى. پوليتسيالار الاياق يمامنىڭ قولىنا ۇنتاق قوسىلعان كۋپيۋر اقشا بەرىپ، الاياقتى ىسكە دايىندايدى.
سول ويلارىن ىسكە اسىرماق بولعان بىرىككەن توپ ر.بايگۋرشيموۆتى «داۋلەت» مەيرامحاناسى جانىنداعى «مياتوعا» شاقىرادى. ويىندا دىم جوق ر.بايگۋرشيموۆ كەلەدى. الاياق يمام ر.بايگۋرشيموۆكە پوليتسيا دايىنداعان 300 مىڭ جالعان اقشا ۇسىنادى. ر.بايگۋرشيموۆ اقشانى ساناپ الادى. ءدال سول كەزدە ارنايى توسىپ، جاسىرىنىپ دايىن تۇرعان سپەتسسلۋجبانىڭ قىزمەتكەرلەرى كەلىپ ر.بايگۋرشيموۆتىڭ قولىنا كىسەن سالادى. بەينەتاسپاعا ءتۇسىرۋ ارقىلى ماناعى وزدەرىنىڭ دايىنداعان جالعان اقشالارىن ساناپ، ر.بايگۋرشيموۆتى اتىراۋعا الىپ كەتەدى. ءىستىڭ ءمان-جايى وسىناي. بۇل تازا قاقپان! الداۋ-ارباۋ ارقىلى ەرىكسىز قولعا ءتۇسىرۋ! جالا جابۋ! ەرتەڭگى كۇنى ءدال وسى وقيعانى ءىىد گى حابارشىلارى بۇرمالاپ تۇرىپ باسقاشا ايتىپ، حالىقتى جالعان اقپاراتقا سەندىرەدى. قمدب قۇرامىندا ءدال وسىنداي باسىنا سالدە تاققان، ەكىجۇزدى، ارسىز اگەنتتەر باستان اسىپ جىعىلادى. ساق بولىڭدار، اعايىن!»
P.S جاستارعا ءتۇزۋ، يماندى جول كورسەتەدى دەپ سەنگەن يمامدارىمىز مىناداي ارەكەتكە بارىپ جۇرگەنى راس بولسا، "قۇدايدىڭ بەرگەن جازاسى" دەمەسكە لاج جوق شىعار. بۇل قالاي؟ ءار قىزدى توقال ەتىپ، تالاق ەتىپ تايراڭداعان يامامنىڭ قولداۋشىسى كىم؟ ءتيىستى مەكەمەلەر مەن قۇزىرلى ورگان يمامعا قاتىستى وسى ماسەلەنى باقىلاۋعا الىپ، انىق، قانىعىن انىقتايدى دەگەن سەنىمدەمىز.
«ادىرنا» ۇلتتىق پورتالى.
فوتو دەرەككوزدەن الىندى.
