كەز كەلگەن مينيستر قىزىعاتىن كابينەت

328

الەۋمەتتىك جەلىدە شاكارىم اتىنداعى سەمەي مەملەكەتتىك ۋنيۆەرسيتەتى رەكتورىنىڭ كابينەتى قىزۋ تالقىعا ءتۇستى، - دەپ حابارلايدى "ادىرنا" ۇلتتىق پورتالى.

جەكە توراپتى، دەمالىس، قابىلداۋ جانە سويلەسۋ بولمەلەرىن قوسا ەسەپتەگەندە كابينەتتىڭ جالپى اۋدانى شامامەن 250 شارشى مەتر.

حابارلامادا: "كەز كەلگەن اكىم وعان (كابينەتكە - ەسكەرتۋ) قىزىعادى. ءيا، ءتىپتى مينيسترلەر قىزىعار ەدى. ەكس-رەكتور پاتەرى بولماسا دا كۇن سايىن وسىندا تۇنەيتىن شىعار؟ قىزمەتكە دەگەن مۇنداي ادالدىقتى ەلەستەتۋدىڭ ءوزى قيىن. قاۋەسەتتەرگە سەنسەك، بۇل كەڭسەدەگى مۇلىكتى الۋعا 3 كۇن كەرەك بولىپتى. ەگەر مۇنداي قاراپايىم ۋنيۆەرسيتەتتە وسىنداي جاعداي بولسا، باسقا جوعارى وقۋ ورنىنان نە كۇتۋگە بولادى؟", - دەلىنگەن.

رەكتور مىندەتىن اتقارۋشى مۇحتار بايجۇمانوۆ "ليتەر" باسىلىمىنا بەرگەن سۇحباتىندا ونىڭ الدىندا وسى قىزمەتتە بولعان ادام كەرەمەت كابينەتكە يەلىك ەتكەنىن اتاپ ءوتتى.

"مەن مۇنى راستايمىن. ۋنيۆەرسيتەتتە تەكسەرۋ جۇرگىزىلەدى. مەن بۇل كابينەتتى المايمىن. ءبىرىنشى باسشىعا 50 شارشى مەتر قاجەت. ال بولمەنىڭ قالعان بولىگى ستۋدەنتتەر اۋديتورياسىنا اينالادى", - دەدى ول.

سونداي-اق، بۇگىندە ۋنيۆەرسيتەتتە قارجى-شارۋاشىلىق قىزمەتىنە زاڭدى بۇزۋ دەرەگىمەن سىرتقى اۋديت جۇرگىزىلىپ جاتقانى بەلگىلى بولدى. جوعارى وقۋ ورنىندا كەيبىر قىزمەتكەرلەر بايجۇمانوۆتىڭ جۇمىسىنا جانە ءاۋديتتىڭ جۇرگىزىلۋىنە كەدەرگى جاساماق بولعان.

بۇل فاكت بويىنشا باس پروكۋراتۋرا مەن ءىىم-گە شارا قولدانۋ جانە كىنالى تۇلعالاردى جاۋاپكەرشىلىككە تارتۋ ءۇشىن ءتيىستى وتىنىشتەر جولدانعان ەكەن.

"ادىرنا" ۇلتتىق پورتالى

پىكىرلەر
رەداكتسيا تاڭداۋى