سوعىس ارداگەرى اتانا الماي ءجۇر...

531

95 جاستاعى قاريا سوعىس ارداگەرى مارتەبەسىن  الا الماي كەلەدى. بۇل تۋرالى «كتك» تەلەارناسى حابارلادى. فاشيستەرگە قارسى سوعىس كەزىندە «رەزەرۆتە بولدىم» دەگەن ءابدىباي توقمانبەتوۆ، ارتىنشا جاپون سوعىسىنا اتتانىپ، ەلگە تەك 1948 جىلى ورالعان. بىراق وعان تەك «تىل اردەگەرى» دەگەن مارتەبە بەرىلگەن.  قاريانىڭ ءوزى مۇنى داۋلاماق ەمەس. تەك ارتىنداعى ۇرپاعى «ارداگەردىڭ ەڭبەگى ەلەنسىن» دەيدى. ولار رەسەيدىڭ گاتچين قالاسىنداعى مۇراعاتتان ونىڭ جاپون سوعىسىنا قاتىسقانىن راستايتىن قۇجاتىن دا الدىرتقان ەكەن. الايدا ءىس سودان ارىگە جىلجىماي تۇر.

ەرىك توقمانبەتوۆ، ارداگەردىڭ ۇلى:

«اكەمىز 1943 جىلى قاڭتاردا جاپون جەرىنە اتتانعان. 1948 ۆلاديۆوستوكقا قايتادى. ءسويتىپ وعان «تىل ارداگەرى» مارتەبەسىن بەرەدى. مەنىڭ ءبىر تۇسىنبەيتىنىم،  اكەم 5 جىل بويى جاپونيادا جۇرسە، جارتىسى الماتى وبلىسىندا تىلدا جۇرگەنى مە؟»

رىسكەلدى جاقاۋباەۆ،  ارداگەردىڭ  تۋىسى:

«بۇل كىسى قازاقستاندا ءجۇرىپ ەڭبەك ەتسە، تىل ارداگەرى دەۋگە بولار ەدى. بىراق جاپون جەرىندە سوعىستى عوي. مۇنى نەگە ەسكەرمەيدى؟»

ماساق اۋىلىنداعى اقساقالدىڭ ءۇيىنىڭ ماڭدايشاسىندا بالالارى ورناتقان «سوعىس ارداگەرى» دەگەن تاقتايشا تۇر.  9-مامىردا كوڭىلدى كىربىڭ باساتىنى انىق. ەڭبەكشى قازاق اۋدانىنداعى قورعانىس ىستەرى جونىندەگى ورگاننان ءالى ناقتى ارەكەت بايقالمايدى. ەندىگى بار ءۇمىت رەسەيدىڭ ورتالىق مۇراعاتىنا جولدانعان سۇرانىستا.

عاسىر جاساعان اقساقال ءبىر جاپىراق قاعازعا بولا ءوز باعاسىن الا الماي وتىر. ءبىز ادامدى جوعالتقاندا عانا قادىرىن بىلەمىز. سونى كۇتىپ وتىرۋىمىز كەرەك پە؟ «جاقسى ادام ەدى» دەگەندى نەگە ولگەندە عانا ايتامىز؟  جاقسى ەكەنىن، قۇرمەتتى ەكەنىن ءتىرى كەزىندە ءبىلىپ، ناسيحاتتاپ جۇرەيىك!

اياۋلىم ءابىلدا،

«ادىرنا» ۇلتتىق پورتالى

 

 

پىكىرلەر
رەداكتسيا تاڭداۋى