بيلىك پەن حالىقتىڭ ءىس-ارەكەتىندەگى ۇندەستىك ماڭىزدى

345

الەمدى شارپىعان كوروناۆيرۋس ىندەتى مەملەكەتتەردەن ۋاقتىلى شارالار قابىلداۋدى، جوعارى جاۋاپكەرشىلىكتى جانە ءتارتىپتى تالاپ ەتەتىنىن كورىپ وتىرمىز. بۇل تۇرعىدان العاندا، ەلىمىز پرواكتيۆتى ارەكەت ەتىپ، جوسپارلى شارالاردى كەزەڭ-كەزەڭىمەن ىسكە اسىرۋدا.
ەلىمىزدە العاشقى كوروناۆيرۋس جۇقتىرۋ فاكتىسى 13 ناۋرىز كۇنى تىركەلگەن بولاتىن. پرەزيدەنت ق. توقاەۆ وسى ىندەتتىڭ ەل اۋماعىنا تارالۋىنا جول بەرمەۋ جونىندە ناقتى ۇيىمداستىرۋ شارالارىن قابىلداۋدى 26 قاڭتاردا، ياعني 48 كۇن بۇرىن تاپسىرعان ەكەن.
بەرىلگەن تاپسىرماعا سايكەس ۇكىمەتتىڭ ۆەدومستۆوارالىق كوميسسياسى قۇرىلىپ، كەشەندى شارالاردى جۇزەگە اسىرۋدا.
العاشقى شارالاردىڭ ءبىرى رەتىندە ىندەت وشاعى سانالعان قىتايدىڭ ۋحان قالاسىنان ازاماتتارىمىز ەۆاكۋاتسيالاندى. جولاۋشىلار ءۇشىن اۋە، تەمىرجول، اۆتوبۋس تاسىمالى توقتادى. ىندەتتەن ساقتانۋ جولدارىن اقپاراتتىق ءتۇسىندىرۋ جۇمىستارى دا تۇراقتى جۇرگىزىلدى.
اقپاننىڭ ورتاسىندا پرەزيدەنت ق. توقاەۆ ميۋنحەن قاۋىپسىزدىك كونفەرەنتسياسىندا دۇنيەجۇزىلىك دەنساۋلىق ساقتاۋ ۇيىمىنىڭ (WHO) باس ديرەكتورى ت. گەبرەيەسۋسپەن كەزدەسۋ وتكىزىپ، اتالعان ۇيىم مەن ەلىمىزدىڭ اراسىنداعى ارىپتەستىك، سونىمەن قاتار كوروناۆيرۋستىڭ تارالۋىنا قارسى جۇمىستارعا قاتىستى وزەكتى ماسەلەلەردى تالقىلاعان بولاتىن.
وسى ارقىلى مەملەكەت ءوزىنىڭ ىندەتپەن كۇرەسكە الدىن الا دايىندالعانىن كورسەتە ءبىلدى.
بارىمىزگە بەلگىلى 16 ناۋرىزدا پرەزيدەنت ەل اۋماعىندا توتەنشە جاعداي جاريالاپ، مەملەكەت راديكالدى شارالاردى قولعا الدى. داعدارىسقا قارسى شارالارعا 4,4 ترلن. تەڭگە قاراجات ءبولىندى. الەۋمەتتىك از قامتىلعان توپتارعا، توتەنشە جاعداي ۋاقىتىندا جۇمىسسىز قالعاندارعا، شاعىن جانە ورتا بيزنەسكە، ەپەديميالىق كۇرەستىڭ الدىڭعى شەبىندە جۇرگەن ماماندارعا قارجىلاي قولداۋ كورسەتىلۋدە.
الەمدىك تاجىريبە بيلىك پەن ازاماتتاردىڭ اراسىندا ءوزارا قولداۋ، تۇسىنىستىك، بىرلەسە ارەكەت ەتۋ قاجەت ەكەنىن انىق كورسەتىپ وتىر. ستاتيستيكالىق مالىمەتتەرگە قاراساق، ىندەتتى ەڭ كوپ جۇقتىرعان العاشقى ون ەلدىڭ قاتارىندا ەۋروپانىڭ جەتى مەملەكەتى بار. كوروناريۆۋستان وراسان زور زارداپ شەككەن ەل – يتاليا، بۇگىندە وندا ىندەتتەن قايتىس بولعانداردىڭ سانى 12 مىڭعا تاياپ قالدى. يتاليا ۇكىمەتى الدىن الۋ شارالارىن دەر كەزىندە قابىلداعانىنا قاراماستان، قوعامدا ىندەتتىڭ قاۋپىنە قاتىستى تولىققاندى تۇسىنىك بولماعانى ايتىلۋدا. بۇگىندە بۇل ەل تولىقتاي يزولياتسيالانعان جابىق اۋماققا اينالدى.
سوندىقتان، بۇل ىندەتپەن كۇرەستە بيلىك پەن ازاماتتاردىڭ ارەكەتى ۇندەس بولۋى شارت.

 

جاسۇلانبەك مايلىباي،
ەكسپەرت

پىكىرلەر
رەداكتسيا تاڭداۋى