سەرىكجان مۋراسيلوۆ: «عاشىقتىق وقىتۋ» باستالدى

814

بۇگىنگى ساتيرا

شالا كارىستەر، شالا امەريكالىقتار بولماسا شالا سىعاندار دەگەندى ەستىگەنىڭىز بار ما؟ جوق.جوق.جوق. شالا دەگەن تەك بىزگە عانا ءتان قاسىرەتتى قاسيەت. سوناۋ زامانداعى ءسوزدى سورپاشا ساپىرعان ابايلار، ماحامبەتتەر، شاكارىمدەردە بولماعان قاسىرەتتى قاسيەت بۇگىنگى شالا قازاقتاردىڭ قانىنا كوروناۆيرۋستاي دەندەگەن. سول شالا قازاقتاردىڭ قاسىرەتتى قاسيەتىنىڭ ارقاسىندا سوزدىك قورىمىز قي قوسىلعان توپىراقشا تىڭايدى. ال دا قاجەتىڭە قاراي ساندالا بەر.
شالا قازاق بيكەشتىڭ اتىن ونشا بىلمەيدى ەكەم، ايتەۋىر وزىنەن ءسوزى حيت بوپ جاتىر.
«عاشىقتىق وقىتۋ» جۇيەسى دەپ قالدى.تەلەديداردىڭ داۋىسىن 100-گە اپارىپ، قۇلاعىمدى تىگە قويدىم. « جانە ديە، ەگەر ديە، كارانتين جالعاسقان كەزديە، جانە ديە» دەي بەردى. اۋزىم ءتورت بۇرىش اڭىرايىپ قاپپىن. ءسوز ساپتاسى سياردىڭ اياق تاستاسىنداي ىشكە-سىرتقا، ىشكە-سىرتقا ەكەن. قاسقىردى كورگەن قويداي قاتىپ، شالا قازاقتى شاپالاق ۇرماي تىڭدادىم. «جانە ديە، 5-شي ءساۋىر ديە كانيكۋل اياقتالعان كەزديە وقۋشىلار «عاشىقتىق وقۋعا» اۋىسادى»– دەيدى. قاقيىپ قالدىم. قوزعالسام قازاق تىلىمە كوروناۆيرۋس جۇعاتىنداي. قازاق ءتىلىنىڭ قارعىسى تيەمەسىن دەپ ىستىق ءشايدى جۇتىپ جىبەردىم. كەڭىردەگىم كۇيىپ، ءتىلىم تىرىستى دا قالدى. قايران انا ءتىلىم-اي! وت تيسە دە، شوق تيسە دە «قاشىقتىق وقىتۋدى» ءتاۋىر-اق ايتىپ تۇر. ءتىلىم تىرتىق بولسا بولسىن، شالا قازاق بولماسام بولدى دەپ، ءتاۋ ەتتىم جاراتقانعا.

                                                   بۇگىنگى مودادا...
–بۇگىنگى مودادا – ماسكا،– دەدى ايەلى.
– و، نەسى ەي، قالجىڭىنىڭ ءتۇرىن،– دەپ جاقتىرمادى كۇيەۋى.
– وتىرىك پا؟ قاراساڭشى تەلەديداردى. ءبارى بەتپەردە تاعىنعان – دەدى ايەلى.
– جەتىسكەننەن تاعىپ ءجۇر دەيسىڭ با؟ كوروناۆيرۋس جۇقپاسىن دەپ تا، – دەدى كۇيەۋى.
– ءيا، ءيا، سول ىندەت بولماسا ماسكانىڭ ادەمىلىگىن دە، قادىرىن دە تۇسىنبەۋىشى ەدىك. «ءيتتىڭ بوعى ءدارى بولسا داريانىڭ ار جاعىندا» دەگەن وسى دا، – دەدى ايەلى.
اينانىڭ الدىندا بەتىمەن ەمەس، ماسكاسىمەن الىسقان بيكەش، كۇيەۋىنە كۇلىمدەي قاراپ قويدى.
– قاراشى، شاشىمدى توبەمە تۇيسەم، مەدبيكەگە ۇقسايمىن. ال بەلىمە جىبەرسەم «قارعىس اتقىر» فيلمىندەگى الباستىعا اينالىپ كەتەم.
– سوندا دا سۇيكىمدىسىڭ، – دەدى كۇيەۋى.
– راس پا؟
–راس،– دەدى كۇيەۋى ەركەلەتكەن بوپ ەرنىن شوشايتىپ.
– «ادەمىلىك الەمدى قۇتقارادى»،– دەدى ءبىر يىعىن جالاڭاشتاپ،– ايەلى.
– ونى ايتقان دوستوەۆسكي وتتاپتى، – دەدى كۇيەۋى.
– قازىر كوشەگە كەۋدە، بوكسەڭدى جالاڭاشتاپ شىعۋ قىزىق ەمەس. بەتىڭدە بەتپەردەڭ بولماسا، – دەدى ايەلى.
قىزىل كوفتاسىنا قىزىل، جاسىلعا-جاسىل، كۇلگىنگە-كۇلگىن جاراساتىن بەتپەردەنى كەزەك اۋىستىرعان ايەلى اينا الدىندا «تاپتىم» دەدى.
–نەنى،– دەدى، كۇيەۋى.
– سومكە ورنىنا نە ۇستاپ ءجۇرۋدى،– دەدى ايەلى.
– مەنى ما؟– دەدى كۇيەۋى ەركەلەگەندەي ەرنىن شوشايتىپ.
– جىندىسىڭ با؟ سەنى ەرتىپ ءجۇرۋ مودا ەمەس. قازىر مودا – ماسكانى تاعىپ، قولىڭا ءبىر بۋكەت ارشا الىپ ءجۇرۋ،– دەدى ايەلى مۇرنىن تىرجيتىپ.

سەرىكجان مۋراسيلوۆ

پىكىرلەر
رەداكتسيا تاڭداۋى