شىمكەنتتەگى ناۋقاس ءۇشىن اۆتوبۋس جۇرگىزۋشىسى جازالانباق

3320

"نۇر-سۇلتان - شىمكەنت" باعىتىنداعى  اۆتوبۋسىنىڭ جۇرگىزۋشىسىن  كوروناۆيرۋس جۇقتىرعان ادامدى تاسىمالداعانى ءۇشىن  اكىمشىلىك جاۋاپكەرشىلىككە تارتادى، دەپ حابارلاي tengrinews.

"كارانتيننەن كەيىن اۆتوبۋس جۇرگىزۋشىسى اكىمشىلىك قۇقىق بۇزۋشىلىق تۋرالى كودەكستىڭ 571-بابىنا سايكەس جازالاناتىن بولادى. بۇل جولاۋشىلاردى تاسىمالداۋ ەرەجەلەرىن بۇزۋ بولىپ سانالادى. قازىر اتالعان اۆتوبۋستىڭ جۇرگىزۋشىسى كارانتيندە",-دەپ ءتۇسىندىردى تۇركىستان وبلىسى پوليتسيا دەپارتامەنتىنىڭ ءباسپاسوز قىزمەتى.

24 ناۋرىزدا شىمكەنتتە كوروناۆيرۋستىق ينفەكتسيانى جۇقتىرۋدىڭ العاشقى وقيعاسى انىقتالدى. ناۋقاس قالالىق جۇقپالى اۋرۋلار اۋرۋحاناسىنا جاتقىزىلدى. ەر ادام 20 ناۋرىز كۇنى حالىقارالىق اۆتوبۋسپەن نۇر-سۇلتاننان كەلگەن. قازىر وسى اۆتوبۋستىڭ 16 جولاۋشىسى ىزدەستىرىلۋدە.

25 ناۋرىزدا شىمكەنت قالاسىندا كوروناۆيرۋستىق ينفەكتسيانىڭ ەكىنشى وقيعاسى تىركەلدى. 1970 جىلى تۋعان ايەلدىڭ تالداۋلارى وڭ ناتيجە كورسەتتى. كەيىن شىمكەنت اۆتوۆوكزالدارىنىڭ جۇمىسىن توقتاتقانى بەلگىلى بولدى.

پىكىرلەر