قىتاي ەلشىسى: ۆيرۋس ەندى جايىلا باستاعاندا نەمەن اينالىستىڭىزدار؟

2803

قازاقستانداعى قىتاي ەلشىسى چجان سياو Facebook الەۋمەتتىك جەلىسىندە ورىس تىلىندە «سىزدەر ۆيرۋس ەندى جايىلا باستاعاندا نەمەن اينالىستىڭىزدار؟» دەگەن جازبا جاريالادى.

نەگىزىنەن، بۇل جازبانى ءبىر قاراعاندا ءبىزدىڭ ەلگە قاراتا جازعان سياقتى كورىنگەنىمەن، مۇنىڭ اقش-قا باعىتتالعانى انىق بايقالادى.

 قىتاي ەلشىسىنىڭ رەنىشكە تولى جازباسىن قازاق تىلىنە اۋدارعاندى ءجون كوردىك:

سىزدەر ۆيرۋس ەندى جايىلا باستاعاندا نەمەن اينالىستىڭىزدار؟ گەوساياسي ويىندارمەن، ىشكى ساياسي ماسەلەلەرمەن جانە قىتايدى قارالاۋدان باسقا.  قىتايلار  بۇكىل الەمگە جانە سىزدەرگە باعالى ءومىرىن بەرىپ جاتقاندا سىزدەر التىن ۋاقىتتارىڭىزدى بوسقا وتكىزدىڭىزدەر.

ءوز ەلدەرىڭىزدەگى دەنساۋلىق ساقتاۋ سالاسىنداعى شەنەۋنىكتەردىڭ ىندەتتىڭ الدىن الۋ جونىندەگى ەسكەرتۋلەرىن «جالعان» دەپ اتاپ، جاعدايدىڭ باقىلاۋدا ەكەندىگىن ايتتىڭىزدار. ال  قازىر ۆيرۋس شتاتتاردىڭ كوپشىلىگىن قامتىپ، 40-تان استام ادام قازا بولعان كەزدە، بورىكتى اسپانعا لاقتىرۋدى قويا سالىپ، بىردەن ابدىراپ قالدىڭىزدار.

سونىمەن بىرگە، ءوز عالىمدارىڭىز تۇماۋدان قايتىس بولعان ادامداردىڭ كوپشىلىگى شىن مانىسىندە كوروناۆيرۋستىڭ قۇرباندارى ەكەنىن وزدەرى راستادى، سوندىقتان، ءولىم-ءجىتىم سىزدەردە الدەقايدا كوبىرەك. سىزدەردىڭ ستاتيستيكالىق مالىمەتتەرىڭىزدە سۋ تىم كوپ. قانداي تۇنىقتىق تۋرالى ايتۋعا بولادى؟ سوندىقتان سىزدەرگە دەگەن سەنىمسىزدىك سەبەپسىز ەمەس.

پاندەميا ۆيرۋسىنا قارسى توتەنشە جاعدايلاردى قولدانىپ، ارامشوپتەردى جۇلىپ، تەسىكتەردى بىتەۋدىڭ ورىنىنا، ءسىز قىتايعا كىنانى ارتىپ، ۆيرۋستى قىتايدان شىقتى دەگەنىڭىز كۇلكىلى ءارى قاتە بولىپ شىقتى. اسىعىس تۇجىرىمدامالار ادامعا كۇمان كولەڭكەسىن تۋدىرادى.

ازىرگە ۆيرۋستىڭ قالاي پايدا بولعاندىعىن قويا تۇرايىق، ول جونىندە عالىمدار اينالىسادى جانە شىندىق ەرتە مە كەش پە اشىلادى. قازىرگى ۋاقىتتا، ءبىز بىرنەشە رەت ايتقانىمىزداي، بارلىق ەلدەر بىرىگىپ، ءبىر-بىرىنە جالا جاپپاي جانە جاۋاپكەرشىلىك جۇكتەمەستەن وسى ۆيرۋسپەن كۇرەسۋى كەرەك.

كىنا ارتۋدىڭ قاجەتى جوق. سىزدەردە ماسكالار، مەديتسينالىق قولعاپتار، تەست سىناقتارى مەن قاجەتتى جابدىقتار جەتىسپەيدى، سونىمەن قاتار، قور بيرجاسىنىڭ قۇلدىراۋى – بۇل دا قىتايدىڭ كىناسى مە؟ ءسىزدىڭ ءوز سايلاۋشىلارىڭىزدان جانە حالىقارالىق قاۋىمداستىقتان كوپتەگەن كۇماندى جاعدايلاردى جاسىرعاندىعىڭىزدى باتىلدىقپەن مويىندايتىن ۋاقىتىڭىز كەلدى.

الدىن الۋ شارالارىنا سالعىرت قاراۋ سالدارىنان ءسىز كوپ ۋاقىت جوعالتتىڭىز. وسى ماعىناسىز ويىنداردى جالعاستىرۋ جانە ۆيرۋستى ساياساتتاندىرۋ ەڭ ناشار جاعدايعا الىپ كەلەدى. ۆيرۋس قورقىنىشتى، ءتىپتى الەمدەگى ەڭ ۇلى دەرجاۆا ونىڭ الدىندا وسال. مىنانى ماڭگى ەستە ساقتاۋ قاجەت: سۋ ىشكەن قۇدىعىڭا تۇكىرمە...

دايىنداعان: جانسايا سمان،

«ادىرنا» ۇلتتىق پورتالى

پىكىرلەر