التى ايعا سوزىلعان 30 تومنان تۇراتىن ابىشەۆ پەن تۇكەەۆ ىسىنە بۇگىن نۇكتە قويىلدى. سوت ابىشەۆتى 5 جىلعا، تۇكەەۆتى 4 جىلعا باس بوستاندىعىنان ايىردى.
پروكۋرور سوت بارىسىندى ابىشەۆكە 11 جىل، تۇكەەۆكە 8 جىل سۇراعان.
«يسلام ابىشەۆ ۇزاق جىلدار بويى بۇرىنعى وڭتۇستىك قازاقستان وبلىسى اكىمىنىڭ ورىنباسارى بولعان. كەيىن وسكەمەن قالاسىنىڭ اكىمى قىزمەتىن اتقاردى. سونداي-اق ول مەملەكەتتىك ماراپاتتاردىڭ دا يەگەرى ەكەنىن ەسكەرىپ بەس جىلعا باس بوستاندىعىنان ايرىلدى»،-دەدى سۋديا.
سونداي-اق، سۋديا سەرىك تۇكەەۆتىڭ قازاق كۇرەسىنە سىڭىرگەن ەڭبەگىن، سپورت سالاسىنداعى جەتىستىكتەرىن ەسكەرىپ ءتورت جىلعا باس بوستاندىعىنان شەكتەلگەنىن قوسا ايتتى.
ەسكە سالساق، بىلتىر 16 ناۋرىزدا يسلام ابىشەۆ پەن «قازاق كۇرەسى دۇنيەجۇزىلىك فەدەراتسياسى» حالىقارالىق قوعامدىق بىرلەستىگىنىڭ ۆيتسە-پرەزيدەنتى سەرىك تۇكەەۆ مەردىگەر كومپانيادان 60 ملن تەڭگە پارا الۋعا وقتالعان دەگەن كۇدىكپەن ۋاقىتشا قاماۋعا الىنعان. ال 16 قىركۇيەكتە باس پروكۋراتۋرا اتالعان فاكتىنى راستاپ، ءىس سوتقا جولداندى.
بۇعان دەيىن، سوتتالۋشىلاردىڭ ادۆوكاتتارى سىبايلاس جەمقورلىققا قارسى ءىس-قيمىل اگەنتتىگى ي.ابىشەۆتىڭ تۋىستارىنا، سۋديالارعا جانە قورعاۋشىلاردىڭ وزدەرىنە قىسىم كورسەتىپ، سوت ناتيجەسىنە اسەر ەتكىسى كەلەتىنىن ايتقان بولاتىن.
سوتقا كەلۋشىلەر بۇل ۇكىمگە، «ادىلەتتىلىك جوق جەردە ءبارى كۇيرەيدى» دەپ نارازىلىق تانىتتى. ادۆوكاتتار سوت ۇكىمىمەن كەلىسپەيتىندەرىن العا تارتىپ، اپپەلياتسياعا بەرەتىندەرىن ايتتى.
