قارمتۋ-عا ءالىمحان ەرمەكتىڭ ەسىمى بەرىلۋى ءتيىس!

1676

قر ءبىلىم جانە عىلىم ءمينيسترى اسحات ايماعامبەتوۆتىڭ، قاراعاندى قالاسىنىڭ اكىمى نۇرلان ەرىكبايۇلىنىڭ، قاراعاندى مەملەكەتتىك تەحنيكالىق ۋنيۆەرسيتەتىنىڭ رەكتورى مارات كەڭەسۇلىنىڭ نازارىنا!

ءالىمحان ابەۋۇلى ەرمەك (1891 - 1970) — مەملەكەت جانە قوعام قايراتكەرى، قازاق اراسىنان تۇڭعىش ماتەماتيكا عىلىمىنىڭ پروفەسسورى اتاعىن العان، «ۇلى ماتەماتيكا كۋرسى» وقۋلىعىن جوعارعى تەحنيكالىق وقۋ ورىندارى مەن پەداگوگيكالىق ينستيتۋتتارعا ارناپ شىعارعان، قازاق اۆتونومياسى شەكاراسىنىڭ بىرتۇتاستىعىن جانقيارلىقپەن قورعاپ شىققان الاشورداشى ازامات. دارىنى اسقان ءبىلىمدى، اعىلشىن، نەمىس، فرانتسۋز، يتاليان تىلدەرىن جەتە بىلگەن شەشەن، وتكىر ءتىلدى، حالىققا قىزمەت ەتۋدى وزىنە پارىز ساناعان.
ءالىمحان ەرمەك 1924 -1925 جىلدارى سەمەي گۋبرەۆكوم اتقارۋ كوميتەتى مەن جوسپارلاۋ كوميتەتى توراعاسىنىڭ ورىنباسارى، 1925-1926 جىلدارى قازكسر مەملەكەتتىك جوسپارلاۋ كوميتەتى توراعاسىنىڭ ورىنباسارى، 1926 جىلى قازاق پەداگوگيكا ينستيتۋتىندا وقىتۋشى، جاراتىلىستانۋ-ماتەماتيكا فاكۋلتەتىنىڭ دەكانى، قازاق مەملەكەتتىك پەداگوگيكا ينستيتۋتىندا دوتسەنت، 1932-1935 جىلدارى قازاق مال دارىگەرلىك ينستيتۋتىندا دوتسەنت، پروفەسسور، كافەدرا مەڭگەرۋشىسى قىزمەتىن اتقاردى.

1935-1937 جىلدارى قازاق تاۋ-كەن، مەتاللۋرگيا ينستيتۋتىندا پروفەسسور، ماتەماتيكا جانە تەوريالىق مەحانيكا كافەدراسىنىڭ مەڭگەرۋشىسى، 1938 جىلى كۋيبىشەۆ جوسپارلاۋ ينستيتۋتىندا كافەدرا مەڭگەرۋشىسى، 1947-1948 جىلدارى شىمكەنت تەحنولوگيا ينستيتۋتى ماتەماتيكا كافەدراسىنىڭ مەڭگەرۋشىسى، 1955-1958 جىلدارى قاراعاندى تاۋ-كەن ينستيتۋتىنىڭ اعا وقىتۋشىسى بولدى. 1958 جىلدان كەيىن عىلىمي-پەداگوگتىك قىزمەتتەن ءبىرجولا شەتتەتىلدى. ال 1930-1932 جىلدارى الماتىدا 2 جىل تۇرمەدە وتىرىپ، 1938-1947 جىلدارى رەپرەسسياعا ۇشىراپ، كوپ ازاپ شەگەدى. 1948 جىلى قايتا قاماۋعا الىنىپ، 1955 جىلعا دەيىن تەمىر توردا وتىرادى. وسىلايشا ەل مەن جەرگە قىزمەت ەتىپ ءجۇرىپ، قايراتكەر 1970 جىلى قاراعاندى قالاسىندا دۇنيەدەن وزادى.
وسىعان وراي، ۇلتىمىزدىڭ اقىل-ويىن جاڭا ساپاعا كوتەرۋگە ولشەۋسىز ۇلەس قوسىپ، جاس ۇرپاقتىڭ ساناسىنا ءبىلىم ءدانىن سەپكەن ءالىمحان ەرمەكتىڭ كەلەسى جىلى كەلىپ جەتەر 130 جىلدىق مەرەيتويىنا وراي، قازاقستانداعى جوعارى بىلىكتى مامانداردى دايىندايتىن جەتەكشى وقۋ ورىندارىنىڭ ءبىرى، قاراعاندى مەملەكەتتىك تەحنيكالىق ۋنيۆەرسيتەتىنە ءالىمحان ەرمەكتىڭ ەسىمى بەرىلۋىن قر ءبىلىم جانە عىلىم ءمينيسترى اسحات ايماعامبەتوۆتان، قاراعاندى قالاسىنىڭ اكىمى نۇرلان ەرىكبايۇلىنان، قاراعاندى مەملەكەتتىك تەحنيكالىق ۋنيۆەرسيتەتىنىڭ رەكتورى مارات كەڭەسۇلىنان سۇرايمىز!

"ادىرنا" ۇلتتىق - ەتنوگرافيالىق بىرلەستىگىنىڭ ۇجىمى

پىكىرلەر
رەداكتسيا تاڭداۋى