باقىتتى وتباسى بولۋدىڭ قۇپياسى

1734

جۋرناليست بەيسەن قۇرانبەكتىڭ وتباسىلىق 7 قاعيداسى
(اسىرەسە، جاس وتاۋ يەلەرىنىڭ نازارىنا)
1) سىيلاستىق ءبىرىنشى كەزەكتە تۇرۋ كەرەك. «ۇيلەنگەن كۇننەن باستاپ مەنى «ءسىز» دەيسىڭ» — دەدىم. باستاپقىدا «ءسىز» دەگەنى قۇلاققا تۇرپىدەي ەستىلىپ، كۇلكىگە كومىلىپ قالعام. ون بەس جىلدان بەرى «ءسىز» دەگەن ءسوز وتباسىمىزدىڭ تاتۋلىعىنىڭ تىرەگىنە اينالدى. دوستارىمنىڭ ايەلدەرى بىرەۋى 5 جىلدان سوڭ، بىرەۋى 8 جىلدان سوڭ، بىرەۋى 10 جىلدان كەيىن كۇيەۋلەرىن «ءسىز» دەي باستادى. اناسى اكەسىن «ءسىز» دەپ سىيلاپ تۇرسا، بالا دا اكەسىن قۇرمەتتەيتىنىن ءتۇسىندى;
2) سەنىڭ اتا-اناڭ – مەنىڭ اتا-انام، مەنىڭ اتا-انام – سەنىڭ اتا-اناڭ. بالدىزىما اقىل ايتسام، تۋعان قارىنداسىما ايتقانداي ايتام، كەلىنشەگىم قاينىسىنا ۇرىسسا، تۋعان ىنىسىنە ۇرىسقانداي ۇرىسادى;
3) قانداي سىيلى قوناق كەلسە دە، ۇيىمىزگە ىشىمدىك كىرگىزبەيمىز;
4) بالالارىمىزدى مەكتەپكە دەيىن حان سياقتى سىيلايمىز، مەكتەپ كەزىندە شاكىرت سياقتى تاربيەلەيمىز، مەكتەپتەن سوڭ دوس سياقتى سىرلاس بولامىز، بىراق اقىل ايتپايمىز;
5) رەنجىسىپ قالساق، 5 مينۋتتان سوڭ سويلەسەمىز. «جاقسى ادامنىڭ اشۋى - ءشايى ورامال كەپكەنشە، جامان ادامنىڭ اشۋى - باسى جەرگە جەتكەنشە». بىرەۋىمىز قىلت ەتسەك، ەكىنشىمىز ۋاقىت ساناپ وتىرامىز;
6) ءبىزدىڭ ۇيدە ەر-ازامات ەسەپ بەرمەيدى، تەلەفون سوعىپ: «قايدا ءجۇرسىڭ؟ قاشان كەلەسىڭ؟» – دەگەن سۇراق قويىلمايدى. كەيبىر دوستارىمنىڭ ايەلدەرى تەلەفونمەن: «قايدا ءجۇرسىڭ قاڭعىرىپ؟» – دەپ جاتقانىن ەستىگەندە، تەلەفونى بولماعان ءبىزدىڭ اتا-بابالار نە دەگەن باقىتتى دەپ ويلايمىن;
7) ەشقاشان اجىراسپايمىز. ماعان ايەل تابىلادى، وعان كۇيەۋ تابىلار، ال بالالارعا بوتەن بىرەۋ اكە-شەشە بولا المايدى».
قوسساڭىزدار – قوسىڭىزدار، بىراق، ەشنارسە الماڭىزدار، ءبارى دە اۋاداي قاجەت قاعيدا. اسىرەسە، ءبىرىنشىسى. ويتكەنى، ءسال ءوسىرىپ ايتار بولساق، ماحاببات – ۇيلەنگەنگە دەيىن، ۇيلەنگەننەن كەيىن الدىڭعى ورىنعا سىيلاستىق شىعادى، ورىستار بەكەر «مولودىم سوۆەت دا ليۋبوۆ!» دەمەيدى. ءبىرىن-ءبىرى تۇسىنە ءبىلۋ، تۇسىنۋگە تىرىسۋ، سونىڭ ارقاسىندا ءبىرىڭدى ءبىرىڭ ايتپاي، كوزدىڭ قاراسىنان، قاباقتىڭ قاعىسىنان ۇعىنۋ; كەڭشىلىك، كەمشىلىككە كەڭشىلىكپەن قاراۋ; «مەن – كۇيەۋىمىن!» دەمەي، «مەن – ايەلىمىن، ول مەنى الاقانىنا سالۋى كەرەك!» دەمەي، كىشىرەيۋگە دايىن تۇرۋ; سىرتقا، ەرەگىسكەن دۇشپانعا كورسەتەر كىسىلىكتى ءوز ۇيىڭە ىستەمەۋ; كۇيەۋى «جىگىت جاقسىسى تۇزدە – مىرزا، ۇيدە – قۇل» ەكەنىن ەسىنەن شىعارماۋى، كەلىنشەگى «كۇيەۋ – ايەلدىڭ ءپىرى، اتا – بالانىڭ ءپىرى» ەكەنىن ۇنەمى جادىندا تۇتۋى، قىسقاشا ايتقاندا، مىنە، وسىلار، مەن ءوزىم بۇگىنگى زاماندا العاشقى 3 جىلدان 5 جىلعا دەيىن سوزىلاتىن جاس جۇبايلاردىڭ «وبكاتكا» كەزەڭىندە قۇدايدىڭ بۇيرىعىنداي مۇلتىكسىز ورىندالۋى ءتيىس دەپ بىلەمىن، سوندا عانا بىرلىگى مىزعىماس باقىتتى وتباسى قۇرالادى.

 

 (ومىرزاق اقجىگىتتىڭ فەيسبۋك پاراقشاسىنان الىندى)

"ادىرنا" ۇلتتىق پورتالى

پىكىرلەر
رەداكتسيا تاڭداۋى