"تۋعان جەرىم – قازاقستانىم" پوەزيالىق بايقاۋى ءوز مارەسىنە جەتتى

296

قر اقپارات جانە قوعامدىق دامۋ مينيسترلىگى تاپسىرىسىمەن ازاماتتىق باستامالاردى قولداۋ ورتالىعىنىڭ ( CISC) گرانتتىق جوباسى اياسىندا «ادىرنا» ۇلتتىق-ەتنوگرافيالىق بىرلەستىگى» سولتۇستىك قازاقستان، پاۆلودار، قوستاناي جانە اقمولا وبلىستارىنداعى وزگە ۇلت وكىلدەرىنىڭ جاستارى اراسىندا قازاقستان حالقى اسسامبلەياسى ارقىلى پوەزيالىق بايقاۋ ۇيىمداستىردى. "تۋعان جەرىم – قازاقستانىم" اتتى پوەزيالىق بايقاۋعا 14-29 جاس ارالىعىنداعى جاس وزگە ۇلت وكىلدەرى قازاق اقىندارىنىڭ ەل مەن جەر، وتان تاقىرىبىنداعى پاتريوتتىق ولەڭدەرىن مانەرلەپ وقىپ، ءوزارا باسەكەگە ءتۇستى.
العاشقى بايقاۋ 4-قاراشا كۇنى قوستاناي وبلىستىق قازاقستان حالقى اسسامبلەياسىمەن بىرلەسىپ، وزگە ۇلت وكىلدەرى اراسىندا ۇيىمداستىرىلدى. 20-عا جۋىق وزگە ۇلت وكىلدەرى قاتىسىپ، ولاردىڭ باسىم بولىگى ورىس ۇلتى بولسا، وزگەلەرى ارميان، ءازىربايجان، مولداۆان، كارىس جانە تاعى باسقا ۇلت وكىلدەرى ونەر كورسەتتى. قازىلار القاسى بولىپ پروفەسسور، فيلوسوفيا عىلىمدارىنىڭ كانديداتى، وبلىستىق قازاقستان حالقى اسسامبلەياسىنىڭ مۇشەسى جاقىپ قالقامان حاسەنۇلى، وبلىستىق «قوستاناي تاڭى» گازەتىنىڭ ءتىلشىسى دوسجانوۆا قىمبات مۇراتبەكقىزى، قوستاناي وبلىسى اكىمدىگىنىڭ «قوعامدىق كەلىسىم» كمم ءبولىم باسشىسى تىنىشتىقوۆا بايان تالعاتقىزى تاعايىندالدى. جەرگىلىكتى ءار ءتۇرلى ەتنوس وكىلدەرى قازاق ءتىلىن مەڭگەرگەندەرىن دالەلدەپ، كوپشىلىك ورتادا ونەر كورسەتتى. بايقاۋ قورىتىندىسى بويىنشا 1-ورىندى قوستاناي وبلىسى، مايكول ورتا مەكتەبىنەن كەلگەن تامارا مناتساكانيان، 2-ورىندى قوستاناي قالاسىنان كەلگەن انەل پيميچەۆا، 3-ورىندى قوستاناي وبلىسى، قارابالىق اۋدانىنان كراۆتسوۆا ماريا يەلەندى. جەڭىمپازدار اقشالاي سىيلىقتارمەن، ديپلومدارمەن ماراپاتتالدى.

 


قاراشانىڭ 6-كۇنى جالعاسىن تاپقان بايقاۋ اقمولا وبلىستىق قازاقستان حالقى اسسامبلەياسىمەن بىرلەسىپ ۇيىمداستىرىلدى. قاتىسۋشىلار اقمولا وبلىسىنىڭ تۇكپىر-تۇكپىرىنەن جانە كوكشەتاۋ قالاسىنان ارنايى كەلىپ باسەكەگە ءتۇستى. 20-دان استام قاتىسۋشى باق سىنادى. ساكەن سەيفۋللين، قاسىم امانجولوۆتاردان باستاپ بۇگىنگى مارالتاي، قالقاماندارعا دەيىنگى كوپتەگەن اقىنداردىڭ شوقتىقتى شىعارمالارى وقىلدى. جاستار ءبىر-بىرىنەن اسىپ تۇسۋگە تىرىسىپ، تاماشا ونەر كورسەتتى. وندا ءبىرجان سال اتىنداعى مۋزىكالىق كوللەدجدىڭ ستۋدەنتتەرى حالىق اندەرى مەن كۇيلەرىن ورىنداپ، كورەرمەن قاۋىمدى ۇلتتىق مۋزىكا جاۋhارلارىمەن سۋسىنداتتى. ادەبيەت زەرتتەۋشىسى، اقىن ەربولات باياتۇلى، وبلىستىق "ارقا اجارى" باسىلىمىنىڭ ءجۋرناليستى اسىلاي ايجاريحوۆا، اقان سەرى اتىنداعى جوعارى مادەنيەت كوللەدجىنىڭ وقىتۋشىسى تالشىن مولداعالي ءتارىزدى كاسىبي ماماندار قازىلار القاسىنىڭ قۇرامىندا تورەلىك جاسادى. بايقاۋ ناتيجەسىندە سوكولوۆا انجەليكا 1-ورىن، بابەنكو اناستاسيا 2-ورىن، سميرنوۆا تاتيانا 3-ورىن يەگەرى اتاندى. جەڭىمپازدار اقشالاي سىيلىقتارمەن، ديپلومدارمەن ماراپاتتالدى. ءىس-شاراعا قولداۋ كورسەتكەن اقمولا وبلىستىق ىشكى ساياسات باسقارماسىنا، ءبىرجان سال اتىنداعى مۋزىكالىق كوللەدج ديرەكتورى سايان مۇحامەديارعا، وڭىرلىك باق وكىلدەرىنە، قازىلار القاسىنا شەكسىز العىس ايتامىز!


قوستاناي، اقمولا وبلىستارىندا باستاۋ العان "تۋعان جەرىم– قازاقستانىم" اتتى پوەزيالىق بايقاۋ سولتۇستىك قازاقستان وبلىسىندا 10-قاراشا كۇنى ءوز جالعاسىن تاپتى. ايماقتىق ۇيىمداستىرۋشىلاردىڭ بەلسەندىلىگى بىرىنەن ءبىرى اسىپ ءتۇسىپ، ءىس-شارالار بارعان سايىن ءماندى دە، مازمۇندى، ءسان-سالتاناتى دا جوعارى دەڭگەيگە كوتەرىلە تۇسكەندەي. قىزىلجار قالاسىنداعى دوستىق ۇيىندە «ادىرنا» ۇلتتىق-ەتنوگرافيالىق بىرلەستىگى» مەن قازاقستان حالقى اسسامبلەياسىنىڭ سولتۇستىك قازاقستان وبلىستىق بولىمشەسى بىرلەسە وتىرىپ جوعارىدا اتالعان بايقاۋدى جوعارى دەڭگەيدە جۇزەگە اسىردى. بايقاۋعا ورىس، پولياك، ۋكراين، نەمىس، تۇرىك، ارميان جانە تاعى باسقا ۇلت وكىلدەرى قاتىستى. 13 جاس قاتىسۋشى بايقاۋدا باق سىناپ، ۇزدىك شىعۋعا بارىن سالىپ پاتريوتتىق شىعارمالاردى وقىدى. وندا اباي قۇنانبايۇلىنىڭ، ماعجان جۇمابايدىڭ، ساكەن سەيفۋلليننىڭ، قاسىم امانجولدىڭ، فاريزا وڭعارسىننىڭ جانە تاعى باسقا قازاقتىڭ كورنەكتى اقىندارىنىڭ ولەڭدەرى وقىلدى. ءتىپتى ساحنالىق قويىلىممەن ولەڭ وقىعان جاستار دا كەزدەستى. ارنايى ۆيدەو-روليك جاساپ، فونعا مۋزىكا قامداپ، قازاق باتىرىنىڭ، حانشايىمنىڭ كيىمىن كيىپ ەرەكشە دايىندالعان. وعان قوسا، ۇلكەن زال كىسىلەرگە لىق تولىپ، قاتىسۋشىلارعا بارىنشا قوشەمەت كورسەتىپ، بەلسەندىلىك تانىتىپ، شابىتتاندىرا ءتۇستى. سولتۇستىك قازاقستانداعى ايماقتىق ۇيىمداستىرۋشىلارىمىز ماريا پەترقىزى مەن دينارا بالعابايقىزىنا، وڭىرلىك باق وكىلدەرىنە مىڭ دا ءبىر العىس ايتامىز!
قاراشا ايىنىڭ 12-كۇنى «ادىرنا» ۇلتتىق-ەتنوگرافيالىق بىرلەستىگى» مەن پاۆلودار وبلىستىق قازاقستان حالقى اسسامبلەياسىنىڭ ۇيىمداستىرۋىمەن «تۋعان جەرىم – قازاقستانىم» اتتى پوەزيالىق شىعارمالاردى كوركەمسوز وقۋ بويىنشا بايقاۋى ءوتتى. بايقاۋدىڭ نەگىزگى ماقساتى – قازاقستانداعى ەتنوس وكىلدەرىن ەلىمىزدىڭ پاتريوتى بولۋعا باۋلۋ. قاتىسۋشىلار قازاق اقىندارىنىڭ ەل مەن جەر، وتان تاقىرىبىنداعى پاتريوتتىق ولەڭدەرىن مانەرلەپ وقىپ، ءوزارا باسەكەگە ءتۇستى. بايقاۋ قورىتىندىسى بويىنشا، 1 ورىن - سەمەنوۆا الەكساندراعا، 2 ورىن - ونيانوۆ تيمۋرعا، 3 ورىن - سەيسەكينا ۆالەرياعا بۇيىردى. جەڭىمپازدار اقشالاي سىيلىقتارمەن جانە ديپلومدارمەن ماراپاتتالدى. پاۆلودار وبلىسىنداعى ۇيىمداستىرۋشىمىز اقەرتىس سولتانباەۆقا، ونىڭ كومەكشىسى مارجان تەمىروۆاعا، س.تورايعىروۆ اتىنداعى پاۆلودار مەملەكەتتىك ۋنيۆەرسيتەتىنىڭ پروفەسسورى سەرىك ەلىكباي باستاعان قازىلار القاسىنا، وڭىرلىك باق وكىلدەرىنە شەكسىز العىس ايتامىز!

"ادىرنا" ۇلتتىق پورتالى

پىكىرلەر