سولتۇستىك قازاقستاندا وزگە ۇلت وكىلدەرى قازاقشا ولەڭ وقىدى

253

قر اقپارات جانە قوعامدىق دامۋ مينيسترلىگىءنىڭ قولداۋىمەن ازاماتتىق باستامالاردى قولداۋ ورتالىعىنىڭ ( CISC ) "تۋعان جەر" گرانتتىق جوباسى بويىنشا ادىرنا - ۇلتتىق-ەتنوگرافيالىق بىرلەستىگى "تۋعان جەرىم - قازاقستانىم" اتتى بايقاۋىن ەلىمىزدىڭ سولتۇستىك وڭىرلەرىندە وتكىزىپ جاتقان جايى بار. قىزىلجار قالاسىنداعى دوستىق ۇيىندە "ادىرنا" ۇلتتىق-ەتنوگرافيالىق بىرلەستىگى مەن قازاقستان حالقى اسسامبلەياسىنىڭ سولتۇستىك قازاقستان وبلىستىق بولىمشەسى بىرلەسە وتىرىپ جوعارىدا اتالعان بايقاۋدى جوعارى دەڭگەيدە جۇزەگە اسىردى.

 


بايقاۋعا ورىس، پولياك، ۋكراين، نەمىس، تۇرىك، ارميان جانە تاعى باسقا ۇلت وكىلدەرى قاتىستى. 13 جاس قاتىسۋشى بايقاۋدا باق سىناپ، ۇزدىك شىعۋعا بارىن سالىپ پاتريوتتىق شىعارمالاردى وقىدى.

 


وندا ابايدىڭ، ماعجان جۇمابايدىڭ، ساكەن سەيفۋلليننىڭ، قاسىم امانجولدىڭ، فاريزا وڭعارسىننىڭ جانە تاعى باسقا قازاقتىڭ كورنەكتى اقىندارىنىڭ ولەڭدەرى وقىلدى. ءتىپتى ساحنالىق قويىلىممەن ولەڭ وقىعان جاستار دا كەزدەستى. ارنايى ۆيدەو-روليك جاساپ، فونعا مۋزىكا قامداپ، قازاق باتىرىنىڭ، حانشايىمنىڭ كيىمىن كيىپ ەرەكشە دايىندالعان ەكەن. وعان قوسا، ۇلكەن زال كىسىلەرگە لىق تولىپ وتىردى، ولار قاتىسۋشىلارعا بارىنشا قوشامەت كورسەتىپ، بەلسەندىلىك تانىتىپ، شابىتتاندىرا ءتۇستى.

سولتۇستىك قازاقستانداعى ايماقتىق ۇيىمداستىرۋشىلارىمىز ماريا پەترقىزى مەن دينارا بالعابايقىزىنا، وڭىرلىك باق وكىلدەرىنە مىڭ دا ءبىر العىس ايتامىز!

 

 

"ادىرنا" ۇلتتىق پورتالى

پىكىرلەر