جامبىلدىقتار 2023 جىلى تولىق اۋىز سۋمەن قامتىلادى

1240

«وڭىرلەردى دامىتۋ – 2020» باعدارلاماسى اياسىندا ەلدى مەكەندەردى اۋىز سۋمەن قامتاماسىز ەتۋ ءساتتى جۇزەگە اسىرىلىپ جاتىر. اتالعان باعدارلامانىڭ ارقاسىندا 2025 جىلعا دەيىن قالالار 100 پايىز، ەلدى مەكەندەر 80 پايىزعا اۋىز سۋمەن قامتىلماق.  جالپى «وڭىرلەردى دامىتۋ» باعدارلاماسى اياسىندا 400 جوبا جۇزەگە اسىرىلىپ، 23 مىڭ شاقىرىم سۋ قۇبىرى تارتىلدى.

ال جامبىل وبلىسىنداعى ەلدى مەكەندەردىڭ بارلىعى الداعى ءۇش جىلدا تازا اۋىز سۋمەن قامتىلادى. وبلىستىق ەنەرگەتيكا جانە تۇرعىن-ءۇي كوممۋنالدىق شارۋاشىلىعى باسقارماسىنىڭ باسشىسى نۇرلان الدامجاروۆتىڭ ايتۋىنشا، بۇل باعىتتاعى جۇمىستار كەزەڭ-كەزەڭىمەن جۇزەگە اسپاق. سونداي-اق ول وڭىردەگى 377 ەلدى مەكەننىڭ 55 پايىزى ورتالىقتاندىرىلعان اۋىز سۋمەن قامتىلعانىن تىلگە تيەك ەتتى.

«2023 جىلعا دەيىن تىرشىلىك نارىمەن وبلىس تۇرعىندارىن 100 پايىز قامتۋ جوسپارلانىپ وتىر. قازىرگى تاڭدا وبلىستاعى 205 ەلدى مەكەن ورتالىقتاندىرىلعان اۋىز سۋعا قوسىلعان. دەگەنمەن، تەكسەرۋ بارىسىندا ونداعى 129 مىڭنان اسا حالىقتىڭ تازا اۋىز جۇيەسىنە ءالى كۇنگە قوسىلماعانى انىقتالدى. وسى ورايدا جۇرگىزىلگەن جۇمىستار ناتيجەسىندە بۇگىنگە دەيىن 81 مىڭنان اسا حالىق اۋىز سۋعا قول جەتكىزسە، اعىمداعى جىل سوڭىنا دەيىن بۇل كورسەتكىش 105 مىڭعا جەتپەك. قازىرگى تاڭدا 10 ەلدى مەكەنگە جاڭادان سۋ قۇبىرىن تارتۋ جۇمىستارى جۇرگىزىلۋدە. كەلەر جىلى – 18, 2021 جىلى – 41, 2022 جىلى 47 ەلدى مەكەنگە سۋ تارتۋ شارالارى جوسپارلانعان. سونداي-اق، حالىق سانى 200-گە دەيىنگى 49 ەلدى مەكەندى وبلىستىق بيۋدجەت نەگىزىندە بىرىڭعاي وپەراتور قۇرۋ ارقىلى اۋىز سۋمەن قامتۋ شارالارى ۇيىمداستىرىلاتىن بولادى»، – دەيدى ن.الدامجاروۆ.

2021 جىلى تاراز جانە شۋ قالالارىنىڭ تۇرعىندارىن تولىقتاي ورتالىقتاندىرىلعان اۋىز سۋمەن قامتۋ جوسپارلانعان. قالا جانە اۋدان باسشىلارى قامتىلماعان القابتارعا جوبالار ازىرلەپ، وسى ناتيجەگە قول جەتكىزۋ ءۇشىن جۇمىستاردى ۇيىمداستىرۋلارى قاجەت.

جالپى «وڭىرلەردى دامىتۋ – 2020» باعدارلاماسى اياسىندا جامبىل وبلىسىنىڭ اۋىل-ايماقتارىن اۋىزسۋمەن قامتاماسىز ەتۋ قارقىندى تۇردە جۇرگىزىلىپ كەلەدى. مىسالى وتكەن جىلى جوسپارلانعان اۋىز سۋمەن قامتۋعا 10 نىسان پايدالانۋعا بەرىلدى. ناقتىراق ايتساق،  جامبىل اۋدانى – پريگورودنوە جانە توعىزتاراۋ اۋىلدارى، قورداي اۋدانى – اۋحاتتى اۋىلى، تالاس اۋدانى – قىزىلاۋىت، بايزاق اۋدانى – كەنەس، اباي، مىرزاتاي، تەگىستىك اۋىلدارى. ت.رىسقۇلوۆ اۋدانى- لۋگوۆوە، شۋ اۋدانى – قوناەۆ اۋىلى.

«ادىرنا»

ۇلتتىق پورتالى

 

پىكىرلەر
رەداكتسيا تاڭداۋى