ەندى توي تۇنگى 12-دە اياقتالۋى ءتيىس

254

جامبىل وبلىسىندا ەندى توي كەشكى ساعات جەتىدە باستالىپ، تۇنگى ون ەكىدە اياقتالۋى ءتيىس. بۇل ەرەجەنى وبلىستاعى زيالى قاۋىم وكىلدەرى ۇسىنىپتى. بۇل ويدى قالا ازاماتتارىنىڭ باسىم بولىگى جاپپاي قولداعان، دەپ حابارلايدى adyrna.kz ۇلتتىق پورتالى 31 ارنانىڭ "ينفورمبيۋرو" جاڭالىقتارىنداعى مالىمەتتەردى نەگىزگە الا وتىرىپ.

 

 

جامبىلدىقتار تويعا شەكتەۋ قويىپ جاتقان بيلىككە نارازى. ايتۋلارىنشا، جەتىدە جۇمىستان شىعىپ، ۇيلەرىنە بارىپ، دايىندىق جاساپ، مەيرامحاناعا كەلگەنشە توي اياقتالىپ قالادى. ول ازداي، تويدى ۋاقىتىنان اسىرىپ جىبەرگەنى ءۇشىن ايىپپۇل ارقالاۋ مۇلدەم اقىلعا سىيمايدى دەيدى حالىق.

توي كەشكى جەتىدە باستالىپ، ون ەكىدە اياقتالادى دەگەن دەگەن ءسوز Whatsapp جەلىسى ارقىلى تاراعان. قازىر ەلدە جوق جاڭا ەرەجە جايلى جامبىلدىقتاردىڭ باسىم بولىگى ەستىپ ۇلگەرگەن. الايدا، ولاردىڭ پىكىرى ەكى جاققا ءبولىندى. ءبىرى بۇل زاڭعا قارسىلىعىن ايتىپ، ۇسىنىستى قولداعان بيلىكتى جازعىرسا، ەكىنشىلەرى حالىق تويعا ۋاقىتىلى كەلەتىن بولدى دەپ قۋانىپ وتىر.

ماسەلەن، ادەتتە توي كەشكى 7-گە بەلگىلەنەدى. ول ۋاقىتتا شاقىرىلعان قوناقتار جۇمىستارىنان ەندى شىعىپ جاتادى. ولار دايىندالىپ، تويعا كەلەم دەگەنشە بىرنەشە ساعات وتەتىنى وتىرىك ەمەس. ال، ەرتەرەك كەلگەن ەل جاس جۇبايلاردى نەمەسە توي يەلەرىن ساعاتتاپ كۇتىپ وتىرادى. قوناقتار تولىق جينالعانشا ساعات ون بولادى.

بۇل ۇسىنىس وتكەن ايدا «ەلدىك ەلگە بايلانىستى» اتتى قوعامدىق فورۋمدا ايتىلىپتى. وعان جيىنعا جيىلعان جۇرت جاپپاي قولداۋ بىلدىرگەن. سوندىقتان، جەرگىلىكتى بيلىك وكىلدەرى اسابالار مەن مەيرامحانا باسشىلارىن شاقىرىپ، ءتۇسىندىرۋ جۇمىستارىن جۇرگىزىپ جاتىر ەكەن. ال بەرىلگەن ۋاقىتتا توي بىتپەسە، جارىق ءسوندىرىلىپ، اسابا مەن توي يەلەرى ايىپپۇل ارقالايدى دەگەن بوس اڭگىمە دەيدى. ايتۋلارىنشا، ول الەۋمەتتىك جەلىدە تاراعان جالعان اقپارات ەكەن.

«مەيرامحانادا جۇمىس ىستەيتىن ازاماتتار بار. سولاردىڭ كوبىسى، 80-90 پايىزى وقۋ ورىندارىنىڭ بىلىمگەرلەرى. ولار، مىسالى، ەرتەڭىنە ساباققا بارۋلارى كەرەك. ادەتتە، توي ەكى-ۇشتە بىتەدى. تويدان كەيىن مەيرامحانانى جيناپ، ۇيىنە قايتقانشا ساعات تاڭعى بەس-التى بولادى»، - دەدى تاراز قالاسى اكىمىنىڭ ورىنباسارى كەنجەبەك ولجاباي.

اكىمدىك وكىلدەرى بۇل ەلدىڭ قۋانىشىن قىزعانۋ ەمەس، داڭعازالىق پەن داراقىلىقتى بولدىرماۋدىڭ امالى دەپ سەندىرەدى. سوزدەرىنشە، ولار اسابالاردان بولەك، يمامداردى دا جيىپ، قازادا جىرتىس تاراتىپ، داستارقان جايۋجايىندا دا اقىلداسقان. ال ەشبىر ەلدە جوق ەرەجەگە باعىنۋ نە باعىنباۋ ەلدىڭ ءوز ەركىندە.

پىكىرلەر