جاس كاسىپكەر: كومپانيامدى الەمدەگى ەڭ مىقتى 5 كومپانيانىڭ ءبىرى ەتكىم كەلەدى

176

ايبەك المۇحامەتوۆ – جاس كاسىپكەر.  24 جاستا. سۋلەيمەن دەميرەل ۋنيۆەرسيتەتىن تامامداعان. ماماندىعى – Information and Computer sciencە. AV Software  IT كومپانياسىنىڭ نەگىزىن قالاۋشى ءارى باس ديرەكتورى.

«BAI BOL, QAZAQ» جۋرنالى جاس كاسىپكەردەن سۇحبات الىپ، وقىرمان نازارىنا ۇسىنىپ وتىر. 

 

– ايبەك مىرزا، اڭگىمەمىزدى بيزنەسكە كەلۋىڭىزدەن باستاساق. بيزنەسكە قالاي كەلدىڭىز؟

–  2014 جىلى بيزنەسكە العاشقى قادامىمدى جاسادىم. ول كەزدە سۇلەيمەن دەميرەل ۋنيۆەرسيتەتىنىڭ ەكىنشى كۋرس ستۋدەنتى ەدىم. ءبىز ءۇش جىگىت بىرىگىپ، بيزنەسپەن اينالىسپاق بولىپ، قازىرگى IT كومپانيامىزدى قۇردىق. العاشقى كاپيتالىمىز 500 مىڭ تەڭگەنىڭ اينالاسىندا عانا بولدى. كومپانيا قۇرۋ يدەياسى تۋعاننان كەيىن ءبىز قاراپ وتىرماي بىردەن ىسكە كىرىستىك. بۇل كومپانيانى ءۇش جىگىت بىرىگىپ اشقاندىقتان دا ءار جوبادان تاپقان قارجىمىزدى ۇشكە بولەتىن ەدىك. وسىلاي اقىرىن-اقىرىن جۇمىس ىلگەرى جۇرە باستادى. بىراق، كومپانيانى بىرگە قۇرعان ول جىگىتتەر قازىر بولەك كەتتى. ءبىرى – ەۋروپادا، ەكىنشىسى – قازاقستانداعى باسقا ءبىر كومپانيادا ءونىمدى جۇمىس ىستەپ جاتىر. ياعني، قازىر AV Software  IT كومپانياسىنىڭ يەسى مەن عانامىن. بارلىق مەنشىك ءوز اتىمدا.

–  كومپانيا قۇرۋعا نە تۇرتكى بولدى؟

–   باستى سەبەپ، ءوزىمىزدىڭ العان ءبىلىمىمىزدى كورسەتىپ، قولىمىزدان ءىس كەلەتىنىن دالەلدەگىمىز كەلدى. ياعني، مامان رەتىندە ءوزىمىز اشۋدى قالادىق. ەكىنشى سەبەپ، 2014 جىلى «مەملەكەتتىك تەندەرلەرگە قاتىسۋ ءۇشىن كومپانيانىڭ كەم دەگەندە ەكى جىلدىق جۇمىس ءوتىلى بولۋى كەرەك» دەگەن زاڭ قابىلداندى. ءبىز وسى زاڭدى نەگىزگە الىپ، 2014 جىلى كومپانيا اشساق، 2016 جىلى ۋنيۆەرسيتەت بىتىرگەن كەزدە بىردەن كومپانيا جۇمىسىن باستاپ كەتەمىز دەگەن ارمانىمىز بولدى. الايدا، 2015 جىلى ول زاڭدى الىپ تاستادى (كۇلدى). سوندا دا كومپانيا جۇمىسىن جۇرگىزە بەردىك. جۇمىستى ساباقپەن بىرگە الىپ ءجۇرۋ قيىن بولمادى. سەبەبى، ءبىز ول كەزدە بۇل جۇمىسقا ۋاقىتىمىزدىڭ تەك 20 پايىزىن ارنايتىن ەدىك. ياعني، كومپانيا  موبيلدى قوسىمشالار عانا جاسايتىن. سەبەبى 2014 جىلى ءموبيلدى قوسىمشاعا سۇرانىس وتە جوعارى بولدى. ءبىر جىلدىق تابىسىمىز 1 -1.5 ميلليون  تەڭگە ارالىعىندا ەدى. بۇل ەكىنشى كۋرس ستۋدەنتتەرىنە از اقشا ەمەس سەكىلدى.

–   كومپانيا قۇرعاندا ءالى جاسسىزدار عوي. سىزدەردە مەنتور، ياعني جول كورسەتىپ كومەكتەسكەن ازاماتتار بولدى ما؟  

–  مەنتور بولدى دەپ ايتا المايمىن. كومپانيانى ءوزىمىز اشىپ، بارلىق جۇمىستى ءوزىمىز جۇرگىزدىك. دەسە دە، جالپى كومەكتى ۋنيۆەرسيتەت كورسەتتى. بىزگە ارنايى كابينەت بەردى.  جيھازدارىمىزدى ساتىپ الىپ، سول كابينەتتە وتىرىپ جۇمىسىمىزدى باستادىق. ەڭ العاشقى ءوفيسىمىز سدۋ- دىڭ ىشىندە بولدى.  قازىرگى ۋاقىتتا ءبىز وتىرعان سول ءبىر كەڭسە «سدۋ تەحنوپاركى» دەپ اتالادى.

–  قانداي جۇمىس باستاساڭىز دا كەدەرگى بولارى ءسوزسىز. كومپانيا اشقاننان كەيىن قانداي قيىنشىلىقتار بولدى؟

–  باستاپقى كەزدە قيىنشىلىقتار كوپ بولدى.  قازىر ونىڭ ءبارى كىشكەنتاي كەدەرگىلەر سياقتى كورىنەدى. بىراق سول ۋاقىتتا بىزگە قيىن بولعان ەدى. كومپانيانىڭ كىرىسى وسكەن سايىن قيىندىقتار دا كوبەيە بەردى. قازىر 2014-2015 جىلعى پروبلەمالارىمىزعا قاراسام،  ول وپ-وڭاي شەشىلەتىن ماسەلەلەر سياقتى كورىنەدى. بىراق، سول ۋاقىتتا ءبىز ءۇشىن ۇلكەن پروبلەما بولىپ ەسەپتەلدى. ماسەلەن، جوبا مەنەدجمەنتتەن  (project management) ءبىلىمىمىز تاياز بولدى. جوبانى قالاي تاپسىرۋ قاجەت، تەستتەن قالاي ءوتۋ كەرەكتىگىن بىلمەدىك. ءبىر جوبانى ءۇش ايدا ءبىتىرۋىمىز قاجەت بولسا، ءبىز توعىز اي جاسادىق. وسىنداي كەدەرگىلەر كەزدەسەتىن. دەگەنمەن ول كەزدە ستۋدەنت ەدىك قوي. تاجىريبەمىز دە از. بىراق قازىرگى ۋاقىتتا سول كەزدە ۇيرەنگەنىمىز بىزگە جاقسى كومەكتەسىپ جاتىر.

–  كومپانيالارىڭىزدىڭ قۇرىلعانىنا بەس جىلداي ۋاقىت بولىپتى. نارىققا شىقتىق دەپ اۋىز تولتىرىپ، سەنىمدى تۇردە ايتا الاسىزدار ما؟

–  ارينە. ءبىزدىڭ كومپانيادا بۇگىندە 30 استام قىزمەتكەر جۇمىس ىستەيدى. كىرىسىمىز دە كوپ ءوستى. ستارتاپ كومپانيالار سياقتى پروبلەمالارىمىز جوق. سونداي-اق، ەلۋدەن  استام جوبانى جاساپ، قولدانىسقا بەردىك. ءتىپتى، قازىر ءبىزدىڭ كومپانيانىڭ قول استىنا قارايتىن ەنشىلەس كومپانيالار دا بار. بۇگىنگى كۇنى قازاقستان بويىنشا كەيبىر سالالاردا  توپ-1 كومپانيا بولىپ ەسەپتەلەمىز. الايدا الدىعا ۇلكەن ماقسات قويعان كومپانيا رەتىندە بىزگە مۇنىڭ ءبارى ازدىق ەتەدى. ءبىزدىڭ باستى ماقساتىمىز – قازاقستان نارىعىندا قالىپ قالماۋ. ءبىز قازاقستاندىق كومپانيالارمەن باسەكەگە تۇسكىمىز كەلمەيدى. ءبىز جان-جاقتى دامىپ، شەتەلدىڭ ايتۋلى كومپانيالارمەن باسەكەلەسكىمىز كەلەدى.  بىزدىڭ كليەنتتەر قاتارىندا   «كازاگرو»، «سامرۇق-قازىنا»، «قازمۇنايگاز»، «قازاقتەلەكوم»، كاتار مەملەكەتى  ماسكەۋدىڭ كەيبىر كومپانيالارى، نارحوز ۋنيۆەرسيتەتى، سدۋ  جانە ت.ب. بار. بۇل كليەنتتەر قاتارى الداعى ۋاقىتتا ارتا تۇسەرىنە سەنەمىن.

–  كومپانياڭىز ءىت سالاسىنىڭ قاي باعىتىنا باسىمدىق بەرىپ وتىر؟

–  بىز AI, ياعني جاساندى ينتەللەكت، Machine learning, AR جانە VR باعىتتارىنا دەن  قويىپ وتىرمىز. وسى باعىتتا جاساعان ءبىر عانا ءونىمدى ايتايىن. ماسەلەن، ءسىز جاڭا ءبىزدىڭ كومپانيانىڭ وفيسىنە كەلدىڭىز. ەسىك اشىلمادى عوي. سول ۋاقىت ارالىعىندا ءسىزدىڭ ەسىك الدىندا تۇرعانىڭىزدى، ءتۇرىڭىزدى، نە ىستەگەنىڭىزدى ءبارىن ءتۇسىرىپ مەنىڭ سمارتفونىما بىردەن «بەلگىسىز وبەكت» دەگەن حابارلاما كەلدى. قازىرگى كامەرالار جاي عانا تۇسىرەدى. ال بۇل باعدارلاما ارقىلى ءسىز ۇيىڭىزدە بولماعان كەزدەردە ەسىگىڭىزدىڭ الدىنا كىم كەلگەنىن، ونىڭ نە جاساعانىن سول ساتتە بىلە الاسىز.  مۇنداي جوبا ادامداردىڭ قاۋىپسىزدىگى ءۇشىن كەرەك قوي. ءبىز قازاقستانعا وسىنداي تىڭ دۇنيەلەردى اكەلىپ، قولدانىسقا ەنگىزىپ جاتىرمىز.

–  كومپانيانىڭ دامۋى كومانداعا دا بايلانىستى. جۇمىسقا ادام قابىلداعاندا نە نارسەگە ءمان بەرەسىز؟

–  قازىرگى كەزدە ءبىزدىڭ كومپانيادا جۇمىس ىستەۋ ءۇشىن مامان ءۇش ەتاپتان ءوتۋ كەرەك.  بىرىنشىسى، تۇيىندەمەسىن جىبەرىپ تەست تاپسىرادى. ەكىنشى، وسىندا كەلىپ سول قىزمەتتە ىستەيتىن مامانمەن ينتەرۆيۋ وتكىزەدى. ءۇشىنشى ەتاپقا وتسە، تىكەلەي مەنىمەن ينتەرۆيۋ جۇرگىزەدى. ءبىز ونىڭ ەرىك-جىگەرىنە، پوتەنتسيالىنا، ەنەرگەتيكاسىنا قارايمىز. ءبىز ءۇشىن ماماننىڭ ەنەرگەتيكاسى ماڭىزدى. ادام كىشكەنە السىزدەۋ بولسا، قىزمەتكە قابىلدانبايدى. سەبەبى، ونداي ادام كومپانيا جۇمىسىنا كەدەرگى كەلتىرەدى. ال بىزگە كەرىسىنشە ەنەرگياسى مول،  پوتەنتسيالى بار،  مىقتى ماماندار كەرەك. بۇرىن ءبىز ادامداردى الىپ، وقىتىپ، ۇيرەتەتىن ەدىك. قازىر تاجيريبەسى بار، كاسىبي قىزمەتكەرلەردى جۇمىسقا قابىلداۋعا تىرىسامىز.

–   قۇپيا بولماسا، تابىستارىڭىز قانشا؟ 

–  جالپى تابىس دەگەنىڭىز ەشكىمگە ايتپايتىن، قۇپيا بولۋ كەرەك سياقتى(كۇلدى). شامالاپ ايتايىن، كومپانيانى شەتەل نارىعىنا شىعارۋعا جەتەتىن قارجىمىز بار. دەمەك، از اقشا ەمەس.

–  IT سالاسىندا جۇمىس ىستەۋدىڭ ارتىقشىلىقتارى مەن كەمشىلىكتەرى جايلى ايتىپ بەرسەڭىز...

– ارتىقشىلىقتارى كوپ. مىسالى، ءبىز IT سالاسىندا جۇمىس ىستەۋدىڭ مىنانداي ەرەكشە جۇيەسىن جاسادىق. ءبىزدىڭ قىزمەتكەرلەر جۇمىسقا قاي ۋاقىتتا كەلىپ، قاي ۋاقىتتا كەتەتىنىن وزدەرى (سۆوبودنىي گرافيك) بىلەدى. بىراق  سەگىز ساعات جۇمىس ىستەۋگە ءبارى مىندەتتى. سونداي-اق ءبىز بەلگىلى ءبىر تاپسىرمالار بەرەمىز، ەگەر سونى ورىنداعان جاعدايدا ول مامان جۇمىستا بايلانىپ وتىرماي كەتە بەرۋىنە بولادى.  جالپى، IT سفەرا بارلىق جەردە قولدانىلادى. سەبەبى ءبىزدىڭ كليەنتتەر قاتارىندا مەتالۋرگيا، حيميا،  قۇرىلىس، زاۋىتتار مەن جاي دۇكەندەر دە بار. سەن IT سفەراسىندا بولعانىڭ ءۇشىن ولاردىڭ بيزنەستەرىن زەرتتەيسىڭ.  بيزنەس پروتسەسىنە كىرەسىڭ دە، قالاي جۇمىس ىستەيتىنىن كورەسىڭ. سوندىقتان دا كوپتەگەن سالالاردىڭ قالاي جۇمىس جۇرگىزەتىنەن  حابارىڭ بولادى. وسىنى ءبارى بۇل سالانىڭ ارتىقشىلىقتارى دەپ بىلەمىن. ال كەمشىلىكتەرىنە توقتالسام،  قازاقستاندا IT-دى ءالى كوپ ادام تۇسىنە قويعان جوق. بىراق، بۇل ماسەلە بىرتە-بىرتە شەشىلەدى دەپ ويلايمىن. ەلىمىزدە IT سالاسىنىڭ دامۋىنا ەرەكشە كوڭىل ءبولىنىپ وتىر. بۇدان باسقا بىزدە (شەتەلمەن سالىستىرعاندا) IT جوبالار ارزان باعادا جاسالىنادى. كەمشىن تۇستارى وسىلار دەپ ويلايمىن.

–  بولاشاقتاعى جوسپارلارىڭىز قانداي؟ قازىر قانداي جوبالارمەن اينالىسىپ جاتىرسىزدار؟

–  بىز قازىر تاپسىرىستار كوپ المايمىز. الساق، تەك اۋقىمدى جۇمىستاردى عانا قابىلدايمىز.ۇساق جۇمىستاردىڭ ورنىنا كومپانيانىڭ ىشكى ونىمدەرىن دامىتۋعا باسىمدىق بەرىپ وتىرمىز. سونداي ءوز ونىمدەرىمىزدىڭ ءبىرىنىڭ اتى – بەت تانۋ الگوريتمى (الگوريتم راسپوزناۆانيە ليتس) دەپ اتالادى. بۇل – قازاقستانداعى العاشقى الگوريتم. ادامنىڭ بەتىن 95% دالدىكپەن تاني الادى. قاتتى جىلدامدىقتا جۇمىس ىستەۋ مۇمكىندىگى بار.  قازىرگى ۋاقىتتا وسىعان بايلانىستى كوپتەگەن كومپانيالارمەن بايلانىسىپ، جۇمىس جۇرگىزىپ جاتىرمىز. بۇل جوبانىڭ اتى Face Recognition دەپ اتالادى. اۋدارماسى «ادامنىڭ بەت-كەلبەتىن تانۋ» دەگەنگە كەلەدى. ماسەلەن، ءسىز ءوفيستىڭ  الدىنا كەلەسىز دە، بەلگىلى ءبىر اۋماقتى قاداعالاپ تۇرعان كامەرانىڭ «قاراشىعىنا» تۇسەسىز.  ەكىنشى، كەلبەتىنە قاراپ تانۋ الگوريتمى ىسكە قوسىلادى دا ءسىزدىڭ ءتۇرىڭىزدى تانۋعا ارەكەت جاسايدى. ءۇشىنشى،  كەلبەتىڭىزدى تانىپ بولعاننان كەيىن ول ءسىزدىڭ كومپانياعا كىم ەكەنىڭىزدى، ياعني قىزمەتكەر مە يا ارىپتەس پە نەمەسە باس ديرەكتور ما، ءبارىن انىقتاپ، كىم ەكەنىمىزدى بىلگەننەن كەيىن اۆتوماتتى تۇردە ەسىك اشىلادى. ال ەگەر كومپانياعا ەش قاتىسى جوق سىرتتان كەلگەن بولەك ادام بولساڭىز، ەسىك اشىلمايدى. تورتىنشىدەن،  وفيسكە سىرتتان بىرەۋ كەلسە، سونى حابارلاپ تەلەگرامم مەسسەندجەرىنە حات كەلەدى.  بۇل جوبانىڭ ارتىقشىلىقتارى مىنانداي: الدىمەن، ءوفيسىڭىزدىڭ قاۋىپسىزدىگى ارتا تۇسەدى، سوسىن قانداي دا ءبىر ءىس-ارەكەت بولعان كەزدە عانا ۆيدەو كامەرا ىسكە قوسىلىپ جازىپ الادى، ودان كەيىن سول وبەكتىنىڭ فوتوسىن تەلەگراممعا جىبەرىلەدى. كومپانياعا كەلۋشىلەر مەن قىزمەتكەرلەردىڭ وفيسكە قاشان كەلگەنى جانە كەتكەن ۋاقىتتارى فوتو كۇيىندە كورسەتىلەدى.  تاعى ءبىر ايتا كەتەرلىگى قىزمەتكەرلەرلىڭ جۇمىس ۋاقىتىن قاداعالاي الاسىز. مىسالى، مەن ساعات 10:00-دا كەلسەم، سول ۋاقىتتا بارىپ بەلگىنەمىن. كامەرا الدىنا تۇرعانىمدا ەكى ءۇش سەكۋندتا ول مەنىڭ تۇرىمە قاراپ سكانەرلەۋ جاسايدى دا، مەنى ىشكە كىرگىزەدى، ياعني ەسىك اشىلادى. سول مەزەتتە تەلەگرام مەسسەندجەرىنە حات كەلەدى. حاتتىڭ ىشىندە مەنىڭ تەگىم، ەسىمىمىم جانە كەلگەن ۋاقىتىم جازىلادى. كۇندەلىكتى وسى جازبالار ارقىلى ايلىق ستاتيستيكا جاساۋعا بولادى. كىم قانشا دا كەلدى، قانشادا  كەتتى.  بىز وسى جۇيە ارقىلى كورە الامىز. مۇنداي جۇيە الداعى ۋاقىتتا بۇكىل مەملەكەتتىك مەكەمەلەردە ىسكە قوسىلۋى كەرەك دەپ ويلايمىن.

–  «تاريحي جول» ءموبيلدى قوسىمشاسىن جاساعان ەدىڭىزدەر. سول جوبا جايىندا تارقاتىپ ايتىپ بەرسەڭىز...

–  تاريحي جول» ءموبيلدى قوسىمشاسىنا شىعىس قازاقستان وبلىسىنداعى 42 نىسان، جامبىل وبلىسىنداعى 20 نىسان ەنگىزىلدى.  الماتى وبلىسىنداعى 16 وبەكتىنى قوسۋ جوسپارىمىزدا بار. اتالعان وبەكتىلەردىڭ ءبارى دەرلىك ءوزىنىڭ ەرەكشە تاريحىمەن، كوز تارتار كورنەكىلىگىمەن، ساۋلەتىمەن ەرەكشەلەنەدى.

بۇل جوبانى جاساۋداعى ماقساتىمىز – حالقىمىزدىڭ تاريحي-مادەني جەرلەرىن جاڭعىرتىپ، AR جانە VR سياقتى زاماناۋي تەحنولوگيالاردى پايدالانۋ ارقىلى تاريح پەن جاڭا تەحنولوگيانى بىرىكتىرۋدى كوزدەدىك. بۇل قوسىمشانى  2018 جىلى جەلتوقسان ايىندا وسكەمەن قالاسىندا وتكەن Digital East فورۋمىندا دانيال احمەتوۆكە تانىستىرعان ەدىم. سول جولى جوبا قولداۋ تاۋىپ، ىسكە كىرىسىپ كەتتىك.

بۇل نەگىزى وتە قىزىقتى جوبا. ءبىزدىڭ قازاقستاننىڭ ءتۋريزمىن دامىتۋ ءۇشىن جاساعان ءبۇل جوبامىز تۋريستەردىڭ ءارتۇرلى ماسەلەلەرىن شەشۋگە كومەكتەسەدى. قازاقستانعا كەلگەن شەتەلدىكتەر بۇرىندا گيد ىزدەپ قينالاتىن. ءبىز ولاردىڭ گيدتى ىزدەپ قينالماۋى ءۇشىن تۋريستەردىڭ 5 تىلدە اقپارات الۋىنا مۇمكىندىك تۋعىزدىق. ولار تاريحي جەرلەر تۋرالى قازاق، ورىس، اعىلشىن، تۇرىك جانە قىتاي تىلىدەرىنەن مالىمەت الا الادى. بۇدان باسقا بۇل ءموبيلدى قوسىمشادا (اR) فۋنكتسياسى بار. بۇل فۋنكتسيا ەلىمىزدىڭ تاريحىندا ماڭىزى بار تاريحي ورىنداردان كەرەكتى مالىمەت بەرەدى. ونان وزگە VR 360° فۋنكتسياسى ارقىلى ءبىزدىڭ ەلدىڭ ازاماتتارى جانە شەتەلدىكتەر بۇل ورىنعا ارنايى كەلمەي-اق تانىمال، كوز تارتارلىق ادەمى جەرلەردى كورۋىنە جاعداي جاسالدى. ۆيرتۋالدى كوزىلدىرىك ارقىلى ءبىزدىڭ قوسىمشانى قوسىپ، سول جەردى كورىپ، ءالى تاريحي ورىنعا بارماسا دا، بارعانداي ەففەكتى سەزىنە الادى.

سونىمەن قاتار ءبىز وسى ءموبيلدى قوسىمشا ارقىلى پركلادكا مارشرۋت دەگەن فۋنكتسيانى دا ەنگىزدىك. بۇل فۋنكتسيامەن ءوزىنىڭ تۇرعان جەرىنەن بارۋ كەرەك ايگىلى جەرلەرگە دەيىنگى جولدى كارتادان كورە الادى. قوسىمشا ىشىندە تاريحي ماڭىزى بار جەرلەردىڭ ساپالى سۋرەتتەرى دە سالىنعان. سينحروندى اۋدارماشىسى جانە بار. ول شەتەلدىك قوناق پەن ءبىزدىڭ ەلدىڭ تۇرعىندارىنىڭ اراسىنداعى ديالوگتى بىردەن كەرەكتى تىلگە اۋدارۋ ءۇشىن جاسالىنعان قىزمەت. مىسالى، ءسىز قازاقشا سويلەپ اعىلشىن تىلىنە اۋدارما جاساي الاسىز. نەمەسە كەرىسىنشە. تۋريست اعىلشىن تىلىندە سويلەسە، ءسىز سول ءسوزىن جازىپ الىپ وزىڭىزگە قازاق تىلىنە اۋدارىپ الا الاسىز.

جاڭاعى ءبىز تسيفرلاندىرۋ جاساعان نىساندارىمىزدا ارنايى تاپ-تاس ورناتىلادى. ول تاس دەكوروتينو بولىپ ەسەپتەلەدى. ونىڭ بەتىندە QR كود بار. بۇل كودتا سول نىسانعا قاتىستى اقپاراتتار ساقتالعان. مىسالى، جامبىل اۋدانىنداعى قاراحان كەسەنەسىنە بارساڭىز، سول جەردەگى تاستادى QR كودى ءبىزدىڭ ءموبيلدى قوسىمشا ارقىلى سكانەرلەسەڭىز، سىزگە 5 ءتۇرلى تىلدە AR فۋنكتسياسىمەن  اقپارات بەرەدى. بۇدان باسقا اۋديو مەن ۆيدەو تۇرىندەگى مالىمەتتەردى دە تاماشالاي الاسىز. ياعني، وسىنىڭ ءبارى ءبىزدىڭ ءموبيلدى قوسىمشادا جيۋلى تۇر. ءسىز تاريحي ورىنعا بارعان كەزدە ءبىزدىڭ وسى جوبامىز ارقىلى قاسيەتتى جەردى كورىپ قانا قويماي، وزىڭىزگە كەرەكتى بارلىق اقپاراتتى بىلە الاسىز. تاعى ءبىر ارتىقشىلىعى بۇل جوبا ينتەرنەتسىز، ياعني وفلاين فورماتىندا دا جۇمىس ىستەي بەرەدى.

 

(تولىق نۇسقاسىن «BAI BOL, QAZAQ» جۋرنالىنان وقي الاسىز)

قانيا تابىس

پىكىرلەر