"قوبىلاندى" سپەكتاكلى جان جارامدى جازدى...

491

كەشقۇرىم جۇمىستان قايتىپ كەلە جاتىپ، جول بويىنداعى مۇحتار اۋەزوۆ تەاترىنىڭ الدىنان وتە شىعامىن. جالت-جۇلت ەتىپ وزىنە تارتادى دا تۇرادى. بىراق تىرشىلىك جار بەرمەي جۇرگەندە، "تەاترىڭ نە وسى؟!" دەپ ءوزىمدى ءبىر سىباپ الامىن دا، ۇيىمە قاراي تايىپ تۇراتىنمىن...
بۇگىن تەاتردىڭ قاق ماڭدايشاسىنداعى "قوبىلاندى" دەگەن جازۋعا كوزىم ءتۇسىپ، ەرىكسىز ورتاڭعى ەسىككە قاراي اياندادىم. ونداعى بار ماقساتىم، "بۇرىنعىنىڭ باتىرلارى قانداي بولعان؟ قازىرگى قازاقستاندا قانشا قوبىلاندى قالدى؟ بۇگىنگىنىڭ جىگىتتەرىنەن قوبىلاندى سەكىلدى اسىل ازاماتتار شىعا ما؟"- دەگەن سىندى ساۋالدارعا جاۋاپ ىزدەۋ ەدى...


جاۋابىن تاپتىم دا. سونىمەن، بىرگە وقيىق. قوبىلاندى-ەلدىڭ "شىركىن-اي، قازاقتا سونداي ءبىر باتىر بولسا عوي" دەگەن شەكسىز قيالىنان تۋعان وبراز ەكەنىن ەسەپتەسەك، قويىلىم باتىردىڭ بەينەسىن دالمە-ءدال بەرە العان. اسىرەسە، باس كەيىپكەر ەل-جۇرتى ءۇشىن تار قاپاسقا قامالسا دا، كەشىرىم كۇتپەيتىنىن كوكجالشا مالىمدەگەندە ءتۇسىپ وتىرعان ەڭسەم كوتەرىلدى دە قالدى. ول ول ما، قويىلىم قوبىلاندىنىنىڭ قايراتتى دا قاتال بەينەسىنەن بولەك، سىرتقى ءتۇر-تۇلعاسىن دا باتىر عانا قىلماي، سىرباز، سىمباتتى ازامات رەتىندە كورسەتكەن. كيىم-كيىسى، ءجۇرىس-تۇرىسىنىڭ ءوزى قانشا قىزدىڭ جۇرەگىنە شوق تۇسىرەردەي-اق. سولاردىڭ ىشىندە قىز بىتكەننىڭ سۇلۋلارى قۇرتقا مەن قارلىعا اۋەزوۆتىڭ "100 ايەل" گالەرەياسىندا كوش باستاپ تۇراتىنى دەسەم ارتىق ايتقانىم ەمەس-اۋ، ءسىرا؟! ماسەلەن، قۇرتقا-پاراساتتى ازاماتقا لايىقتاپ تاڭدالعان، سىر-سىمباتى كەلىسكەن ادال دا قايسار جار بولسا، قارلىعا ماحابباتى ءۇشىن ءوز تۋعاندارىن جانە ءوزىن ولىمگە قيعان رومانتيكالىق وبراز. ونىڭ كەيپىنە قاراپ، سەزىم ءۇشىن جانايارلىق ءھام اقىماقگەرشىلىك ىسكە بارادى دەپ ويلامايسىڭ. الايدا ونىڭ سۋىق ءوڭىنىڭ استارىندا جاننىڭ كىرشىكسىز تازالىعى جاتىر... سەبەبى، بازبىرەۋدى ءسۇيۋ جانە ول ءۇشىن قۋ جاندى دا ازىرەيىلدىڭ قولىنا ۇستاتا سالۋ ءجاي ادامنىڭ قولىنان كەلمەسى انىق.
قويىلىمنىڭ كوڭىلگە تاعى ءبىر ۇنامدى تۇسى، "جاس كەلسە ىسكە، ۇلكەن قەلەر اسقا" دەگەندى ۇستانعان بولۋ كەرەك، تەك قانا جاستارمەن جاساقتاعان. ال جاستار جان بىتىرگەن. اسىرەسە، قوبىلاندىنىڭ ەر مىنەزدى قارىنداسىنىڭ ءتاتتى قىلىقتارى كورەرمەندى كوزدەن جاس شىققانشا كۇلكىگە قارق قىلدى.


2 ساعاتقا سوزىلعان سپەكتاكل ءوز مارەسىنە جەتكەندە، حالىق ء"بىز باتىردىڭ ۇرپاعى ەكەنبىز-اۋ" دەگەن ۇلكەن ماقتانىشپەن تارقاستى. كەۋدەگە اۋىرلىق تۋعىزبادى، ميعا سالماق سالمادى. قىسقاسى، ءتول تاريحىمىزدان سىر شەرتەتىن سپەكتاكلدى تىلمەن ايتىپ جەتكىزۋ مۇمكىن ەمەس. تەك كورۋ كەرەك!

اقگۇل ايداربەكقىزى

پىكىرلەر