ۇستاز بولۋ – ابىرويلى ءىس

125

تۋعان توپىراقتى ءسۇيۋ – تەك ىسپەن دالەلدەنەدى. ادام بالاسىنىڭ ويىندا ارقاشان تۋعان جەرىنە كومەك قولىن سوزسام دەگەن ماقسات بولاتىنى انىق. جاستار اراسىندا وسى ماقساتىن ورىنداپ، تۋعان جەرىنە قىزمەت كورسەتىپ جۇرگەن زامانداستارىمىز دا بار. وسى ورايدا ءال-فارابي اتىنداعى قازۇۋ تۇلەگى توعامباي اياۋلىم قاناتقىزىمەن سۇحبات جۇرگىزگەن ەدىك.
– اياۋلىم، تۋعان جەرىڭىزگە جاس مامان رەتىندە جۇمىسقا ورنالاسىپسىز. قاي وڭىرگە، قاشان، قانداي ماماندىق بويىنشا جۇمىسقا تۇردىڭىز؟ جانە بۇل ءسىز ءۇشىن قانشالىقتى ءتيىمدى؟
– الماتى وبلىسى، ەڭبەكشىقازاق اۋدانى، «راحات اۋىلدىق وكرۋگى №1» ورتا مەكتەبىنە 2019 جىلدىڭ قىركۇيەك ايىنان باستاپ جۇمىسقا تۇردىم. ماماندىعىم – قازاق ءتىلى مەن ادەبيەتى ءپانىنىڭ مۇعالىمى. مەملەكەتتىك گرانتتى اۋىلدىق كۆوتا بويىنشا جەڭىپ العاننان سوڭ، اۋىلدىق جەردە جۇمىس ىستەپ جاتىرمىن.
– جاس مامان رەتىندە ءوز ماماندىعىڭىز تۋرالى نە ايتار ەدىڭىز؟ ارتىقشىلىعى مەن كەمشىلىكتەرى جايىندا؟
– مۇعالىم ماماندىعى ءار زاماندا سىيلى ورىنعا يە. بالالاردى ءبىلىم نارىمەن سۋسىنداتامىن دەپ شەشىم قابىلداعان ۇستاز ءار وقۋشىنىڭ جۇرەگىندە ءىز قالدىرىپ، ساپالى ءبىلىم الۋىنا نەگىز بولۋى ءتيىس. ارقاشان دا ءار ماماندىقتىڭ ارتىقشىلىعى مەن كەمشىل تۇستارى بىردەي جۇرەدى. ماسەلەن، ارتىقشىلىعى، بالالارمەن جۇمىس جاساپ وتىرىپ شىنايى كوڭىل-كۇي مەن سەزىمگە بولەنەسىڭ. مۇنداي قۋانىشتار ءومىرىڭدى اجارلاندىرا تۇسەدى. وقۋشىلار ەسەيە كەلە بالالىق شاعىنىڭ، باقىتتى كەزەڭىنىڭ ءبىر بولىگى رەتىندە مۇعالىمدەرىن ءومىر بويى ەسكە الىپ جۇرەدى. مۇنىڭ ءوزى ەرەن ەڭبەكتىڭ ەڭ ۇزدىك اقىسى ءارى مۇعالىم ءۇشىن ۇلكەن مارتەبە. سونىمەن قاتار، تۇراقتى ەڭبەكاقى. مەملەكەت تاراپىنان ۇسىناتىن ءتۇرلى باعدارلامالار دا ۇستازدىق جولداعى تاجىريبەنى مولايتا تۇسەدى. ال كەمشىل تۇسى، باسقا ماماندىقتاردىڭ قىزمەتكەرلەرى ۇيگە كەلگەن سوڭ دەمالىپ، ەركىن بولسا، ال مۇعالىم جۇمىسىنىڭ جارتىسىن ۇيىنە الىپ كەلىپ جاسايدى. ياعني، قاعازباستىلىق جۇمىسى كوپ ۋاقىتىڭدى الادى. كوپتەگەن مەكتەپتەردە مەكتەپشىلىك شارالارعا قاراجات شىعاراتىن دا – مۇعالىم. سونىمەن قاتار، كوپ ۋاقىتىمىز قاعازدارمەن جۇمىس جاساۋعا كەتەتىن بولعاندىقتان، كەي كەزدەرى وقۋشىلارمەن تىكەلەي بايلانىس جاساۋعا دا مۇمكىندىك بولمايدى.
– بولاشاق جاس ماماندارعا تىلەگىڭىز؟
– قازىرگى تاڭدا كوپ ستۋدەنتتەر مۇعالىم ماماندىعىن وقىپ شىعىپ، قولىنا ديپلومىن العاننان كەيىن باسقا ورتاعا كەتىپ قالىپ جاتادى. ولارعا ايتارىم، ۇستاز بولۋ – ابىرويلى ءىس. جاس ماماندارعا ايتارىم، وسى ماماندىقتى تاڭداي وتىرىپ، بالانى ادام قىلىپ تاربيەلەيتىن، بولاشاققا ماقسات قويا بىلۋگە سەنىم ۇيالاتاتىن زور تۇلعا – سەنسىڭ! سوندىقتان، وسى جولدان تايقىماي، بيىك بەلەستەردەن كورىنۋلەرىڭە تىلەكتەسپىن!
– سۇحباتىڭىز ءۇشىن كوپ راقمەت، اياۋلىم. ەڭبەك جولىڭىز جەمىستى بولسىن. ءبىلىم بەرەتىن، تاربيەلەيتىن شاكىرتتەرىڭىز ءۇمىتىڭىزدى اقتاۋىنا تىلەكتەسپىز!

سۇحباتتاسقان: جانسايا سمان
(ازاماتتىق باستامالاردى قولداۋ ورتالىعىنىڭ تاپسىرىسىمەن "تۋعان جەر" جوباسىنىڭ اياسىندا جازىلدى)

پىكىرلەر