جاس ماماندار تۋعان جەرىنە ۇلەس قوسۋدا

192

تۋعان جەر – اسىل قازىنا. وسى اسىل قازىنامىزدىڭ مەرەيىن ۇستەم ەتىپ، ونىڭ دامۋىنا ۇلەس قوسىپ جاتقان قازاق جاستارىنىڭ سانى جىلدان جىلعا ارتىپ كەلەدى. ءال-فارابي اتىنداعى قازاق ۇلتتىق ۋنيۆەرسيتەتىنىڭ فيلولوگيا جانە الەم تىلدەرى فاكۋلتەتىنىڭ 2019 جىلعى تۇلەگى ارسلانباەۆا اجار ءوزىنىڭ كيەلى مەكەنى ماڭعىستاۋعا ورالىسىمەن، تۋريزم كوللەدجىنىڭ جاس مامانى اتانىپ تا ۇلگەردى. بيىلعى وقۋ جىلى جاس مامان ءۇشىن قىزۋ باستالدى. ولاي دەيتىنىمىز، زامانىمىزدىڭ زاڭعار جازۋشىسى ءابىش كەكىلباەۆتىڭ 80 جىلدىعىنا وراي 12 قازان كۇنى وتكىزىلگەن مادەني-تانىمدىق شاراعا بەلسەنە قاتىسادى. جازۋشىمەن ارىپتەس بولعان ادەبيەت جانە ونەر قايراتكەرلەرى، سونداي-اق شەتەلدىك عالىم-زەرتتەۋشىلەرگە اجار ءوزىنىڭ بىلگەنىمەن ءبولىسىپ، كەلگەن قوناقتارعا ءابىش كەكىلباەۆتىڭ عۇمىر جولى مەن تۋعان جەردىڭ تاريحىن تۇسىندىرەدى.

اجاردىڭ ايتۋىنشا، مەرەكەلىك شارا جازۋشىنىڭ تۋعان جەرى وڭدى اۋىلىندا وتكىزىلىپ، كەيىن شەتپە كەنتىندە جالعاسىن تاپقان. مەرەيتويعا جيىلعان قاۋىم اۋەلى قامىسباي اتا قورىمىنا زياراتتاپ، قۇران باعىشتاعان. سودان سوڭ جازۋشىنىڭ تۋعان اۋىلى وڭدىداعى "اي-انا" ەسكەرتكىشىنە گۇل شوقتارىن قويىپ، ماڭعىستاۋ اۋدانىنىڭ قۇرمەتتى ازاماتتارى قۇتتىقتاۋ سوزدەرىن جەتكىزگەن. ءابىش شىعارماشىلىعىنان ۇزىندىلەر وقىلىپ، "اي-اناعا" ارنالعان ءان شىرقالىپ، قوناقتار ءابىش كەكىلباەۆ ءبىلىم العان وڭدى ورتا مەكتەبىنە دە تابان تىرەپ، ارنايى ۇيىمداستىرىلعان تانىمدىق شارانى تاماشالاعان. اسىلدىڭ سىنىعى، ابىزدىڭ ۇرپاعى دا وسى تويدىڭ ىشىندە بولىپ مەرەيتويدىڭ سوڭىندا اتقارىلعان شارالارعا شەكسىز العىسىن بىلدىرەدى.

 


بۇگىندە تۋعان جەرى ءۇشىن اۋليە سانالاتىن، ونىڭ تۇڭعيىق ويىنان تۋىنداعان تىڭ ەڭبەكتەرمەن سۋسىنداپ كەلە جاتقان جاس ۇرپاققا ءسوز كيەسى مەن تۋعان جەر قادىرىن ۇعىندىرۋدا ءوز ۇلەسىن قوسىپ جۇرگەن اجار سياقتى تالىمگەرلەرىمىز كوپ بولعاي دەگىمىز كەلەدى.

(ازاماتتىق باستامالاردى قولداۋ ورتالىعىنىڭ تاپسىرىسىمەن
"تۋعان جەر" جوباسىنىڭ اياسىندا جازىلدى)

پىكىرلەر