نازارباەۆ توقاەۆتىڭ جۇمىسىنا ارالاسىپ جۇرگەن جوق - داۋرەن اباەۆ

295

ونىڭ ايتۋىنشا، وسى ماسەلە ارقىلى حالىقتى دۇرلىكتىرگىسى كەلەتىندەر بار.

قر اقپارات جانە دامۋ ءمينيسترى داۋرەن اباەۆ "حابار" ارناسىنداعى "اشىق ديالوگ" باعدارلاماسىندا قازاقستانداعى "قوس بيلىك" قاۋەسەتى جونىندە پىكىر ءبىلدىردى، دەپ حابارلايدى adyrna.kz قازاقپارات-قا سىلتەمە جاساپ.

ونىڭ ايتۋىنشا، وسى ماسەلە ارقىلى حالىقتى دۇرلىكتىرگىسى كەلەتىندەر بار.

"بىرقاتار انونيمدىك كانالدار قازاقستانداعى "قوس بيلىك" تاقىرىبىن ادەيى تاراتتى. مۇنداي رەسۋرستاردىڭ اسىرا سىلتەپ، وتىرىكتى شىنداي ەتىپ كورسەتكىسى كەلەتىنى تۇسىنىكتى. ەلباسى ءوز مالىمدەمەسىندە بۇل جورامالداردى جوققا شىعاردى", - دەدى مينيستر.

مينيستر تۇڭعىش پرەزيدەنت نۇرسۇلتان نازارباەۆتىڭ مالىمدەمەسىنەن بىرنەشە تۇجىرىم شىعارۋعا بولاتىنىن ايتتى.

"بىرىنشىدەن، ەلباسى پرەزيدەنت جۇمىسىنا ارالاسپايدى. مۇنىڭ بارلىعى كونستيتۋتسيالىق نورمالارمەن مەجەلەنگەن. ەكىنشىدەن، توقاەۆ – ەكىنشى نازارباەۆ ەمەس، ونىڭ ءوز باسقارۋ ءستيلى، ءوز كوزقاراسى بار. سوندىقتان، جاڭا پرەزيدەنت ءوز جۇمىسىندا جاڭا فورمات قولدانعان سايىن "قوس بيلىك" تۋرالى شۋ كوتەرۋدىڭ قاجەتى جوق. ۇشىنشىدەن، ەلباسىنىڭ ءوزى دە، قاسىم-جومارت كەمەلۇلى دا ماڭىزدى ماسەلە جونىندە كەڭەسىپ وتىراتىندارىن ايتتى. نە دەگەنمەن، نۇرسۇلتان ءابىشۇلىنىڭ تابىستى ەل باسقارۋداعى تاجىريبەسى مول. وعان وزگە مەملەكەتتەردىڭ دە كوشباسشىلارى كەڭەس سۇراپ جۇگىنەدى، مۇنى مەن انىق بىلەمىن", - دەدى د.اباەۆ.

ايتا كەتەيىك، 11 قازاندا قر تۇڭعىش پرەزيدەنتى – ەلباسى نۇرسۇلتان نازارباەۆ قازاقستاندا "قوس بيلىك" تۋرالى قاۋەسەتكە نەگىز جوق ەكەنىن مالىمدەگەن بولاتىن.

"مۇنداي تۇجىرىمعا ەش نەگىز جوق، سەبەبى قازاقستان پرەزيدەنتتىك باسقارۋ فورماسى بار ۋنيتارلى مەملەكەت. مەن جول كورسەتەمىن، وزدەرى كەڭەسەدى، كەڭەس بەرەمىن، سۇراماسا – كەڭەس بەرمەيمىن (كۇلدى). ءوز وتانىما، ءوز ەلىمە قىزمەت ەتۋدى جالعاستىرىپ كەلەمىن", - دەپ جاۋاپ بەردى نۇرسۇلتان نازارباەۆ جۋرناليست سۇراعىنا.

پىكىرلەر