قىتايدان قاشقان قوس قازاق ساتقىن ەمەس پە؟!

435

قىتايداعى قازاقتاردىڭ قامىن جەپ كەلگەن قانداستارىمىزدى تۇرمەگە جابۋ ءبىزدىڭ ادەتىمىز ەمەس پە؟! كۇنى كەشە عانا ء"بىر تامشى قانىم بولسا دا ءوز جەرىمدە تامسىن" دەپ پانا سۇراپ كەلگەن قاستەر مۇساحانۇلى مەن مۇراگەر ءالىمۇلىن شەكارا قىزمەتى ۇستاپ اكەتتى. «پانا بولامىز» دەگەن "اتاجۇرت ەرىكتىلەرى" ۇيىمىنىڭ ءوزى "ارنايى قىزمەت وكىلدەرىن ءبىر مينۋتقا دا توقتاتا المادىق" دەپ قاۋقارسىز قالدى.

راسىمەن سايراگۇل ىسىندە دە وسى جاعداي قايتالانعان. الايدا سوڭى وزگەشە وربىگەن ەدى. بۇكىل قازاق نامىسقا تىرىسىپ ءجۇرىپ، شىرىلداعان قىزىمىزدى ەۋروپانىڭ قورعاۋىنا وتكىزىپ بارىپ "ۋح" دەگەنبىز. ال ەندى بۇل ءىس قايتا قايتالانعاندا قولىمىز بايلاۋلى قالىپ، قوعام ەكىگە جارىلدى.

بۇل جونىندە جۋرناليست توقتار جاقاش: "ەكى جىگىتتى قورعاۋ ءۇشىن استانادان ءلاززات احاتوۆا ارنايى ۇشىپ كەلدى. بەلگىلى ادۆوكاتتار باۋىرجان ازانوۆ پەن شىنقۋات بايجانوۆ تا باۋىرلارىنا اراشا تۇسۋگە كىرىستى. قىتايعا كەرى قايتارىلسا - قاستەر مەن مۇراگەردىڭ ەكەۋىن دە ايامايدى»- دەسە، جاراس كەمەلجان: "ارقا جايلى بولسا، ارقار اۋىپ نەسى بار؟ سايراگۇلدى قىتايداعى قازاقتار مۇلدە بىلمەيدى. ونى جاقىندا كەلگەن تۋىستارىمنان سۇرادىم. ءتىپتى، ءبىر اۋداننان كەلگەن كىسىلەر دە حابارسىز" دەدى. ءتىپتى، كەيبىرەۋلەرى "قىتايدا وتباسىلارىن تاستاپ، ءوز قارا باستارىن كۇيتتەپ كەلگەنى قىزىق ەكەن. اگەنت بولۋى ىقتيمال" دەپ كۇدىكپەن قاراۋدا.
ەندى بۇكىل قازاق كوكەيىندە «ەكى ازاماتتىڭ تاعدىرى نە بولادى؟» دەگەن ءبىر عانا سۇراق تۇر. بىرنەشە نۇسقالارىن ۇسىنىپ كورەيىك.

ا) اسپان استى ەلىنىڭ قۇزىرلى ورگاندارىنا كەرەكسىز شۇلىقتاي لاقتىرىپ كەپ جىبەرەمىز. الايدا بىرنارسەنى ەستە ۇستاعانىمىز ءلازىم. دارمەنسىز قوس قانداستى، وتباسىمەن قوسا ءولىمنىڭ اۋزىنا ءوزىمىز ايدايمىز.
ءا) عايىپتىڭ كۇشىمەن ءھام پرەزيدەنتىمىز توقاەۆتىڭ ارالاسۋىمەن، ەل بولىپ، جۇرت بولىپ جۇمىلىپ، قازاقستاندا الىپ قالامىز. ەگەر بۇنداي قۇزىرەتكە قول جەتەتىن بولسا، راسىمەن جاراعانىمىز!
ب) سايراگۇلدىڭ سارا جولىن قايتالاپ، شۆەتسياعا ياكي قىتايدان وزگە كەز كەلگەن مەملەكەتتىڭ بىرىنە جىبەرەمىز. ايتكەنمەن، ءار قاشقىندى شەتەلگە اتتاندىرا بەرسەك، جانى اشىپ، قۋانا قارسى الاتىن قايسى ەل دايىن تۇر، دەگەن سۇراق تاعى تۋادى.

قىسقاسى، قازاقتار قيلى-قيلى زامان كەشكەندە قىسىق كوزدەن يمەنۋ بىلاي تۇرسىن، باۋىرىم دەگەندى بوساعادا دا قالدىرماعان. ءوز جانىنىڭ اماندىعىن ەمەس، قىتايداعى بار قازاقتىڭ قامىن جەپ كەلگەندەر ءۇشىن، قان ءۇشىن كۇيە الماساق قازاق بولىپ نەسىنە وتىرمىز؟! قورلىق كورگەن ادامدى كورلىق كورسەتكەن ەلگە قايتا جىبەرۋ نامىسسىزدىعىمىز بەن ۇياتسىزدىعىمىزدىڭ دالەلى. سوندىقتان، سايراگۇلگە شىرىلداعاننان كەم تۇسپەي، قالىڭ قازاق قاۋىمى قوس ازاماتقا اراشا تۇسۋگە ءتيىسپىز!

اقگۇل ايداربەكقىزى

"ادىرنا" ۇلتتىق پورتالى

پىكىرلەر