قىتايدان قاشقاندار "سايراگۇل ءىسىن" بىلسە كەلمەس ەدى

174

14 قازاندا قاستەر مۇساحانۇلى مەن مۇراگەر ءالىمۇلى الماتىداعى ادام قۇقىعى بيۋروسىندا ءباسپاسوز ءماسليحاتىن وتكىزىپ، قازاقستاننان بوسقىن مارتەبەسىن سۇرايتىندارىن ايتتى. وسى جيىننان شىعىپ، ولار الماتى قالالىق كوشى-قون پوليتسياسىنا بەت الدى. قىتاي قازاقتارى ارىز جازباس بۇرىن تۇسكى اس ىشپەك بولىپ سول ماڭداعى اسحانانىڭ بىرىنە كىرگەن بويدا شەكارا قىزمەتىنىڭ وكىلدەرى كەلىپ، ولاردى ۇستاپ اكەتكەن. ۇستاعانعا دەيىن قاستەر مەن مۇراگەردىڭ قاسىندا بولعان "اتاجۇرت ەرىكتىلەرى" ۇيىمىنىڭ وكىلى گۇلجان توقتاسىنقىزى "ارنايى قىزمەت وكىلدەرىن ءبىر مينۋتقا دا توقتاتا المادىق" دەيدى.

- قاستەر مۇساحانۇلى مەن مۇراگەر ءالىمۇلىن وزدەرىن "شەكارا قىزمەتىنىڭ قىزمەتكەرىمىز" دەپ تانىستىرعان ءۇش ادام كەلىپ، قۇجاتقا قول قوياسىزدار دەپ ماجبۇرلەپ اكەتتى. ادۆوكاتى كەلسىن دەسەك تە كونبەدى. جارايدى، كىشكەنە كۇتىڭدەر دەگەنگە قاراتپاي ولاردى كولىككە باسىپ الىپ كەتتى. ولارمەن بىرگە "اتاجۇرت ەرىكتىلەرىنىڭ" باسشىسى بەكزات (ماقسۇتحانۇلى) دا كەتتى، - دەيدى ول

ال جۋرناليست توقتار جاقاش ءوزىنىڭ فەيسبۋك پاراقشاسىندا:  "قازىر ەكى جىگىتتى قورعاۋ ءۇشىن استانادان ءلاززات احاتوۆا ارنايى ۇشىپ كەلدى. بەلگىلى ادۆوكاتتار باۋىرجان ازانوۆ پەن شىنقۋات بايجانوۆ تا باۋىرلارىنا اراشا تۇسۋگە كىرىستى. قىتايعا كەرى قايتارىلسا - قاستەر مەن مۇراگەردىڭ ەكەۋىن دە ايامايدى. ەكى باۋىرىمىز شەكارا اسقاندا "قازاقستان دەگەن ەلىمىز بار، ءبىزدى داۋعا دا، جاۋعا دا بەرمەيدى" دەگەن ۇمىتپەن كەلدى. ال ءبىز...
قىتاي قازاقتارى سايراگۇلدىڭ ىسىنەن مۇلدەم بەيحابار ەكەن. شىرىلداعان ءبىر قىزىمىزدى ءويتىپ-ءبۇيتىپ ازەر دەگەندە ەۋروپانىڭ قورعاۋىنا وتكىزگەنىمىزدى بىلسە، بۇل بالالار كەلەر مە ەدى، كەلمەس پە ەدى؟ سايراگۇلدىڭ وقيعاسىنان قىتاي قازاقتارى حاباردار بولسا، بەرى قاراي ۇدەرە قاشار ما ەدى؟"-دەپ اشىنا جازدى. 

(سۋرەت azattyq.org سايتىنان الىندى)

"ادىرنا" ۇلتتىق پورتالى

پىكىرلەر