دابىل. شەكارانى زاڭسىز كەسىپ وتكەن قوس قازاق ازاماتىنا كومەك كەرەك!

2323

بۇگىن "قازاق-قىتاي" شەكاراسىن زاڭسىز جولمەن كەسىپ وتكەن  قاستەر مۇساحان جانە مۇراگەر ءالىم ەسىمدى قوس قازاق ازاماتى باق وكىلدەرىن جيناپ، مەملەكەتتەن پانا سۇرادى. وسى ۋاقىتقا دەيىن قىتايدان قىسىم كورىپ كەلگەن جىگىتتەر موتوتسيكلمەن 500 شاقىرىم جول ءجۇرىپ ءوتىپ،  ىلە قازاق اۆتونوميالىق وبلىسى تارباعاتاي ايماعى ءدوربىلجىن  اۋدانى ارقىلى شەكارا اسقان.

"ماقساتىم ءبىر قاسىق قانىم بولسا دا ءوز ەلىمدە تامسىن" دەگەن ۇستانىممەن جۇرگەن قوس ازامات ەلگە جەتە الماي 2 تاۋلىك، الماتىعا تابان تىرەي الماي تاعى ءبىر تاۋلىك قينالعان.

«ءوزىم ءتورت جىل سەگىز اي قاماقتا وتىردىم. شىققان سوڭ ءبىر جارىم جىل باقىلاۋدا  بولدىم. ساعاتىنا، مينۋتىنا شاقىرسا، بارىپ تۇردىم.  سوسىن وتباسىم، اتا-انام بولعان سوڭ سىرتقا كەتىپ جۇمىس ىستەپ، ەكى ءۇش اي بارا الماي قالدىم. ماعان قىتايدى كوزگە ىلمەيسىڭ دەپ قىسىم جاسادى. سوسىن مەنى قايتادان شاقىرىپ، قارا جۇمىسقا سالامىز، قاماۋعا الامىز دەپ ايتتى. مەن ءۇش كۇن رۇقسات بەرىڭدەر، جۇمىسىمدى وتكىزىپ كەلەيىن دەدىم دە، بىرگە ىستەيتىن جولداسىم مۇراگەرمەن اقىلداسىپ، ەلىمىز بار، سول جاققا وتۋگە ارەكەت جاسايىق دەپ ويلاسىپ، جولعا شىعىپ كەتتىك.  قىتاي شەكاراسىنا كەلدىك، سوندا 2-3 ساعات باقىلادىق. شەكاراداعى اسكەردى سىرتتاي باقىلادىق. ولار 20 مينۋتتا ءبىر، 15 مينۋتتا ءبىر ارالاپ، شام جاعىپ تۇرادى ەكەن.  سونى ەسەپتەپ وتىرىپ، ءبىرىنشى توردان 5 مينۋتا ءوتىپ ۇلگەردىك. سوسىن 60-70 شاقىرىم ءجۇرىپ، ەكىنشى تورعا جەتتىك. سوسىن نەگىزگى تىكەنەك توردان دا ءوتىپ، قازاقستان اۋماعىنداعى شەكاراعا دەيىن ءبىر كوش جەر ەكەن. ودان سوڭ ەكى كۇن جۇردىك، ءۇشىنشى كۇنى زايسان جاقتاعى شىلىك دەگەن تۇستان شىقتىق»، - دەيدى  قاستەر مۇساحان.

وسىلايشا شەتەلدىك ازاماتتار "قىتايدا قاراۋسىز قالعان وتباسىمىزعا زۇلىمدىق جاساپ قويماي ما ەكەن؟!" دەگەن ۋايىم جاندارىن جەپ بارا جاتقانىن جەتكىزدى.

ءدال قازىرگى تاڭدا ەكەۋى دە الماتىدا «اتاجۇرت» دەگەن اتپەن تانىمال شەتەلدىك قازاقتاردىڭ قۇقىعىن قورعايتىن ۇيىمنىڭ قامقورلىعىنا الىندى. اتالمىش ۇيىم شەتەلدىك ازاماتتاردى ءۇي-جايىمەن قامتاماسىز ەتۋگە جانە زاڭگەرلەر كومەگىنە جۇگىنۋگە كومەكتەسەمىز، دەپ وتىر. الايدا قۇزىرلى ورگاندار ولاردى قاماۋعا الىپ، الماۋى بەلگىسىز.

ەستەرىڭىزگە سالا كەتەيىك، وسىعان ۇقساس وقيعا 2018 جىلى قوعامدىق دۇربەلەڭگە سەبەپ بولعان ەدى. قىتايدان قازاقستانعا زاڭسىز ءوتتى دەلىنگەن سايراگۇل ساۋىتباي قاماۋعا الىنعان سوڭ، قوعامدىق ۇيىمدار باق بەتتەرىندە ونى قىتايعا قايتارماۋ تۋرالى  ۇندەۋلەر جاريالادى. كوپ ۇزاماي الماتى وبلىسى پانفيلوۆ اۋداندىق سوتى ەتنيكالىق قازاق، قىتاي ازاماتىن 6 ايعا شارتتى تۇردە باس بوستاندىعىنان ايىرىپ، سوت زالىنان بوساتتى. وعان قازاقستان اۋماعىنان شىعارۋ تۋرالى قوسىمشا جازا قولدانىلمادى. سايراگۇل ساۋىتبايعا «پانا ىزدەۋشى تۇلعا، بىراق بوسقىن ەمەس»  دەگەن كۋالىك بەرىلگەن. بيىل جازدا ول شۆەتسياعا وتباسىمەن كوشىپ كەتتى.

 

(سۋرەت azattyq-ruhy.kz سايتىنان الىندى)

اقگۇل ايداربەكقىزى، "ادىرنا" ۇلتتىق پورتالى

 

پىكىرلەر