جازۋشىعا ءۇي جوق

761

جۇرتتىڭ ءبارى قالاعا قاشىپ جاتقاندا مەن دە قاڭعالاقتاپ قالاعا كەلىپ ەم. جەكە ءۇيىڭ بولماعاسىن بىردە اناۋ ۇيگە، بىردە مىناۋ ۇيگە تۇنەپ شىعىپ جۇرەسىڭ. جازۋشى بولعاسىن ۋايىمسىز جىپ- جىلى جەردە وتىرىپ جانىڭدى جالاۋ عىپ جازعىڭ كەلەدى ءبىر. جۇرت جىلى جەرىن بەرە مە ساعان. ءتور وزىنىكى، ەسىك سەنىكى…

سودان قالانىڭ اكىمىنە «ۇكىمەت حالىققا ءۇي بەرەدى» دەگەن ءسوز راس پا – دەپ حات جازىپ جىبەردىم. جاۋاپ بولمادى. ال اكىمگە، ونىڭ ورىنباسارىنا كىرۋ دەگەن قيامەتقايىم ەكەن. ۇلكەن ەسىكتەردىڭ اۋزىندا ءبىر- ءبىر پوليتسەي ماڭىنا جولاتپاي «ابالاپ» كۇزەتىپ تۇر. ءتىنتىنىپ ءجۇرىپ ءبىر كۇزەتسىز ەسىككە كىرىپ كەتتىم.ىشىندە جاپ- جاس ءبىر جىگىت وتىر ەكەن. ماعان ىقىلاسسىز قاراپ قويدى. سوسىن قاباعىن ءسال شىتىپ:
— ءيا، اتا، جولىڭىز بولسىن- دەگەنى.
— الەي بولسىن، كوكەم. سەن نە قىزمەت ىستەيسىڭ؟
— اكىمنىڭ ءبىر ورىنباسارىنىڭ ورىنباسارىمىن.
— اينالايىن، ورىنباساردىڭ ورىنباسارى! سىزدەردەن ءۇي سۇراپ حات جازىپ ەم.
— كەز كەلگەن ادامعا ءۇي بەرىلمەيدى. وتانعا قانداي پايدا كەلتىردىڭىز؟
قانداي ەرلىك جاسادىڭىز؟ نە قىزمەت ىستەدىڭىز؟
— جازۋشى ەم…
— جازۋشىعا ءۇي جوق!
— سوندا ءۇيدى كىمگە بەرەسىڭدەر؟
— كەشەگى ەكىنشى دۇنيەجۇزىلىك سوعىسقا قاتىسىپ، 4-5 نەمىستى ولتىرسەڭىز ءۇي بەرەمىز. نەمەسە اۋعان سوعىسىنا قاتىسىپ، 20-30 اۋعاندى ولتىرسەڭىز ءۇي دايىن.
— ادام ولتىرمەگەن ادامعا ءۇي جوق پا؟
— بىرەۋدىڭ مۇرنىن بۇزساڭىز دا ءۇي بەرىلەدى. ياعني، بوكسەر بولساڭىز.
— وزدەرىڭ بۇزاقى ەمەسسىڭدەر مە؟ سەكسەندەگى شال كىمنىڭ مۇرنىن بۇزا الادى؟
— وندا مەنىڭ شارۋام جوق. مەن ءۇيدىڭ كىمگە بەرىلەتىنىن ايتىپ تۇرمىن.
جۇگىرگىش جەلاياق بولساڭىز، فۋتبوليست بولساڭىز، شاڭعىمەن تاۋدان قارعىساڭىز ءۇي انە تۇر.
— ماعان اسپاندا ءول دەگەنىڭ بە؟ جەردە ولەيىن تە، شىراعىم.
— وندا مەنىڭ شارۋام جوق. 150 كەلى تەمىر كوتەرسەڭىز مىنە ءۇيدىڭ كىلتى.150 كەلى تەمىر كوتەرگەن ورىس يۆانعا ، قىتاي ماۋ باۋعا، كارىس سۋ ميگە، دۇنگەن قىزدارى شينشاللا مەن مينشاللوعا، ۆەتنام تحي بحيگە ءۇي بەرىپ دورباسىن دوللارعا تولتىرىپ جىبەردىك قوي. وليمپيادادا ولار قازاقتىڭ داڭقىن اسپانعا كوتەرگەنىن بىلمەيسىز بە؟
— ولار ۇيلەرىمىزدى ساتىپ، دوللارىمىزدى ارقالاپ ەلىنە كەتىپ قالعان جوق پا؟
— اقشاسى تاۋسىلعان كۇنى تاعى كەلىپ، قازاقستاندى بۇكىل الەمنىڭ الدىنا شىعارادى ءالى.
— ولاردى نەگە قازاقستاندا ۇستاپ قالمايمىز؟
— قالاي؟
— ولاردى بيلىككە ارالاستىرۋ كەرەك. مىسالى، بوكسەردى سوعىس ءمينيسترى، تەمىر كوتەرەتىندەردى تەمىرجول ءمينيسترى، ءفۋتبوليستى دەنساۋلىق ساقتاۋ ءمينيسترى، شاڭعىشىنى پرەمەر- مينيستر ەتسەك ولار وسىندا قالادى. شىركىن، سپورتسمەندەر اقىلدى بولادى عوي. بار بيلىكتى سپورتسمەندەرگە بەرسەك، قازاقستان الدىڭعى قاتارلى ون ەلدىڭ قاتارىنا قوسىلار ەدى.مەنىڭ ايتقانىمدى كىم قىلادى؟ قىلسا تاسىپ توگىلەر ەدىك –اۋ!…
ورىنباساردىڭ ورىنباسارى مەنىڭ سپورتسمەندەردى ماقتاعان ءسوزىمدى تەرىستەي العان جوق. مەملەكەتتىڭ سپورتسمەندەرگە وڭ كوزىمەن، ونەر ادامدارىنا سامارقاۋ قارايتىنىن كوكىرەگىنە توقىپ العان ءتۇيانا بالا عوي. سويتپەسە ورىنباسارعا ورىنباسار بولا ما؟ سوسىن ول «مىلجىڭ شالعا تاپ بولدىم با؟» دەگەندەي ماعان تىكتەپ قاراپ الىپ:
— اتا، ەندى مەن سىزگە سوڭعى ءسوزىمدى ايتايىن- دەدى.
— ايتا عوي، جانىم.
— داڭعىر- دۇڭگىر انشىگە، قاڭعىر- كۇنگىر كۇيشىگە، ءبىر ورنىندا تۇرا المايتىن كوبەلەك بيشىگە، مىلجىڭ جازۋشىعا بەرىلەتىن ءۇي جوق. تۇسىنىكتى مە، سىزگە؟!
— تۇسىنىكتى. وتە تۇسىنىكتى…

تورەجان ءماندىباي 

پىكىرلەر