كارىس قىزىنىڭ قازاق ەلىنە دەگەن شەكسىز ماحابباتى

156

قازان ايىنىڭ  ەكىسى كۇنى الماتى قالاسىنىڭ ىشكى ساياسات باسقارماسىنىڭ قولداۋىمەن، "ادىرنا"  ۇلتتىق ەتنوگرافيالىق بىرلەستىگى ۇيىمداستىرعان "قوعامدىق كەلىسىم جانە ۇلتتىق بىرەگەيلىك" تاقىرىبىنداعى دوڭگەلەك ۇستەل ءوتتى.

مەكتەپ وقۋشىلارى مەن ۇستازدار كوپتەپ جينالعان كىتاپحانا زالىندا شاقىرىلعان قوناقتار ءوز ويلارمەن ءبولىستى. العاشقى ءسوزدى قازاقستانداعى بەلگىلى ءتىل جاناشىرى، باۋىرلاس ءازىربايجان ۇلتىنىڭ قىزى اسىلى وسمان الدى. اسىلى وسمان ءوزىنىڭ قازاقستانعا ستاليندىك قۋعىن-سۇرگىننىڭ سالدارى ارقىلى كەلگەنىن، قازاق ۇلتىنىڭ وكىلدەرى ءازىربايجانداردى قالاي قارسى العانىن، سونىڭ ارقاسىندا كوپتەگەن ادامداردىڭ ءتىرى قالىپ، ءوسىپ-ونگەنىن، قازاقستاندا تۇرىپ وزدەرىن وسى ەلدىڭ ازاماتى سەزىنگەنىن ايتىپ بەردى. ول كىسى قوعامدىق كەلىسىم جونىندە كوپتەگەن مىسالدار، قازاقتىڭ ماقال-ماتەلدەرىن كەلتىرە وتىرىپ وتە قىزىق ەتىپ باياندادى. اسىلى وسمان قاي جەردە ءسوز سويلەسە كوپشىلىكتىڭ نازارىن وزىنە اۋدارىپ باۋراپ الاتىن تۇلعا. سول كىسىنىڭ سوزدەرى كوپشىلىككە وتە ۇنادى.

جينالىسقا قاتىسىپ وتىرعان قوناقتاردىڭ ءبىرى «قازاق كارىس دوستىعى» ۇيىمىنىڭ ءتورايىمى كلارا الەكساندرقىزى  ءسوز الدى. كلارا الەكساندرقىزى نارەستە كەزىندە قيىر شىعىستان كەڭەس بيلىگىنىڭ كۇشتەپ قازاقسانعا جەر اۋدارىلعان مىڭداعان كارىس ۇلتىنىڭ وكىلدەرىمەن بىرگە مال تيەيتىن تەمىرجول ۆاگوندارىمەن كەلگەن ەكەن.

قىزىلوردا ايماعىنا كەلگەن سوڭ، اكەسىنىڭ دوسىنىڭ اكە-شەشەسى «ەندى ءبىزدىڭ ۇلكەن ۇلىمىز بولدىڭ» دەپ قارسى الىپتى. كارىستىڭ ۇلى الەكساندىردىڭ كىشكەنتاي قىزىن، وزدەرىنىڭ قولىنا الىپ، اكەسى وقۋدا جۇرگەندە ءوز بالاسىنداي اسىراپ، باعىپ-قاعىپ مەكتەپ جاسىنا دەيىن قولدارىندا وسىرگەن ەكەن. كىشكەنتاي كلارا مەكتەپكە بارعانشا ورىسشا ءسوز بىلمەگەن ەكەن.

مىنە، قازاقستانعا قيىر شىعىستان تاعدىر ايداپ كەلگەن كلارا الەكساندرقىزى ۇلكەن تۇلعا بولدى. ونىڭ قازاق ەلىنە دەگەن شەكسىز ماحابباتى، كوپشىلىكتى ءتانتى ەتتى. ك.حان قازاق ءتىلىن ءبىلۋ كەرەكتىگىنە كوپ ءسوز ارنادى.

دوڭگەلەك ۇستەلگە قاتىسقان باسقا دا قوناقتار، مەكتەپ وقۋشىلارى ءوز سوزدەرىندە قازاقستانداعى قوعامدىق كەلىسىم جانە ۇلتتىق بىرەگەيلىك تۋرالى كەلەلى ويلارىمەن ءبولىستى.

جيىن سوڭىندا مەكتەپ وقۋشىلارى مەن قوناقتار سۋرەتكە ءتۇستى. بۇل جيىن وتە ءبىر مازمۇندى ءارى جاستارعا بەرەرى مول بولىپ ءوتتى.

بەردالى وسپان

 

پىكىرلەر