ءومىر شىنىبەكۇلى: زاڭ جوباسىنىڭ 5-بابى مۇعالىمدەر ءۇشىن وتە قاۋىپتى

1002
مينيسترلىك پەداگوگ، قوعام بەلسەندىسى ءومىر شىنىبەكۇلىنىڭ «پەداگوگ مارتەبەسى تۋرالى» زاڭ جوباسىنا قاتىستى  جاساعان 14 ۇسىنىسىنىڭ بىردە-بىرەۋىن ەسكەرمەگەن
پەداگوگ، قوعام بەلسەندىسى ءومىر شىنىبەكۇلى قر ءبىلىم جانە عىلىم مينيسترلىگى ۇسىنىپ جاتقان «پەداگوگ مارتەبەسى تۋرالى» زاڭ جوباسىنىڭ 5 بابىنا قارسىلىق ءبىلدىرىپ وتىر.

زاڭ جوباسىنىڭ «پەداگوگيكالىق ادەپ جانە پەداگوگ انتى» دەپ اتالاتىن 5 بابىنىڭ 2 تارماعىندا «پەداگوگيكالىق ادەپ قاعيدالارىن ءبىلىم بەرۋ سالاسىنداعى ۋاكىلەتتى ورگان بەكىتەدى» دەپ جازىلعان. قوعام بەلسەندىسى، ارداگەر ۇستاز ءومىر شىنىبەكۇلى بۇنى ۇستازداردىڭ اۋزىنا قاقپاق بولۋ دەپ ەسەپتەيدى. ويتكەنى، سول باپتىڭ 4 تارماعىندا «انت ءماتىنىن جانە پەداگوگتەردىڭ ونى قابىلداۋ ءتارتىبىن ءبىلىم بەرۋ سالاسىنداعى ۋاكىلەتتى ورگان بەكىتەدى» دەلىنگەن.

«مۇعالىمگە "مارتەبە" مەن "ابىرويدى" ەشقانداي زاڭمەن بەكىتىپ بەرە المايسىز.. ول ازاماتتىڭ ءوزىنىڭ ءبىلىم-بىلىگى مەن جەكە ازاماتتىق ۇستانىمىنا قاتىستى دۇنيەلەر..

قابىلدانعالى جاتقان "مۇعالىم مارتەبەسى تۋرالى" زاڭ جوباسىندا مۇعالىمدى قورعايتىن باپ جوق.

جوبانىڭ ەڭ ماڭىزدى تۇسى وسى زاڭنىڭ 5-بابى... وسى باپتىڭ 2-تارماعىنا نازار اۋدارىڭىزدار..

"پەداگوگيكالىق ادەپ قاعيدالارىن ءبىلىم بەرۋ سالاسىنداعى ۋاكىلەتتى ورگان بەكىتەدى" دەپ تۇر.

الگى ۋاكىلەتتى ورگان "مۇعالىم قابىلدانعان زاڭ مەن ءبىلىم بەرۋ مەكەمەسىنىڭ جارعىسىن مۇلتىكسىز ساقتاۋى ءتيىس" دەپ، مەكتەپ جارعىسىنا "مەكتەپ قابىرعاسىندا بولىپ جاتقان جاعدايلاردى جاريالاۋعا تەك پەدكەڭەس قانا قۇزىرەتتى" دەگەن سەكىلدى باپ ەنگىزىپ جىبەرسە، وسى كورگەن كۇنىمىزگە زار بولامىز..

ال وزگە باپتارى سىلدىر ءسوز.. ماسەلەن "پەداگوگتى مىندەتىنە جاتپايتىن جۇمىستارعا تارتۋعا جول بەرىلمەيدى" دەيدى. جول بەرگەن باسشىعا قانداي شارا قولدانىلادى؟ 6 ايدان سوڭ وزدىگىنەن كۇشىن جوياتىن سوگىس پە؟ ول جاعى ناقتىلانباعان..

بۇل زاڭ جوباسىنىڭ قابىلدانۋىنا جول بەرۋگە بولمايدى..»، - دەيدى ءومىر شىنىبەكۇلى.

قوعام بەلسەندىسىن مينيسترلىككە بۇدان كەيىن دە بىرنەشە رەت شاقىرعان. الايدا، ءومىر شىنىبەكۇلى ۇسىنىستارىنىڭ بىردە-بىرەۋى ەلەنبەي، زاڭ جوباسى جاسالعاندا ەسكەرىلمەگەندىكتەن، بۇدان بىلاي نۇر-سۇلتانعا بارۋدان باس تارتىپتى.

«تامىز كەڭەسىنە، سوسىن 3 قىركۇيەكتە تاعى شاقىرعان. بارماي قويدىم. ءسوزدىڭ اشىعى كەرەك، ولار وتىرىسقا مەن سياقتى 2-3 ەرىكتىنى جيناپ الىپ، قالعانىن ءوز ادامدارىنان قويىپ، داۋىسقا سالىپ بىرنارسەنى وتكىزىپ جىبەرمەكشى. وتكەندە 15 ادامدى جينادى. سونىڭ ىشىندە ءۇش ادام عانا كادىمگى پراكتيك مۇعالىمدەر.  قالعاندارى سول ءبىلىم ماڭايىندا كونفەت تەرىپ جۇرگەندەر. شاقىرىپ الادى دا، داۋىسقا بىردەڭەنى سالادى دا، «بولدى مىنە» دەپ وتكىزىپ جىبەرەدى. ايتپەسە، بىرنارسە وزگەرتەمىن دەپ وتىرعان ەشكىم جوق سەكىلدى»، - دەيدى ول.

"ادىرنا" ۇلتتىق پورتالى

پىكىرلەر