«دۇيسەنبىلىك سپورت» جوباسى ءوز مارەسىنە جەتتى

305

«دۇيسەنبىلىك سپورت» مەملەكەتتىك-الەۋمەتتىك جوباسى اياسىندا الماتى قالاسى قوعامدىق دامۋ باسقارماسىنىڭ قولداۋىمەن «ادىرنا» قوعامدىق قورىنىڭ ۇيىمداستىرۋىمەن «ولجا» سپورت فۋتبول الاڭىندا بازار جاستارى اراسىندا جاز بويى وتكەن سايىستىڭ اقتىق مارەسى ءوتتى.

«دۇيسەنبىلىك سپورت» جوباسى اياسىندا الماتى قالاسىنداعى 46 ساۋدا ورىنىندا سپورتتىق شارالارعا (فۋتبول جانە ۆولەيبول) قاتىسۋعا شاقىرۋ ماقساتىندا ۇگىت-ناسيحاتتىق جۇمىستار، بازار اكىمدىكتەرىمەن كەلىسسوزدەر جۇرگىزىلدى. ناتيجەسىندە قالالىق بازارلاردان 32 فۋتبول كومانداسى، 16 ۆولەيبول كومانداسى ىرىكتەلىپ شىقتى.

جالپى ويىندار بارىسىندا ادەمى ويىن ۇلگىسىن كورسەتىپ، 4 كوماندا ىرىكتەلىپ شىققان ەدى. اتاپ ايتقاندا «7 قۇرداس-2»، «كار-سيتي»، «سالامات» جانە «باحار ي ك» كوماندالارى اقتىق سايىستا ءوزارا جەڭىمپازدى انىقتادى.

اشىلۋ سالتاناتى قر انۇرانىمەن باستالىپ، ارمەن قاراي «ادىرنا» ۇلتتىق ەتنوگرافيالىق بىرلەستىگى قوعامدىق قورىنىڭ پرەزيدەنتى ارمان سەرىكۇلى اۋباكىر سپورتتىڭ قاسيەتى، ماڭىزى جانە ءمانىن ناسيحاتتاپ، سالاۋاتتى ءومىر سالتىن ساقتاۋ جاستاردىڭ وركەندەۋىنىڭ، ۇلتتىڭ بولاشاعىنىڭ سارا جولى ەكەنىن ايتىپ، سپورتشىلارعا ساتتىلىك تىلەدى.

وتە تارتىستى وتكەن فۋتبول ويىنى بارىسىندا تومەندەگىدەي كوماندالار جەڭىس تۇعىرىنان كورىندى.

ءبىرىنشى ورىن – «سالامات»- كۋبوك، مەدال، ديپلوم جانە 150 مىڭ تەڭگە اقشالاي سىيلىقپەن;

ەكىنشى ورىن – «كار-سيتي» كۋبوك، مەدال، ديپلوم جانە 100 مىڭ تەڭگە اقشالاي سىيلىقپەن;

ءۇشىنشى ورىن – «جەتى قۇرداس» كۋبوك، مەدال، ديپلوم جانە 50 مىڭ تەڭگە اقشالاي سىيلىقپەن;

ءتورتىنشى ورىن – «باحار ي ك» كۋبوك، مەدال، ديپلوم جانە 30 مىڭ تەڭگە اقشالاي سىيلىقتارمەن ماراپاتتالدى.

 

مۇحامەدجان ابدىبەك

پىكىرلەر