جاستارعا بەرىلگەن جاڭا مۇمكىندىك

170

2019 جىل – «جاستار جىلى» دەپ جاريالانعانى بەلگىلى. بارلىق سالالاردا جاستار مەملەكەت تاراپىنان جاسالىپ جاتقان قولداۋدى سەزىنۋدە. بۇگىنگى تاڭدا تسيفرلىق قوعام مەن ءبىلىم مەملەكەتتىڭ دامۋ جولىن تۇبەگەيلى وزگەرتۋدە. ەلباسى نۇرسۇلتان ءابىشۇلى اتاپ وتكەندەي، «ءبىزدىڭ ەلىمىز وسى زامان تالاپتارىنا ساي بولۋى ءتيىس»، ال جاستارىمىز – جاhاندانۋ زامانىندا ەلىمىزدىڭ باسەكەگە قابىلەتتىلىگىنىڭ نەگىزگى فاكتورى بولماق.
پرەزيدەنت قاسىم-جومارت كەمەلۇلى توقاەۆتىڭ «يگىلىك بارشاعا! ساباقتاستىق. ادىلدىك. ورلەۋ» سايلاۋالدى باعدارلاماسىمەن اگەنتتىك الدىندا «پرەزيدەنتتىك جاستار كادر رەزەرۆىن» قالىپتاستىرۋ مىندەتى قويىلعان بولاتىن. ناقتى ءبىر سالادا وزىندىك جەتىستىكتەرى بار جاس قازاقستاندىقتاردىڭ ىرىكتەۋدەن ءوتىپ، رەزەرۆكە الىنۋى، جوعارى مەملەكەتتىك جانە باسقارۋشى لاۋازىمدارعا تاعايىندالۋ مۇمكىندىگى پايدا بولدى. 35 جاستان اسپاعان، جوعارعى ءبىلىمى جانە بەس جىلدان كەم ەمەس ەڭبەك ءوتىلى بار قر ازاماتى رەزەرۆكە الىنادى. رەزەرۆكە الىنعان ادامدار بىرنەشە سالالىق لاۋازىمدار توپتارىنا ورنالاسا الادى.
ءبىرىنشىسى - سالالىق لاۋازىمدار توبى: قر مينيسترلەرى، ولاردىڭ ءبىرىنشى ورىنباسارى مەن ورىنباسارلارى; وبلىستاردىڭ، رەسپۋبليكالىق ماڭىزى بار قالالاردىڭ، استانانىڭ اكىمدەرىنىڭ ءبىرىنشى ورىنباسارلارى مەن ورىنباسارلارى; ورتالىق اتقارۋشى ورگاندار كوميتەتتەرىنىڭ توراعالارى; ۇلتتىق باسقارۋشى حولدينگتەر، ۇلتتىق حولدينگتەر، ۇلتتىق كومپانيالار باسقارمالارىنىڭ توراعالارى جانە مۇشەلەرى.
قىزمەتتىك باعىتتارى: ەكونوميكالىق جانە قارجىلىق ساياسات; الەۋمەتتىك ساياسات; ينفراقۇرىلىمدى جانە سەرۆيستىك سالالاردى، ونەركاسىپتى، اۋىل شارۋاشىلىعى مەن قورشاعان ورتانى قورعاۋدى دامىتۋ; سىرتقى جانە ىشكى ساياسات; قۇقىقتىق ساياسات.
ەكىنشىسى - وڭىرلىك لاۋازىمدار توبى: وبلىستاردىڭ، رەسپۋبليكالىق ماڭىزى بار قالالاردىڭ، استانانىڭ اكىمدەرى; وبلىستىق ماڭىزى بار قالالاردىڭ، وبلىستار اۋداندارىنىڭ جانە قالالارداعى اۋدانداردىڭ اكىمدەرى. قىزمەتتىك باعىتتارى: وڭىرلىك باسقارۋ.
ءۇشىنشىسى - باسقارۋشىلىق لاۋازىمدار توبى: ورتالىق اتقارۋشى ورگانداردىڭ جاۋاپتى حاتشىلارى; قر كونستيتۋتسيالىق كەڭەسى; پرەزيدەنت ءىس باسقارماسى; قر ورتالىق سايلاۋ كوميسسياسى; رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتى; قر مەملەكەتتىك قىزمەت ىستەرى اگەنتتىگى اپپاراتتارىنىڭ باسشىلارى; قر جوعارعى سوتى جانىنداعى سوتتاردىڭ قىزمەتىن قامتاماسىز ەتۋ دەپارتامەنتىنىڭ باسشىسى; قر جوعارى سوت كەڭەسىنىڭ حاتشىسى – اپپارات باسشىسى; جاۋاپتى حاتشى لاۋازىمى ەنگىزىلمەگەن ورتالىق اتقارۋشى ورگاندار اپپاراتتارىنىڭ باسشىلارى; ادام قۇقىقتارى جونىندەگى ۇلتتىق ورتالىقتىڭ باسشىسى; وبلىستاردىڭ، رەسپۋبليكالىق ماڭىزى بار قالالاردىڭ، استانانىڭ اكىمدەرى اپپاراتتارىنىڭ باسشىلارى.
قىزمەتتىك باعىتتارى: باسقارۋشىلىق باعىت.
اتالعان لاۋازىمدارعا تاعايىنداۋلار رەزەرۆكە الىنعان ادامداردىڭ قاتارىنان، سونداي-اق زاڭنامادا بەلگىلەنگەن تارتىپپەن وزگە دە ادامداردىڭ قاتارىنان جۇزەگە اسىرىلادى. بۇل قاعيدالار، قۇقىق قورعاۋ جانە ارناۋلى مەملەكەتتىك ورگانداردا باسشى لاۋازىمدارعا ورنالاسۋ ماسەلەلەرىن رەتتەمەيدى.
رەزەرۆكە ىرىكتەۋدىڭ كەزەڭدەرى:
1) قۇجاتتاردى قابىلداۋ (PKRezerv.kz) – 2019 جىلدىڭ 1-30 قىركۇيەگى ارالىعى;
2) قابىلەتتەردى تەستىلەۋ (تالدامالىق جانە سىني ويلاۋ دەڭگەيىن انىقتاۋعا باعىتتالعان، ونلاين تۇرىندە وتەدى) – 2019 جىلدىڭ 12 قازانى;
3) تەستىلەۋدى ۆەريفيكاتسيالاۋ (ونلاين)– 2019 جىلدىڭ 19 قازانى;
4) «الەۋەتتى باعالاۋ» ىرىكتەۋدىڭ كەشەندى كەزەڭى (كوشباسشىلىق قاسيەتتەرى، سىني ويلاۋ، ستراتەگيالىق كوزقاراسى، موتيۆاتسياسى مەن قۇندىلىقتارىن باعالاۋ) بولىپ تابىلادى (جوبانى تانىستىرۋ - 22.-26 قازان، ەسسە جازۋ – 27 قازان، قۇزىرەتتەردى باعالاۋ -28 قازان مەن 3 قاراشا) – 22 قازاننان باستاپ 3 قاراشاعا دەيىن، (ەسسە مەن جوبا – TALANTIZ جۇيەسىندە ونلاين، قۇزىرەتتەردى باعالاۋ جەكە قاتىسۋىمەن وتەدى);
5) ساراپتامالىق كوميسسيانىڭ مۇشەلەرىمەن سۇحباتتاسۋ – 27 قاراشا مەن 13 جەلتوقسان ارالىعى (نۇرسۇلتان قالاسىندا);
6) ۇلتتىق كوميسسيانىڭ وتىرىسى جانە كانديداتتاردى رەزەرۆكە قابىلداۋ – 25 جەلتوقسانعا دەيىن.
ۇلتتىق كوميسسيا كانديداتتاردى بەس جىل مەرزىمگە رەزەرۆكە الۋ تۋرالى شەشىم شىعارادى. ۇلتتىق كوميسسيانىڭ شەشىمىنە سايكەس رەزەرۆكە الىنعان ادامدار بولىنگەن قاراجات شەگىندە قر پرەزيدەنتىنىڭ جانىنداعى مەملەكەتتىك باسقارۋ اكادەمياسىنىڭ باعدارلامالارى بويىنشا قىسقا مەرزىمدى وقىتۋ كۋرستارىنان وتە الادى.
ۇمىتكەرلەر كونكۋرسقا قاتىسۋ ءۇشىن 2019 جىلدىڭ 1-30 قىركۇيەگى ارالىعىندا PKRezerv.kz سايتىندا تىركەلىپ، جەكە كابينەتىن تولىعىمەن تولتىرۋ كەرەك، قاجەتتى قۇجاتتاردى (جەكە كۋالىگى، جوعارى ءبىلىمى تۋرالى ديپلومى، ەڭبەك كىتاپشاسى، ۇسىنىم حاتتارىن) ەنگىزۋ قاجەت.
قۇجاتتاردى تاپسىرعان كەزدە كانديدات رەزەرۆكە ىرىكتەۋدەن ءوتۋدىڭ تارتىبىمەن تانىسادى، ىرىكتەۋدىڭ شارتتارىن قاتاڭ ساقتاۋ جانە ءوزى كورسەتكەن مالىمەتتەردىڭ شىنايىلىعىن قامتاماسىز ەتۋ بويىنشا مىندەتتەمە الادى.
تىركەلۋ كەزىندە كانديدات ءوزى كورسەتكەن ۇيالى تەلەفونى مەن ەل.پوچتاسىنا ءاربىر كەزەڭنىڭ ورنى مەن كۇنى، ناتيجەسى سمس تۇرىندە كەلەدى. جەكە كابينەتىنە ورنالاستىرىلىپ، ءاربىر كەزەڭنەن ءساتتى وتكەن جاعدايدا كەلەسى كەزەڭگە شاقىرتىلادى. جىلدامدىعى 5 مب بولاتىن ينتەرنەتپەن تۇراقتى بايلانىس جانە ۆەب كامەرانىڭ بولۋى مىندەتتى. كونكۋرس كەزەڭدەرىندەگى شىعىنداردى كانديدات ءوزى كوتەرەدى.
«پرەزيدەنتتىك جاستار كادر رەزەرۆىن» قۇرۋداعى باستى ماقسات: جاستار ءۇشىن ءتيىمدى ءارى اشىق الەۋمەتتىك ليفت بولىپ تابىلادى. ۋاكىلەتتى ورگان ءوز حالقىنا ادال قىزمەت ەتۋگە دايىن، دارىندى ءارى ءبىلىمدى جانە تاجىريبەلى جاستاردى «پرەزيدەنتتىك جاستار كادر رەزەرۆىنە» ىرىكتەۋ مۇمكىندىگىن جىبەرىپ الماۋعا شاقىرادى. مۇنداي مۇمكىندىك بولا بەرمەيدى جانە وسى باستاما جاڭا بيىك شىڭداردى باعىندىرۋعا ءبىردىن-ءبىر تاپتىرماس مۇمكىندىك.

قازاقستان رەسپۋبليكاسىنىڭ
مەملەكەتتىك قىزمەت ىستەرى اگەنتتىگىنىڭ
ماڭعىستاۋ وبلىسى بويىنشا دەپارتامەنتى
باسشىسىنىڭ ورىنباسارى
قايرات بايگەباەۆ

پىكىرلەر