اۋىلىنا قاراپ، ازاماتىن تانى!

128

“تۋعان جەر” شىعارماشىلىق بايقاۋىنا قاتىسۋشىلاردىڭ تۋىندىلارىن پاراقشامىزعا جاريالاۋدى باستادىق. كەلەسى كەلىپ تۇسكەن تۋىندى «ۇزدىك ماقالا» اتالىمى بويىنشا قارتايعان ەرعالي اسحاتۇلى.

 

بايلانىس تەلەفونى: 8747 409 41 94

جالپى كوبىنە-كوپ، اسىرەسە، ونەر قايراتكەرلەرى، ءانشى نەمەسە ساياسي بەلسەندىلەر جۇرت جادىندا جىلدام جاتتالىپ، تاريح داپتەرىندە ەسىمدەرى التىن ارىپتەرمەن جازىلىپ جاتاتىنىن بىلەمىز. ال ەڭبەك پەن بەينەتتىڭ ارقاسىندا كەلگەن بەدەلمەن مۇنداي ابىرويعا جەتۋ قيىننىڭ قيىنى. دەيتۇرعانمەن دە بۇگىن تاڭدا وسىنداي ۇدەدەن شىعىپ جۇرگەن جىگەرلى جاندار دا بار. كيەلى اۋليەاتا وڭىرىندە ورنالاسقان شۋ اۋدانىنداعى بەلباسار اۋىلىن ەل-جۇرت قاي كەزدە دە بىرلىگى تارقاماعان بەرەكەلى اۋىل رەتىندە تانىعان. بەرەكەلى دەپ ەكپىن ءتۇسىرىپ ايتۋىمىز دا بەكەر ەمەس. اۋدانداعى جالعىز تىرەك اۋىلى سانالاتىن بەلباسارلىقتاردىڭ بۇگىنگى ىسىنە قاراپ، سۇيسىنبەسكە امالىڭىز قالمايدى. «اۋىلىنا قاراپ ازاماتىن تانى» دەگەن ءسوز بار قازاقتا. راسىمەن دە تۋعان توپىراعىنان جىراقتا جۇرسە دە ءوزىنىڭ تۋىپ-وسكەن اۋىلىن ءوز باسپاناسىن قامداعانداي كەم-كەتىگىن تۇگەندەپ، جىرتىعىن جاماپ، تۇرمىسىن بازارلى ەتۋگە بار كۇشىن جۇمسايتىن ازاماتتار بولادى. تيىسىنشە، بۇنداي اۋىلدان بەرەكەنىڭ تارقامايتىنى دا بەلگىلى. مىنە، وسىنداي ازاماتتاردىڭ بىرەگەيى رەتىندە شۋ اۋدانىنىڭ قۇرمەتتى ازاماتى بولات ساۋرانباەۆتى اتاپ وتۋگە بولادى.
ول شالعاي وڭىرلەردە جاۋاپتى قىزمەتتەردى اتقارا ءجۇرىپ، ءوزى تۋىپ-وسكەن بەلباسار اۋىلىنىڭ الەۋمەتتىك وركەندەۋىنە ولشەۋسىز ۇلەس قوسىپ كەلەدى. بولات وسپانۇلىنىڭ قاجەتتى جەردە اۋىلداستارىنىڭ يگىلىگى ءۇشىن جاسالاتىن كەز كەلگەن ورتاق ىسكە دەمەۋشىلىك تانىتۋدان دا تارتىنىپ قالعان تۇسى جوق. قالتاسى قالىڭداسا ءجۇرىس-تۇرىسى وزگەرىپ شىعا كەلەتىن الدەكىمدەرگە قاراعاندا، كەرىسىنشە جەرلەستەرىنەن ونىڭ تابيعاتى مۇلدە بولەك ەكەنىن ەستيسىز. ولاي بولماعاندا شە؟ ماڭداي تەرىمەن تاپقان اقشاسىن يماندىلىق ورداسىنىڭ بوي تۇزەۋىنە جۇمساپ، الاقانداي اۋىلعا ءزاۋلىم مەشىت سالىپ بەرگەن بولات ساۋرانباەۆقا اۋىلداستارىنىڭ العىستان باسقا ايتارى جوق. ودان قالا بەردى اۋىلداعى ابدەن توزىعى جەتكەن فۋتبول الاڭشاسىن تولىعىمەن سۇرگىزىپ، كولەمى 50-100 مەتردى قۇرايتىن، سوڭعى ۇلگىدەگى جاساندى جابىنى بار ۇلكەن ستاديون سالىپ، ونى اۋىل مەكتەبىنىڭ مەنشىگىنە وتكىزدى. قازىرگى تاڭدا مۇندا فۋتبول ۇيىرمەسى اشىلىپ، ارنايى باپكەر دە بولىنگەن. شۋ اۋدانىندا وتەتىن اياق دوپ جارىستارىنىڭ بارلىعى دا ءدال وسى اۋىلداعى ستاديوندا ۇيىمداستىرىلىپ ءجۇر.
تاعى ءبىر ايتا كەتەرلىگى، وتكەن جىلدىڭ كوكتەمىندە اۋدان تۇرعىندارى تاعى ءبىر تاريحي ءساتتىڭ كۋاسى بولدى. تىكەلەي بولات ساۋرانباەۆتىڭ مۇرىندىق بولۋىمەن بوي كوتەرگەلى جاتقان «بەلباسار» مادەني-سپورتتىق كەشەنىنىڭ قازىعى قاعىلىپ، العاشقى تاسى قالاندى. سونىمەن قاتار، تۇرعىندارعا سپورت كەشەنىنىڭ جوباسى دا تانىسىتىرىلدى. ەكى قاباتتان تۇراتىن نىساننىڭ جالپى كولەمى 2696 شارشى مەتردى قۇرايدى ەكەن. كەشەننىڭ تومەنگى قاباتىندا ورنالاساتىن امبەباپ سپورت زالدا كەلۋشىلەرگە كىشى فۋتبول، ۆوللەيبول جانە باسكەتبول ويىندارىن ويناۋعا مۇمكىندىك بار. ال ەكىنشى قاباتتا بوكس، كۇرەس جانە اۋىر اتلەتيكا زالدارى بولماق. مۇنداعى قۇرىلىس جۇمىستارىن دا ەلىمىزگە بەلگىلى «SHEBERBUILD» قۇرىلىس كومپانياسى جۇرگىزەتىن بولادى. وسى ورايدا اتالمىش كومپانيانى ءدال وسى بەلباسار اۋىلىنىڭ تۋماسى بولات ساۋرانباەۆ باسقارادى. قازىرگى كەزدە سوعىلىپ جاتقان كەشەن اياقتالۋعا جاقىن قالدى. مۇنداعى قۇرىلىس جۇمىستارىنا بولات اعامىز اۋىلدىڭ جەرگىلىكتى تۇرعىندارىن تارتتى. مىنە، ءدال قازىرگىدەي ساعات تۇرماق سەكۋندتىڭ ءوزى ەسەپتەۋلى شاقتا قانشاما جاننىڭ ناپاقاسىن تاۋىپ بەرۋ كەز كەلگەننىڭ قولىنان كەلە بەرمەيتىن ەرلىك دەسەك اسىرەلەگەنىمىز ەمەس. بولات ساۋرانباەۆتىڭ ايتۋىنشا، «بەلباسار» سپورت كەشەنىنىڭ اكىمشىلىك بولمەسى مەن سپورتشىلاردىڭ كيىم اۋىستىراتىن جانە جۋىناتىن بولمەلەرىنىڭ بارلىعى دا حالىقارالىق ستاندارتقا ساي بولماق. «ءبىزدىڭ بالا كەزىمىزدە اۋىلدا مۇنداي سپورت زال تەك ارمان بولاتىن، ول قازىرگى اۋىل بالالارىنىڭ دا ارمانى ەكەنىن بىلەمىز. سوندىقتان، اۋىلداستارىمىزعا كومەك بولسىن دەدىك. قۇرىلىسى ءجۇرىپ جاتقان ۇلكەن نىسانعا قوماقتى قارجى جۇمسايتىنىمىز بەلگىلى. سوعان بايلانىستى، «حاتي ساۋرانباەۆ» اتىنداعى قوردى قۇردىق. الداعى ۋاقىتتا كەز كەلگەن ازامات ءوز شاما-شارقىنشا قۇرىلعان قورعا قارجى سالا الادى. وسى تۇستا، نىساننىڭ قۇرىلىسى تولىعىمەن اياقتالعان كەزدە ەلىمىزگە بەلگىلى بىرقاتار ازاماتتار قولداۋ بىلدىرەتىندىكتەرىن ايتا كەتكەن ءجون. ماسەلەن، ەلىمىزدىڭ داڭقتى بوكسشىسى سەرىك قوناقباەۆ كەشەننىڭ اشىلۋ سالتاناتىندا حالىقارالىق ستاندارتقا ساي رينگتى بارلىق قۇرال-جابدىعىمەن بىرگە سىيعا تارتاتىنىن جەتكىزسە، بوكستان سيدنەي وليمپياداسىنىڭ جەڭىمپازى ەرماحان يبرايموۆ الداعى ۋاقىتتا وسى كەشەننەن وليمپياداعا دايارلاۋ ورتالىعىنىڭ فيليالىن اشۋدى جوسپارلاپ وتىر. سونداي-اق، «قايرات» فۋتزال كلۋبىنىڭ پرەزيدەنتى قايرات ورازبەكوۆ شاعىن فۋتبول الاڭشاسىن جابدىقتاۋدى تولىعىمەن ءوز موينىنا الاتىنىن جەتكىزدى» - دەيدى بولات وسپانۇلىنىڭ ءوزى.
بايقاعانىمىزداي، بەلباسار اۋىلى اۋىزبىرشىلىككە ۇيىعان، قازىنالى قارتى، جالىندى جاسى بار، وزدەرى قالىپتاستىرعان جاقسى ىسكە جۇرت بولىپ جۇمىلا كەتۋدى ساباقتاسقان سالتقا اينالدىرعان اۋىل. جىراقتا تۇرىپ-اق، ىرگەلى جۇمىستىڭ تىزگىنىن ۇستاعان نەمەسە كاسىبىنىڭ تاسىن ورگە دومالاتقان اۋىل تۇلەگى تۋعان اۋىلىنا قايىرىلىپ، بار-جوعىن تۇگەندەۋگە مۇرىندىق بولدى. ىزگى ىسكە ۇيىتقى بولعان ازاماتقا جەرگىلىكتى اكىمدىك پەن تۇرعىنداردىڭ اتىنان العىس ايتىلىپ، قۇرمەت تە كورسەتىلدى. بەلباسارداعى كوپكە ۇلگى بولار ءىستىڭ ءبارى دە اۋىلدىڭ اجارىن تايدىرماي، بەرەكەسىن ساقتاپ وتىرعان بولاتتاي ازاماتتاردىڭ جىگەرى بولسا كەرەك-ءتى. «ۇلى ادامدار تىرلىگىندە ءوز بەينەسىن ءوزى سومدايدى، ال تۇعىرعا كەيىنگى ۇرپاقتارى ورناتادى» دەگەن ءسوز بار. سول ايتپاقشى، ماقالا كەيىپكەرى بولات ساۋرانباەۆ شىنىندا دا بۇگىنگى كۇننىڭ وزىندە حالىققا بەرەرىن بەرە بىلگەن، ءوز بەينەسىن ءوزى سومداعان، ۇلكەن ءىس تىندىرعان ايتۋلى ازامات. ەڭ باستىسى، ول جەرلەستەرىنە ادال قىزمەت ەتتى، ال اۋىلداستارى سۇيىكتى پەرزەنتىنىڭ ەلگە جاساعان ەڭبەگىن ەرەكشە باعالاپ، باسىنا كوتەرىپ قۇرمەت تۇتۋدا.
ءاربىر ادامنىڭ تۋعان جەرى، اۋىلى – جەر بەتىندەگى ەڭ قادىرلى مەكەن ەكەنىن ەشكىم دە تەرىسكە شىعارا الماس. يەن دالادا ەلەگىزىپ قاراپ تۇراتىن شاعىن اۋىلدار ءتول تۋماسىن ۇلكەن ارناعا قوساتىن ۇلى قاسيەتىن ءالى دە جوعالتا قويعان جوق. ىرىسى قوس ەلگە ىرزىق بولعان(قازاق پەن قىرعىز) شۋ وزەنىنىڭ بەلىن باسا ورنالاسىپ، تاريحي تۇلعالار تۋىپ-ءوسىپ تانىلعان، ۇلتتىق سالت-ءداستۇرىمىزدىڭ قايماعىن قالقىپ الارلىقتاي ۇيىپ تۇرعان، ۇلىقتى جەردىڭ ءبىرى بەلباسار دا ءوزىنىڭ ءتول پەرزەنتتەرىن ۇلكەن ارناعا قوسقان مەكەن. سول پەرزەنتتەردىڭ بىرەگەيى، ءبىز جوعارىدا اتاپ وتكەن بولات ساۋرانباەۆ ەكەنى ءسوزسىز. جاسىراتىنى جوق، قازىرگى كەزدە اۋىلدىقتاردىڭ دەنى بەرەكەلى موماقان دالادان يۋ-قيۋى مول، داڭعازا قالاعا كەتۋگە قۇمارتىپ تۇرادى. ال، اۋىلدى جەردى وگەيسىنبەي، تۋعان جەردىڭ ءتۇتىنىن ءتۇزۋ تۇتەتۋدى ءجون كورگەن اۋىل ازاماتتارى تىم سيرەك. سولاردىڭ دا الدىڭعى قاتارىندا بولات اعامىز تۇرعانداي كورىنەدى. قالاي دەگەندە دە اۋىلى ءۇشىن ايانباي ەڭبەك ەتكەن اردا ازاماتتار ەلەۋسىز قالماسا دەيمىز.

پىكىرلەر