ءبىزدىڭ كوشە

77

“تۋعان جەر” شىعارماشىلىق بايقاۋىنا قاتىسۋشىلاردىڭ تۋىندىلارىن پاراقشامىزعا جاريالاۋدى باستادىق. كەلەسى كەلىپ تۇسكەن تۋىندى «ۇزدىك پوەزيا» اتالىمى بويىنشا ادىلەت ورىنباساروۆ.

ساعىنۋ دا...
اڭساۋ شىعار تەگى بۇل،
كەتكەننەن سوڭ ارماندارعا ەرىپ ۇل.
ءۇزدىم نەشە كوز جاسىمدى سونى ويلاپ،
ءبىزدىڭ كوشە- بولەك الەم ەدى ءبىر.

ولەڭىمنەن ساعىنىش كۇي ءسال اڭعار،
ومىرىمە ولەڭ ويلاپ تابام ءدال.
ءار كەسەدە پەيىل تۇنعان،
تۇرادى،
تار كوشەدە كوڭىلى كەڭ ادامدار.

انااۋ جەردە توپىراقتى شاشىپ ەم،
اناااۋ جەردە كورشى اپايدان قاشىپ ەم.
تۇسىنگەنىم،
الىستاعى تۋعاننان،
جاقىنداعى كورشىڭ ارتىق راسىمەن.

ساعىنىپپىن.
كەش ءتۇسىندى سونى اقىن،
تەنتەك بولىپ شىققان جەر عوي مول اتىم.
تۇسكە دەيىن تىنىش جاتقان بۇل كوشە،
تۇستەن كەيىن ازان-قازان بولاتىن.

اڭگىمە ايتىپ، جينايىن دەپ كۇش، تالاپ،
نەمەرەسىن تىسقا قاراي نۇسقاپ اپ.
ءاربىر ۇيدەن ءبىر-ءبىر اجە شىعاتىن،
قولدارىنا ءبىر كورپەدەن ۇستاپ اپ.

ورالماس ءسات اۋىرتادى جاندى ايقىن،
اجەلەر-اي،
كوڭىلدەرى قارداي تىم.
ساياسات پەن سەريالدى ايتقان سول توپتان،
وتكەن-كەتكەن ادام دا تىس قالمايتىن.

بالالار ءماز.
توق زاماندا توق تۋىپ،
تىلدەرى دە بالداي ءارى وتتى، ۋىت.
ءبىر توپ قىزدار جاسىرىنباق ويناپ ءجۇر،
ءبىر توپ بالا بارادى انە دوپ قۋىپ.

قازىر ماعان وسى ۋاقىت ەڭ ەسكى،
ەڭ ەسكى دە...
ساعىم كەزەڭ، كومەسكى.
ءبىر توپ ەركەك - ايتقاندارى فۋتبول دا،
ءبىر توپ ايەل- شاققاندارى شەمەشكى.

بالالىعىم!
جانىمدى اركەز قاجايدى،
سول كوشەدە وتكىزگەسىن از ايدى.
جىلدار سالدى كوشەمىزگە وزگەرىس،
اجەلەردىڭ سانى ءبىراز ازايدى.

راس بولىپ تۇر اجەم ايتقان دەرەگى،
ء"بالدۋ-ءبالدۋ ءبارى وتىرىك" دەگەنى.
دوپ قۋاتىن بالالاردىڭ ورنىنا،
"كومپيۋتەرباس" ءسابي ءوسىپ كەلەدى.

ءبىزدىڭ كوشە!
بولەك الەم-راسىن ۇق.
سول كوشەدە شاتتىق قالدى شاشىلىپ.
كوشەمىزگە اسفالت سالىپ تاستاپتى،
بال ءساتىمنىڭ ءىزىن تۇگەل جاسىرىپ.....

پىكىرلەر