ەسكى قارا پالتومدى كيىپ الىپ....

63

“تۋعان جەر” شىعارماشىلىق بايقاۋىنا قاتىسۋشىلاردىڭ تۋىندىلارىن پاراقشامىزعا جاريالاۋدى باستادىق. كەلەسى كەلىپ تۇسكەن تۋىندى «ۇزدىك پوەزيا» اتالىمى بويىنشا سىمبات ساعىندىق دۇيسەنبايقىزى.

 

بايلانىس تەلەفونى: 

 

جۇرگەندە قايعى وتىنا كۇيىپ جانىپ،
ءاي، ءومىرىم كەلەمىن سىيىڭدى الىپ.
جولسىزبەنەن كەشكىلىك كەزىپ كەتەم،
ەسكى قارا پالتومدى كيىپ الىپ...
كەزدەر از با كوڭىلىم مۇڭ قارماعان،
قايعى - دوسىم، ساتسىزدىك سىڭار ماعان.
تاس بوپ قاتقان اتامنىڭ بەيىتىنە،
ءۇش جىل بولدى مەن ءالى ءبىر بارماعام...

مىناۋ اجەم سىيلاعان الا جەمپىر،
قوڭداۋ ەتىپ توقىعان، ءالى كەڭ تۇر.
ۇنەمى سوقا باسى قارا شالمەن،
قارا وشاق قاسىندا قارا كەمپىر...

ءسال سۇرىنسەڭ دۇشپان مەن دوس كۇلەدى،
ءتىرى جۇرسەم - انامنىڭ اق تىلەگى!
سۋىرىپ جۇرەگىمدى بەرگىم كەلەد،
اكەمنىڭ اۋىرعاندا ەت جۇرەگى...

بىلمەيمىن باق الام با، سور الام با؟!
كەۋدەڭدى ۇسكىرىك مۇڭ توناعاندا.
مەن قاتتى قوبالجيمىن... ماماتايىم،
ءۇمىتتى كوزدەرىمەن قاراعاندا...

كەۋدەگە اششى وكسىك جيىپ الىپ،
جۇدىرىقتى تاستاي عىپ ءتۇيىپ الىپ،
تۇمان ويعا بەرىلىپ كەزىپ كەلەم،
ەسكى قارا پالتومدى كيىپ الىپ....

پىكىرلەر