جەدەل-جاردەم

253

“تۋعان جەر” شىعارماشىلىق بايقاۋىنا قاتىسۋشىلاردىڭ تۋىندىلارىن پاراقشامىزعا جاريالاۋدى باستادىق. كەلەسى كەلىپ تۇسكەن تۋىندى «ۇزدىك پوەزيا» اتالىمى بويىنشا زەينوللاقىزى مەرەكە.

 

بايلانىس تەل: 8 707 763 78 63
پوشتا: merekezhan_20@mail.ru

 

 

ايالداما. اۆتوبۋس. ۇيگە ءبارى اسىق تۇر.
باتۋىنا اسىقتى كەمەرىنەن اسىپ كۇن.
دابىلىمەن جاڭعىرتقان جەدەل-جاردەم كومەگىن-
كەشىكتىرمەي ۋاعىندا ىزدەگەنگە اسىقتىر.

جانىمداعى كۇرسىندى اق سامايلى ەگدە ايەل،
«اسىققاندا جەتپەيدى ۋاقىتىندا بۇل «بالەڭ»،
ءبىر جىل بۇرىن جاردەمى كەشىگىپ كەپ سۇم اجال-
وتاعامدى ويدا جوق قاۋىشتىردى جەرمەنەن».

مەزەت تۇرعان جانىندا قىزدىڭ كوزىن جاس ەتتى،
«بىزگە كەلگەن جاردەمنىڭ ۋاقىتىن دا كەش ەتتى،
تىنىسىنان تارىلعان اكەشىمدى اي بۇرىن،
ەمگە ەمەس اجالدىڭ قۇشاعىنا اكەتتى».

وتكەن كۇننىڭ ەلەسى-جۇرەكتەردى جاسىتقان،
كەپتەلىستى باقىلاپ بىزدەر تۇرمىز قاشىقتان.
كوز الدىمدا تاعى ءبىر ادامىنا جەتە الماي،
جەدەل-جاردەم كەپتەلىپ، اجالى تۇر اسىققان.

جالعانا ما بىرەۋدىڭ ءومىرىنىڭ ءان-جىرى،
اتتەڭ، مىنا ۋاقىتتىڭ تىم ماردىمسىز ازدىعى.
ءومىر مەنەن ءولىمنىڭ كوپىرىنىڭ بويىندا-
ءبىر ادامنىڭ قولىندا-ءبىر ادامنىڭ تاعدىرى.

اجالعا كىم قيادى زامانداسىن، قانداسىن،
ويناتپاسىن ويدىمىن، قامداماسىن ايلاسىن.
تاعدىر دەگەن تورابى تىلسىم جولدىڭ بويىندا-
ءومىر باعدارشامىنىڭ قىزىل ءتۇسى جانباسىن.

پىكىرلەر