قازاقستاندا كوپبالالى انالارعا ارنايى كۆوتا بولىنەدى

315

كوپبالالى، تولىق ەمەس، مۇگەدەك بالا تاربيەلەپ وتىرعان وتباسىلار، "التىن القا", "كۇمىس القامەن" ماراپاتتالعان انالارعا ءبىلىم گرانتى ءبولىنۋى مۇمكىن

مينيسترلىك حالىقتىڭ الەۋمەتتىك وسال توپتارىن قولداۋ ماقساتىندا كوپبالالى، تولىق ەمەس، مۇگەدەك بالالاردى تاربيەلەپ وتىرعان وتباسىلار، "التىن القا", "كۇمىس القامەن" ماراپاتتالعان انالار ءۇشىن ءبىلىم گرانتىن بەرۋ بويىنشا كۆوتا ءبولۋدى كوزدەپ وتىر.

"كوپبالالى انالار ءۇشىن ارنايى كۆوتا بولادى دەپ جوسپارلاپ وتىرمىز. ەگەر ولار جوعارى ءبىلىم الۋ ءۇشىن وقۋعا تۇسكىسى كەلسە، ولارعا كۆوتا ءبولۋىمىز كەرەك. قازىر ماسىلدىققا جول بەرمەۋ، جۇمىسقا تارتۋ جايلى كوپ ايتىپ ءجۇرمىز عوي. وسى تۇرعىدان العاندا، بۇل ماڭىزدى ءىس-شارا دەپ ويلايمىز", - دەدى ايماعامبەتوۆ ماجىلىستە "پەداگوگ مارتەبەسى تۋرالى" زاڭ جوباسىن تانىستىرۋ كەزىندە.

ايتۋىنشا، كۆوتا ءبولۋ كەزىندە كونكۋرستىق ىرىكتەۋ قاعيداتى ساقتالادى. مۇنىڭ ءبارى زاڭ جوباسى دەپۋتاتتار تاراپىنان قولداۋ تاۋىپ، قابىلدانعان جاعدايدا عانا ىسكە اسادى.

بۇدان بولەك، مينيستر بالا قۇقىقتارىن قورعاۋ تەتىكتەرىنە دە توقتالدى. ول ەلباسى نۇرسۇلتان نازارباەۆتىڭ ازاماتتىق فورۋمدا بالا اسىراپ الۋعا قاتىستى بەرگەن تاپسىرماسىن ەسكە سالدى.

ء"بىزدىڭ ۇسىنىسىمىز اگەنتتىكتەر جايلى. ەندى بالا اسىراپ الاردىڭ الدىندا، ونى ءوز قامقورلىعىنا الاتىن ادامدار مىندەتتى تۇردە ءتيىستى دايىندىقتان ءوتۋى كەرەك. ويتكەنى، قازىر بايقاپ وتىرعانىمىزداي، بالا اسىراپ العاننان كەيىن، ولاردىڭ 10-11 پايىزى قايتادان قايتىپ كەلىپ جاتادى. بۇل وتە قيىن جاعداي. سوندىقتان وسى ينستيتۋتتاردى قولدانۋىمىز كەرەك دەپ سانايمىز", - دەدى ول.

ايماعامبەتوۆ بالا اسىراپ الۋ اگەنتتىكتەرىنىڭ حالىققا تەگىن قىزمەت كورسەتەتىنىن اتاپ ءوتتى.

 

Sputnik قازاقستان

پىكىرلەر