وزگە ۇلتتارعا گرانت بەرۋ ۇكىمەتتىڭ ساياسي جوسپارى

251

گرانتتار سانى ارتۋدا. وتە كوپ. 30 مىڭنان، 55 مىڭعا جەتتى. جىل سايىن سانى ارتىپ كەلەدى. مەملەكەت گرانت سانىن ارتتىرۋ ارقىلى رەسەي مەن قىتايعا وقۋعا كەتەتىن جاستاردىڭ اعىمىن ۇستاپ قالعىسى كەلەدى. ويتكەنى ولاردىڭ سانى تىم كوبەيىپ كەتتى. 70 مىڭ دەيدى ءبىر دەرەكتە. مۇمكىن. يدەولوگيالىق تۇرعىدان ۇستاپ قالۋ ارينە دۇرىس، الايدا ءدال وسى جول ارقىلى ما؟

مىسالى رەسەيگە كەتەتىن جاستاردىڭ باسىم بولىگى سلاۆيان تەكتەس ۇلتتار. ولاردىڭ 90% سول جاققا بارىپ، كەرى قايتپايدى. سوندا قالادى. تاريحي وتاندارىنا ءبىرجولاتا كەتەدى. سولتۇستىك كورشىمىزگە وقۋعا بارىپ، ءبىلىم الىپ جۇرگەن قازاق جاستارى دا از ەمەس. ولاردىڭ كوبىسى قايتىپ كەلەدى.

ەكىنشى باعىت رەتىندە سوڭعى ۋاقىتتا قىتايعا بارۋشىلار ارتتى. بۇل قىتايدىڭ جالپى ساياسي-ەكونوميكالىق ءدۇمپۋىنىڭ قارقىندى بولۋىمەن بايلانىستى. ارينە، گەوساياسي جوسپارلارى دا جوق ەمەس. ملرد قىتايدىڭ اراسىنان دا ميلليوندارى وقۋ وقي الماي جاتقان ساتتە، وزگە ۇلتتارعا گرانت بەرۋى دە ساياسي ءبىر جوسپار. وزگە ۇلتتارعا جاعىمدى يميدج قالىپتاستىرۋدىڭ ءبىر ءتاسىلى.

سوندىقتان بۇل تۇرعىدان العاندا گرانتتى كوبەيتۋ يدەولوگيالىق تۇرعىدان دۇرىس قادام. قىتايدىڭ جانە رەسەيدىڭ مي شايۋ يدەولوگياسىنا قاراعاندا، ءوز ەلىمىزدە ءجۇرسىن دەگەن ويدان تۋىنداعان. مەملەكەت ونى اشىق ايتپاسا دا، پيعىلىن وسىلاي تۇسىنۋگە بولادى.

بىراق باستى سۇراق بىرەۋ: اقتالا ما؟ قازاقستاندا قالسىن دەپ، نارىقتا سۇرانىسقا يە ەمەس نەمەسە ستۋدەنت ءبىتىرىپ شىققانشا ومىرشەڭدىگى ۋاقىت تابىتىندا جاتاتىن ماماندىقتارعا دا ءۇيىپ گرانت بولە بەرۋ دۇرىس پا؟ نارىقتى زەرتتەمەي، ونجىلدىقتا قاجەت بولار ماماندىقتار بويىنشا سوتسيولوگيالىق زەرتتەۋ جۇرگىزبەي (جۇرگىزىلگەندەرىن ەسەپكە الماي) گرانتتى جاۋعان قارداي شاشا بەرۋ راتسيونالدىقپەن قول ۇستاسا ما؟

مەنىڭ ويىمشا بۇل بولاشاقتا ۇلكەن ءدۇمپۋ تۋىنداتادى. قازىر ستيپەنديامەن جۇبانىپ، گرانتپەن قۋانىپ جۇرگەن ستۋدەنت، ەرتەڭ تەككە كەرەگى جوق ماماندىقپەن جۇمىس تاپپاعان ساتتە ءبىرىنشى فەيسبۋكتە اشۋ شاقىرادى، ارتىنشا كوشەگە شىعادى. كىنا كىمنەن؟ گرانتتى بولگەندە نارىقتى زەرتتەمەگەن بيلىكتەن.
نارىقتى زەرتتەمەي گرانت بولە سالۋ، اتاۋلى الەۋمەتتىك كومەكتى باي ادامعا اپارىپ بەرە سالۋمەن تەڭ. پايداسىز.

اسحات قاسەنعالي

"ادىرنا" ۇلتتىق پورتالى

پىكىرلەر