قازاقتا ورتاق ۇستانىم قالىپتاسپاعان

186

بۇرىننان دا كۇدىگىم بولاتىن. بىراق ەلگە كەلگەلى ءبىراز تۇلعالارمەن ارالاسىپ كوزىم جەتىپ كەلەدى.

1. جۇيەگە قارسىمىز، وزگەرىس كەرەك دەگەن ازاماتتار ءبىر ماقساتتى كوزدەيدى. ول - جۇيەنى اۋىستىرۋ. بىراق وزگەرىس دەپ ايتادى دا سول جولدا وزدەرىنىڭ باسى بىرىگە المايدى. مىسالى، ونىڭ ءتىل تۋرالى پوزيتسياسى ۇنامايدى دەيدى دە ءبىر-ءبىرىن جەك كورىپ كەتە سالادى. ۇلكەن بوپە سەكىلدى كادىمگى. ەرتەڭ بيلىككە كەلسە قالاي ەل باسقاراتىنى ۇلكەن سۇراق...

2. ەكىنشى كەمشىلىك، جۇيە كەتكەننەن كەيىن نە ىستەۋ كەرەك دەگەندە ارقايسىسى ءار جاققا تارتادى. قاراپ وتىرساڭ جۇيە كەتسە ارى قاراي ولاردا ورتاق ماقسات جوق. جان-جاققا تارتىپ، قىرىق پىشاق بولۋعا دايىن. بىرىكتىرەتىن يدەيا، ەلدىڭ كەلەشەگىنە قاتىستى ءبىر ورتاق ۇستانىم قالىپتاسپاعان. بۇل جاقسىلىق ەمەس. ەرتەڭ جۇيە حالىقتىڭ كۇشىمەن كەتسە، بۇلار ەل باسقارۋعا جەتسە جۇلىپ جەيدى ءبىرىن ءبىرى.

3. كەيبىر ەل سەنگەن ازاماتتاردىڭ ويى تىم قارابايىر. الەم قايدا بارا جاتىر، ءبىز قايدا شارۋاسى جوق. ۇساق-تۇيەك اڭگىمە. اڭگىمەسىنەن ءىشىم پىسىپ كەتكەن دە كەزدەرىم بولدى.

4. مەنىڭ تاڭ قالعانىم ءسال وزگەشە ويلارعا ءلۇپىل باسۋعا قورقاتىن دا ازاماتتار بار ەكەن.

5. كىمنىڭ كىمگە ءلۇپىل باسقانىن ساناپ وتىراتىن تيپتەر دە بار.

6. سۋرەتكە ءتۇسۋ قازاقستاندا قاۋىپتى ەكەن. مىسالى، اقش-تا وباما مەن ترامپ كوفە ءىشىپ، گولف ويناپ، سۋرەتكە ءتۇسىپ جۇرە بەرەدى. بىراق ەكەۋى ءوز پارتياسىن ساتىپ وباما رەسپۋبليكاعا، ترامپ دەموكراتتارعا ءوتىپ كەتپەيدى. بىزدە "نۇر وتانمەن" سۋرەتكە تۇسسەڭ شارۋاڭ ءبىتتى. ساتقىنسىڭ. مۇمكىن  مەن جاي كوفە ءىشتىم، سۋرەتكە ءتۇستىم، پىكىر الماستىم ءبىتتى سونىمەن. جوق، سەنى ساتقىنعا بالايدى. سۋرەت دالەل. مىنە فاكت. ءسابيدىڭ ويلاۋ دارەجەسى. ونىمەن قويماي ەل باسقارعىسى كەلەدى. ەكى ءتۇرلى ساياسي كوزقاراستاعى قازاقتىڭ بالاسى بىرگە كەزدەسىپ، ءشاي ىشپەۋ كەرەك بولىپ تۇر عوي سوندا.

وزگەرىس كەرەك دەپ جاتقان ازاماتتاردىڭ سوزدەرى ارينە ەلگە جاعادى. بىراق داۋلاسا بەرمەي بىرىگۋدى، كەلەشەكتە نە ىستەيمىز دەگەن پوزيتسيادا ورتاق ۇستانىم قالىپتاستىرۋى كەرەك-اق. بىرەۋلەرگە ۇناماۋى مۇمكىن بىراق دەڭگەي مەن دۇنيەتانىمدى ءوسىرۋ ءۇشىن دە ءبىراز ەڭبەكتەنۋ كەرەك. بۇل شىندىق. قازىر ابدەن شارشاعان قوعامعا قاجەتتى سوزدەردى ايتىپ، ابىروي جيناپ جاتقانمەن شىنايى ساياسي مادەنيەتى، دەڭگەيى ارتتا قالىپ قويعان تۇلعالار كوپ.

وسى جازبانى وقىپ شىققاننان كەيىن مەنى ساتقىن دەيتىندەر دە شىعادى. سەبەبى بىزدە بيلىكتى جاماندادىڭ با سوڭىنا دەيىن جامانداۋ كەرەك. مىنا جاققا تيمەۋ قاجەت. مەنىڭ ويىمشا ازاماتتىق قوعامداعى تۇلعالاردىڭ دا وزدەرىمەن جۇمىس ىستەپ، دەڭگەيلەرىنىڭ وسكەنى كەرەك.

 

باۋىرجان سەرىكباەۆ

"ادىرنا" ۇلتتىق پورتالى

پىكىرلەر