مەملەكەتتىك قۇپيا اقپارات جاريالاندى

1227

قاراعاندى قالاسىندا 4 مىڭ وقۋشى 30 مىڭ تەڭگە كولەمىندە اقشالاي كومەك الدى. تەمىرتاۋ قالاسىنىڭ مەكتەپتەرى 28 مىڭ تەڭگە، اقتاس 14 مىڭ تەڭگەدەن بەردى.

قاراعاندى وبلىسىندا بيىلعى وقۋ جىلىندا تۇرمىسى تومەن وتباسىلاردان شىققان وقۋشىلارعا كومەك كورسەتۋ ماقساتىندا 1,4 ملرد تەڭگە ءبولىندى. ول قاراجاتتى ۆسەوبۋچ دەپ اتايدى.

ۆسەوبۋچ دەپ تۇرمىسى تومەن وتباسىلاردىڭ وقۋشىلارىنا تەگىن تاماق پەن كيىم-كەشەك، كەڭسە تاۋارلارىنا، لاگەرگە بولىنگەن قاراجاتتى ايتادى. قاراجاتتى جەرگىلىكتى مəسليحات بەكىتەدى. ۆسەوبۋچقا مەكتەپ قورىنىڭ 1-دەن 3-كە دەيىنگى پايىز قارجىسى بولىنەدى. اقشانىڭ ءبىر بولىگى تەگىن تاماققا، ءبىر بولىگى بالانى كيىندىرۋگە بەرىلەدى.

نۇر-سۇلتان قالاسىندا جەتى مىڭ وقۋشىعا 30 مىڭ تەڭگەنىڭ سەرتيفيكاتى بەرىلدى. كيىم ساتاتىن بەس دۇكەنمەن كەلىسىمشارت جاسالعان. اتا-انالار سەرتيفيكاتىمەن بارىپ، تەك سول دۇكەندەردەن بالالارىن كيىندىرۋى ءتيىس. الايدا ول دۇكەندەردەگى كيىمدەردىڭ رازمەرلەرى كەلمەي، اتا-انالار نارازىلىق تانىتتى. وسى كەمشىلىكتەردى ەسكەرە كەلە، قاراعاندى قالاسىنىڭ ءبىلىم ءبولىمى ۆسەوبۋچتى اقشالاي بەرۋگە شەشىم قابىلدادى.

وسىعان دەيىن وسى ماقساتقا بولىنگەن قارجىنىڭ قايدا جۇمسالعانىن بىلمەيمىن. ۆسەوبۋچ ۇكىمەتتىڭ 2008 جىلعى ءنومىرى 64 جارلىعىمەن بەكىتىلگەن الەۋمەتتىك كومەك. جىلدا وقۋشىلاردى كيىندىرۋگە ارنالعان قاراجات تەندەر ارقىلى يگەرىلىپ كەلگەن. تەندەردە كىم تومەن قارجىنى كورسەتەدى، سول ۇتىپ الىپ، ساپاسىز، ءبىر كيۋگە كەلمەيتىن، رازمەرى شاق ەمەس كيىمدەرمەن مەكتەپتەردى قامتاماسىز ەتىپ كەلگەن دەيدى بىلەتىندەر. بيىل وبلىس اكىمى ەرلان جاقانۇلىنىڭ ارالاسۋىمەن وسى قارجىنى تىكەلەي اتا-انالارعا جەتكىزۋگە شەشىم قابىلداندى. اتا-انالار ۆسەوبۋچقا بولىنگەن قاراجاتقا بالانى وزدەرى كيىندىرسىن دەگەن توقتامعا كەلدى. ماسەلە قاراعاندى قالاسى دەڭگەيىندە دەرەۋ شەشىمىن تاپتى. وعان قاراعاندى قالاسى ءبىلىم ءبولىمىنىڭ باسشىسى گۇلسىم شابدەنقىزىنىڭ جىلدام شەشىم قابىلداپ، بارلىعىنا ۇلگەرەتىن ىسكەرلىك قابىلەتى دە نەگىز بولدى.

دەگەنمەن، وبلىس بويىنشا ماسەلە شەشىلمەگەن كۇيى قالدى. وعان دالەل، اۋداندار مەن قالالاردىڭ ۆسەوبۋچ ماسەلەسىندە ءارتۇرلى شەشىم قابىلداپ، كەيبىر اۋدانداردىڭ وبلىس ورتالىعىنداعى جاڭالىقتان تىس قالۋى. ماسەلەن، قارقارالى اۋدانىندا ۆسەوبۋچ ءۇشىن 10 مىڭ، ال نۇرا اۋدانى 9 مىڭ تەڭگە ءبولۋدى جوسپارلاپ وتىر. اقشا تىم از، سۇراق كوپ. بىراق بۇل اۋداندار تەندەردەن باس تارتىپ، جاڭا قادامعا باردى. ال ىرگەدەگى اباي اۋدانى مەن قاراجال، جايرەم قالالارى بۇرىنعىداي، مەكتەپتەر كيىمدى وزدەرى بەرەدى دەپ شەشكەن. ءتيىپ تۇرعان بۇقار جىراۋ اۋدانىنىڭ بۇل ماسەلەدەگى كوزقاراسىن مۇلدەم بىلمەيمىز. وسى ازعانتاي اقپاراتتىڭ ءوزىن مەن تىزەگە سالىپ، اۋداندارداعى ارىپتەستەرگە حابارلاسىپ زورعا الدىم. سەبەبى وبلىستىق ءبىلىم باسقارماسىنىڭ باسشىسى يمانعاليەۆ مىرزا ءبىر ايعا جۋىقتادى، ماعان ۆسەوبۋچ تۋرالى اقپاراتتى بەرمەي وتىر.

مەن قابىلداۋىنا بارعان كۇنى باسقارما باسشىسى اباي اۋدانىندا ۆسەوبۋچتى ءماسليحات 5 قىركۇيەك كۇنى قارايدى، سىزگە حابارلايمىز دەگەن. بۇگىن 17 بولدى، تىم-تىرىس. ەگەر جۋرناليست مەن اقپاراتتى الا الماسام، قاراپايىم اتا-اناعا بۇل اقپاراتتار قولجەتىمدى مە؟ الدە بۇل اقپارات مەملەكەتتىك قۇپيا ما؟

جاڭا وقۋ جىلىندا ۆسەوبۋچقا وبلىستا 1,4 ملرد تەڭگە ءبولىنىپتى. ونى پرەزيدەنت جولداۋىن تالقىلاعان اكتيۆتە ەستىدىك. ال، وبلىستىق ءبىلىم باسقارماسىنىڭ باسشىسى يمانعاليەۆ مىرزا اۋداندار مەن قالالارعا قانشا قارجى بولىنگەنى تۋرالى اقپاراتتى قىزعىشسا قورىپ الەك. اقپارات جابىق بولسا، كۇمان تۋى زاڭدىلىق.

وبلىستىق ءبىلىم باسقارماسىنىڭ ۆسەوبۋچكە قاتىستى ساياساتىندا بىرىزدىلىك جوق. ماسەلەن، وتكەن وقۋ جىلىندا ۆسەوبۋچقا اباي قالاسىندا 0,9, جەزقازعان قالاسىندا 2,9, قاراعاندى قالاسىندا 1,2 پايىز قارجى جۇمسالعان. ءار اۋداننىڭ الەۋمەتتىك جاعدايى ءار قيلى ما؟ نەگە بولىنەتىن قارجى جۇيەلەندىرىلمەيدى، نەگە پايىزى ءارتۇرلى؟ نەگە ءبىر اۋدان كيىم بەرەدى، ال كەلەسى اۋدان اقشالاي بەرەدى؟

PS:

ۆسەوبۋچتى تۇرمىسى تومەن كەز كەلگەن وتباسىنىڭ وقۋشىسى الادى.

جالاقى مەن جاردەماقىلاردى قوسقاندا وتباسىنىڭ تابىسى əر مۇشەسىنە شاققاندا 29698 تەڭگەدەن از وتباسىلاردىڭ əر وقۋشىسىنىڭ ۆسەوبۋچ الۋعا قۇقى بار. Əر وقۋشىعا جەكە قۇجات تاپسىرىلادى.

مەكتەپ-ينتەرناتتاردىڭ وقۋشىلارىنا ۆسەوبۋچ قاراستىرىلماعان.

ۆسەوبۋچقا تاپسىراتىن قۇجاتتار ءتىزىمى:

1. اتا انانىڭ جەكە كۋالىكتەرىنىڭ كوشىرمەسى،

2. اتا-انانىڭ سوڭعى 6 ايداعى تابىسى كورسەتىلگەن جالاقى تۋرالى انىقتاما،

3. حقو-دان جاردەماقى الاتىندىعى تۋرالى انىقتاما،

4. ءار بالانىڭ تۋ تۋرلى كۋالىكتەرىنىڭ كوشىرمەسى،

5. ەگەر جالعىزباستى انا بولسا ف- 4,

6. ەگەر، اتاۋلى كومەك السا، الاتىندىعى تۋرالى انىقتاما،

7. قارجى اۋدارىلاتىن بانك كارتوچكاسى تۋرالى انىقتاما.

وسى قۇجاتتاردى əركىم ءوز مەكتەبىنىڭ سوتسپەداگوگىنا تاپسىرادى.

 

ءلاززات قوجاحمەت

"ادىرنا" ۇلتتىق پورتالى

پىكىرلەر