توپىراق

879

“تۋعان جەر” شىعارماشىلىق بايقاۋىنا قاتىسۋشىلاردىڭ تۋىندىلارىن پاراقشامىزعا جاريالاۋدى باستادىق. كەلەسى كەلىپ تۇسكەن تۋىندى «ۇزدىك ماقالا» اتالىمى بويىنشا اسىلبەكوۆا دانا اسىلبەكوۆنا.

 

بايلانىس تەلەفونى: +77758220116

 

 

تۋعان جەرىن سۇيمەي تۇرىپ سۇيمەك ەمەس عالامدى.

مۇحتار شاحانوۆ

    «تۋعان جەر» ءسوزى قازىر ادامدار اراسىندا ايتىلاتىن ستاندارتتى ءسوز بوپ قالعانى وكىنىشتى. ءتىپتى سەزىمدىك قۇندىلىعى دا جوعالعانداي. بۇگىنگى كۇنى «تۋعان جەردى ساعىندىم» دەپ بوزداعان جاندى كورۋ نەعايبىل. قاسيەتسىز ادام تۋعان جەردەن الىس بولسا، كەتكەنىنە ابدەن قۋانادى. تۋعان جەرىن اڭساماعان ادامنىڭ، سول جەردە قالعان ەستەلىكتەرىن دە ويعا الماۋى وسىدان ايقىندالار. ەستەلىكتەرگە قيانات جاساۋ ءوز وتكەنىڭدى ولتىرگەنمەن تەڭ ەمەس پە؟! وعان قيانات ەتكەنىڭ و دۇنيەدەگى توزاقتىڭ جەردەگى نۇسقاسىمەن تەڭدەس. سەزىنۋ ءۇشىن قاسيەتسىز بوپ ۇيرەنىڭىز.

ءوز ورتامدا ەش الاڭسىز ادەبيەتشى بوپ قىزمەتتە جۇرگەن مەنى وسى ءبىر وقيعا جۇرەگىمدى قوزعاماي قويمادى. بۇگىنگى كۇنى تىڭ نارسە جازۋ وڭايعا سوقپايدى. ادامدار ءبىرىنشى ورىننان سەزىم مەن ادامگەرشىلىكتى ىسىرعان مىنا ۋاقىتتا، وسى ءبىر قاسيەتتەردى قازىرگىلەرگە از دا بولسىن جەتكىزە الۋ قيىن. بۇل داپتەردى پوليتسەيلەر توبى تيراندىق بيلىك قيراعاندا، بەيبىت تۇرعىندارعا بەيمالىم بولعان ەلدىڭ باتىس وڭىرىندەگى 30 جىلعا سوزىلعان شەكارالىق سوعىستا جابىق زونادان تاۋىپ العان ەكەن. جابىق زونا باتىس اۋدانىمىزدىڭ سولتۇستىك-باتىس تۇسىنداعى  شەكارادا ورنالاسقان ەكەن. ساراپتامادان وتكەن سوڭ، ارنايى شەشىم ارقىلى وسى داپتەردى ءوز يەلىگىمە الدىم. داپتەر يەسىنىڭ اتى-ءجونى داپتەردە كورسەتىلمەسە دە، جازبا ارقىلى ول اداممەن تانىسا الاسىزدار. كۇندەلىكتى وقي وتىرا، ونى ءوزىمنىڭ اۆتورلىق شىعارمام ەتكىم كەلدى. سوعىس مەرزىمى 2056-87 جىلداردى قۇرادى، ال كەيىپكەردىڭ باستان كەشكەن ۋاقىتى 2080-86 جىلداردىڭ توڭىرەگىندە.

***

6 جىل بويى شەكارادا مەملەكەتكە قىزمەت ەتتىم. 20 جاسىمدا قالاي ەكەنى بەلگىسىز وسى جەردە شەكاراشى بوپ وياندىم. 2079-دىڭ سوڭعى ايلارىندا ارنايى «قورعانىس» جوباسىمەن وسى جۇمىسقا كەلىپپىن. اۋداننىڭ اۋماعىنان شىقپاق بولعان ادامدى كەمىندە 2 اپتا تەكسەرىپ، اۋماقتان وتكىزەتىنبىز. شەكارادان تەك پورتالدار ارقىلى شىعۋعا بولادى. بۇل اۋداندا پورتالدىڭ 17-ءسى بار. مەن №06 پورتالدى كۇزەتەمىن. بۇل ەڭ كوپ ادامداردى وتكىزەتىن پورتالدىڭ ءبىرى. پورتالسىز اۋداننان قاشۋ تۇك تە مۇمكىن ەمەس. سەبەبى، تەمىر قامالدار ادامداردى وڭايلىقپەن شىعارىپ جىبەرمەيدى. 2 اپتا كولەمىندە اۋماقتان شىعاتىن ادامنىڭ 7 باباسى دا تەكسەرىلىپ، ارنايى ساۋالنامادان وتەدى. بۇنىڭ ءبارىن ادامدار ەمەس، سوڭعى جيىرما جىلدىقتىڭ جەمىسى بولعان «بوتتار» ىستەيدى. تۇرلەرى ادام ىسپەتتەس بولعانمەن، IQ شاماسى بىزدەن الدەقايدا كوپ. بىزدەن دە كوپ نارسەگە شامالارى جەتەدى. ءتىپتى ءتورتىنشى باباڭ الاياق بولعان بولسا دا، الگى بوتتاردى الداپ سوعۋىڭ قيىن-اق. وندايىڭدى تاپسا، اۋماقتان شىقپاق تۇگىلى ءۇيىڭدى دە تاپپايسىڭ. الگى پورتال ارقىلى وتكەن ادام ماقساتىنا جەتكەن باقىتتى ادام دەرسىڭ. تەك تەكسەرىستەن امان شىققاندار عانا بۇل ايماقتان كەتە الاتىن. مەن كۇزەتكەن ايماقتان كوشىپ كەتۋشىنىڭ دەنى بالالار مەن ايەلدەر بولسا، كەلەتىندەر ەرلەر عانا. ءوز ەركىمەن پورتالدان ءوتۋدى قالايتىن بايلار بولاتىن. بىراق باي دەگەننىڭ وزىندە، بايلىعى مول ادام مەن ويانعان ءبىر-ەكى جىلدىڭ كولەمىندە جوق بولدى. مەن تۇرعان اۋداندى ءتىپتى ارالاپ كورمەگەنمىن. قىزمەتتەن تىس ءبىزدى اينەكتى كاپسۋلاعا سالىپ قوياتىن. ەنەرگيامىزدى تولتىرىپ، تاڭ اتا قايتا كۇزەتكە تىكەدەن تۇرعىزاتىن. تاڭ اتا دەيمىن-اۋ، مەن ءتىپتى تاڭنىڭ اتۋىن 6 جىل بويى كورمەدىم. ءتىپتى قازىر كۇن بار ما ءوزى؟!

التى جىل بۇرىن وسىندا 20 جاسىمدا كوزىمدى اشقاندا، ءدال سول كاپسۋلادا ويانعان ەدىم. ول كەزدە ءتىپتى مەنىڭ اتىم دا بولمادى. كەشىرىڭىز، ءبىز تانىسپاپپىز دا عوي. مەنىڭ ەسىمىم قازىر ۆ-74. شەكاراشىلاردىڭ ءبارىنىڭ ەسىمى وسىلاي بولاتىنىن ماعان دوسىم ا-79 ايتقان. ونىمەن دە تانىستىرماپپىن. مەنىڭ دوسىم — ا-79. وتە ارمانشىل جانە وتە اقىلدى. مەن مۇندا كوز اشقالى ول ماعان تالاي سىر شەرتتى. العاش ءوز كاپسۋلاسىندا ويانعاندا 18 جاستا بولعان. 18 جاسىنان وسى شەكارا قىزمەتىندە. مەن بۇل قىزمەتتە التى جىل عانا بولسام، ول توعىز جىل بولعان. ول دا ويانعاندا تۇك ەسىندە بولماپتى. ءبىز ءبارىمىز تاعدىرلاسپىز دەسەك تە بولار. ول:

- ءبىز بۇل جاقتان كەتۋ كەرەكپىز. ءبىز سولتۇستىك-باتىستا كۇزەتتە تۇرعانمەن باتىس تۇستا ۇلكەن سوعىس بولۋدا. ول سوعىس توقتاسا، مۇمكىن، بۇرىن ۇمىتقانىمىز ەسكە ءتۇسىپ، جاقىندارىمىزدى تابارمىز. ءبىز مىنا ءدال جانىمىزدا تۇرعان پورتالدان وتسەك، بەيبىت ادامداردى كورەمىز. توپىراقتى، جەردى، دالانى كورەمىز. ول مۇنداي سۇر ەمەس. ول جاقتا وتە جارقىن.

- ال ءبىز قۇجات تاپسىرىپ، كەتسەك شە؟!

- ەسىڭ دۇرىس پا؟! ولار ءبىزدى ەسىمىزدەن ايىرىپ، تۇك بىلمەيتىن ناقۇرىسقا اينالدىرادى.  D-18 كەتپەك بولعاندا، ونىڭ ەسىن سۋىرىپ الدى. ال قازىر قارا، ول تۇك ويلاماس قاتىگەزگە اينالدى. بىزگە سوعىستىڭ ءبىتۋىن كۇتۋ كەرەك. نەمەسە قاشۋ كەرەك!

- سەن مىنا بوتتاردى الداي الامىن دەپ ويلايسىڭ با؟ بوس قيالداما. مەن سوعىس بوپ جاتىرعانىنا سەنبەيمىن. ءبىز تەك مەملەكەتكە قىزمەت جاساپ ءجۇرمىز.

- ۋاقىت وتە تۇسىنەسىڭ. بۇنىڭ ءبارىن كەلگەنىڭە 2 جىل بولا تۇسىنە قويماسسىڭ.  ۋاقىت وتە ەسىڭە بۇرىنعى ەستەلىكتەرىڭ كەلگەندە، اناۋ پورتالدان ءوتىپ، قاشقىڭ كەلەر ءالى.

ءيا، ا-79-دىڭ ايتقانى ءدال كەلدى. سوعىس بولىپ جاتىر جانە ءبىز سول سوعىستىڭ سىبايلاستارىمىز. نەتكەن جيىركەنىشتى…

مىنا داپتەردى كۇنى-ءتۇنى باقىلاۋدا مەن قالاي العانىمدى ايتايىن. بىردە ا-79 ماعان كۇندەلىك باستاۋىمدى بۇيىرىپ، وسى داپتەردى اكەلىپ بەردى. داپتەردى پورتالدان ءوتىپ جاتىرعان بىرەۋدىڭ سومكەسىنەن الىپ كەتىپتى. ماعان قاشان كەلگەنىمدى، نەشە جىل وسىندا ەكەنىمدى، ءوزى ايتقان دۇنيەلەردى جازىپ ءجۇرۋدى ايتتى. سەبەبى، بۇل بىزگە قاشۋعا كومەكتەسەدى. جانە ەڭ ماڭىزدىسى ءبىز قاشۋ ءۇشىن جوسپار قويۋىمىز كەرەك. مەنىڭشە، وسىندا مەن تۋرالى ماڭىزدى اقپاراتتى بەرگەن تۇستەرىمدى بايانداۋىم دا كەرەك. سەبەبى، مەن ءتۇسىم ارقىلى ءوزىمنىڭ كىم ەكەنىمدى ءبىلدىم. ءسىز دە ءبىلىڭىز…

توپىراقتا سۋرەت سالىپ وتىرعان بالاقايدى كوردىم. جۇمساق توپىراقتىڭ ءيىسى مۇرنىما كەلگەندەي. ونى قولعا الدىم. الاقانىمنان سىرعىپ جاتىر. ال اينالا وتە شەكسىز. تۇرىپ الىپ ايقايلاساڭ دا، شەكسىزدىكتىڭ ىشىندە بىلىنبەي كەتەدى. كوكجيەك دىرىلدەيدى. قاق توبەدە شاقىرايعان كۇن. شىنىمدى ايتسام، مەن بۇل نارسەلەردى بىلەمىن. 20 جاسىما دەيىن كۇندە كورگەن دۇنيەلەرىم سياقتى تىم تانىس. ال قازىر وتە قاتتى ساعىنعانمىن. وسى شەكسىزدىكتە، مىنا وتىرعان بالاقايمەن بىرگە ميىمنىڭ ىشىندە، وسى تۇستە قالعىم كەلەدى. دالامەن تامسانىپ، ءسۇيىمىمىز جالعاسىپ جاتىرعاندا ايەل ادامنىڭ بۇرىننان تانىس، بىراق انىق ەمەس ايقايى تاعى ەستىلدى.

- ءادىل! مۇندا كەل! جۇگىر، تەز!

ءادىل؟! ول ءادىل دەدى. بالاقاي وعان بىردەن قارادى. ءادىل ونىڭ ەسىمى… جانە مەنىڭ. ول بالاقاي – مەن. مەنىڭ ەسىمە وتە كوپ اقپارات لەزدە كىرگەندەي بولدى. بۇل ايەل مەنىڭ انام با؟ ول وتە از سوزدەردى اۋزىنان شىعارسا دا، ماعان ءبارىن ۇقتىرعانداي. بالا اسپانعا قارادى دا، سۇرىنە جۇگىردى. ول قاراعان كوككە مەن دە قارادىم. كوك سۇرلانا باستادى. شاقىرايعان كۇندى ءتۇتىن باسىپ، كوكتە زىمىراندار اعىلدى. اناما انىق قارادىم. ءوزى وتە سۇلۋ. قاراپايىم اق كويلەك اجارىن اشىپ تۇر. شاشى وتە ۇزىن. ساماي شاشى اعارىپ تا باستاپتى. بىراق ءوزى وتە جاس. كويلەگىن جەل وتە قاتتى سوعۋدا. انامنىڭ ارتىندا مەن بۇرىن بايقاماعان قيراعان ءۇي. ءۇي دەۋگە دە كەلمەس. بىراق انام جۇگىرە كەلگەن مەنى قۇشاقتاي الىپ كىرگىزدى. زىمىراندار قۇلاقتى جارىپ تاستارداي بوپ وتە شىقتى. مەن ۇستاعان توپىراق جوعالىپ كەتتى. مەنىڭ ءۇستىم توپىراق ەمەس، قارا تاس جەردە وتىرمىن. كىشكەنتاي ءادىل سالىپ كەتكەن قۇم سۋرەت عيمارات سىرتىنداعى ۇلكەن قاعازعا اينالدى. سۋرەتتە روبوت ەمەس، وتە اشۋلى ادام بەينەسى. استىندا «بىزگە كەرەگى تەك – سوعىس!!! بەيبىتشىلىك جوق!!!» دەپ جازىلعان. اينالاعا قاراعاندا ۇزىنابويى كوشە ەكەن. قيراعان عيماراتتار وتە كوپ. دالادا تەك قارا كيىنگەن ءتۇسى سۋىق ادامدار توپتاسىپ جان-جاققا جۇگىرىپ بارادى. كيىمدەرى ءدال مەندەي. تەك بۇلاردىڭ قورعانىسى مىقتى. مەن كىرگەن لاشىققا مەن دە كىردىم. انام ءادىلدى شەشىندىرىپ ۇستىنە ءتۇرلى-ءتۇستى كويلەكتى كيگىزدى. بەتىن ۋقالاپ، قىزارتىپ قويدى. وتە كىشكەنتاي شاشتارىن ءبىر نۇكتەگە جينادى دا، ءوز شاشىنداعى رەزەڭكەسىن بايلاي قويدى.

- ەسىمىڭدى سۇراسا، ءاديا دەپ جاۋاپ بەر. ولار كەلگەندە ۇل ەكەنىڭدى بىلدىرمەۋگە تىرىس، بالام. اناۋ جەرگە بارىپ وتىر. قوزعالما.

كەيىن ەسىكتەن شەكاراشىلارشا كيىنگەن قارا كيىمدى ادامدار كىرىپ كەلدى. ءبىر قادام الدا ورتاداعىسى ماعان قارادى. كىشكەنتاي ادىلگە ەمەس، ماعان. كەيىن بوتتارشا سويلەي باستادى.

- مۇمكىن، ونى قوقىسقا جىبەرەرمىز؟!

ءدال سول ساتتە ويانىپ كەتتىم. كاپسۋلام اشىق، ماعان ەكى بوت تەسىلە قاراۋدا. ولار ادەتتە ويانباعان شەكاراشىلاردى ولتىرە، قوقىسقا تاستايدى. ادام دەگەن قۇنىڭ بولمايدى. مەنىڭ ويانعانىمدى كورىپ ەكەۋى كەرى اينالدى. ءتۇسىم جايلى ا-79-عا ايتۋعا اسىقتىم. ادەپكى بويىنشا قويماعا باراتىن ۇزىلىستە ءدال سول جەردە بولدىم. ول دا ەنتىگە تەز كەلىپ، ەسىكتى كىلتتەي باستادى. مەن وعان ءتۇسىمدى ايتىپ بەرۋگە تىرىستىم. بىراق ول كەيىنگە قالدىرىپ، ءوزىنىڭ شارۋاسىن ايتۋعا كوشتى.

- قىسقاسى، سەن مەنى ءبىرىنشى تىڭدا. بىزگە قۇتىلۋعا 1 كۇن عانا قالدى. «قورعانىس» قىزمەتىنە وسى سوعىستى جاساپ وتىرعان قارىش دەگەن وڭباعان كەلەدى. ەگەر ءبىز ونى ولتىرسەك، سوعىس توقتايدى.

- ءولتىرۋ؟ ەسىڭ دۇرىس پا؟ ءبىز ادام ولتىرسەك، بوتتاردان نە ايىرمامىز بار؟!

- وتە ۇلكەن ايىرما بار. ولار جاماندىق ءۇشىن ولتىرەدى. ال ءبىز بەيبىتشىلىك ءۇشىن وسى نارسەگە بارامىز. ەندى وعان دۇرىس جوسپار كەرەك. سەنىڭ نە ويىڭ بار؟!

- ول پورتالدان كىرە مە؟

- جوق،  زىمىرانمەن ۇشىپ، مىنا تاس قامالدىڭ جوعارىسىنا قونادى. تومەنگە جەدەلساتىدان ءتۇسىپ، مىنا دالىزبەن پورتالعا قاراي كەلەدى. ءبارىن كورگەن سوڭ باتىس جاقتاعى سوعىس الاڭدى باقىلاۋعا بارادى. سولاي قايتادان كەتەدى. تۋرا 7 جىل بۇرىن كەلگەندە ءدال وسىنداي بولعان. ول ۋاقىتتا D-18 ەكەۋمىز وسىنى ىستەگىمىز كەلگەن. بىراق ول ۇستالىپ قالىپ، ەسى سۋىرىلىپ قالدى. ەندى تىڭدا. بىزدەگى ۇلكەن مۇمكىندىك - ءدالىز بەن پورتالدان وتەتىن تۇستا. ونىڭ قورعاۋشىلارى كوپ. ەش قاتەلىك جىبەرمەستەن ءولتىرۋ كەرەك. ول ولسە، ونى قورعاۋشىلار بىزگە قارسى شىقپايدى.

ءدال سول ۋاقىتتا مەنىڭ ويىما تۇك كەلمەدى. بويىمدا تەك قورقىنىش پەن ۇرەي بولدى. ونى ولتىرە الماساق، ارمانمەن ولەرىمىز انىق. ول وسى ەلدى، اسكەردى باسقارىپ وتىر. ونى كۇزەتۋشىلەرى تىم كوپ، قورعانىسى مىقتى. ءتىپتى ءبىزدىڭ قارۋ-جاراعىمىز دا قولدا بولمايدى، پورتال جابىلادى. قارۋ تەك سول تيراننىڭ وزىندە بولادى. بۇل وتە قيىن نارسە. بەس كۇننىڭ ىشىندە بىزدە قۇتىلۋعا ۇلكەن مۇمكىندىك بار. جانە 30 جىلعا سوزىلعان سوعىستى دا جويۋعا ۇلكەن مۇمكىندىك. بۇل سوعىس سوڭىنا جەتسە جانە تيراندى ولتىرسەك، ونى ىستەگەن قاھارماندار مىنا ءبىز بولامىز. ا-79 جانە ۆ-74. ۇرپاق ءبىزدى ءسوز ەتەدى، بىزگە ۇقساعىسى كەلەدى. ءبىز سەكىلدى بەيبىتشىلىككە ۇمتىلادى. قازىر ءبىزدى باسقارىپ وتىرعان بوتتاردى بولاشاق ۇرپاق وزدەرى باسقارادى. ەح، بىراق تاۋەكەل شىركىن قيىن-اق. ءسال شالىس باسساق، بالكىم، بۇل سوعىس 40 نە 60 جىلدىڭ تۋراسىنا جالعاسار. نەمەسە ماڭگىلىك. قورقىنىشتى. تاۋەكەلشىلدىكتىڭ ارتىندا ءبىزدىڭ ساعىنىشىمىز جاتىر. باتىلدىعىمىزعا ويىمىزدى قوسىپ، ۇلكەن ءارى دۇرىس جوسپار قۇرۋىمىز كەرەك. تەك ۋاقىت از. ەرتەڭ ءبارى شەشىلەدى. ۋاقىت تىعىز…

سول كۇنى تاعى ءبىر ءتۇسىمدى كوردىم. الگى توقتاعان جەردەن قايتادان پايدا بولدىم. كىشكەنتاي ءادىل ءبىر بۇرىشتا وتىر. قيراعان ءۇيدىڭ بۇرىشى ىلعال تارتىپ، جوعارىدان تامشى اعادى. ەسىكتەن كىرگەن اسكەرلەر انامنان سۇراق-جاۋاپ الدى. انام مەنى جاسىرىپ، «ءاديا اتتى قىزىم عانا بار.ال كۇيەۋىم باتىستا سوعىسقا كەتتى» دەگەنىن ەستىدىم.

اسكەريلەر تاعى وسى ىسپەتتەس سۇراقتاردى قويىپ، شىعىپ كەتتى. مەن دە ولاردىڭ ارتىنان شىعىپ، ەرە باستادىم. ولار ءبىر توپ ادامنىڭ جانىنا ساپ تۇزەپ تۇرا قالدى. الدارىندا باسشىلارى تۇرعانداي.

- اسا قۇرمەتتى قارىش مىرزا! ايماقتا ۇل بالالار مەن ەرلەر تولىقتاي سوعىس قاتارىنا الىندى. ونىڭ 65%-ىن شەكارا قىزمەتىنە الىپ وتىرمىز. قارۋ ۇستاپ كورمەگەندەردى 3 اي ىشىندە ۇيرەتىپ شىعامىز.

سۇستى كوزقاراسپەن الگى قارىش جاڭاعى اسكەريگە ءبىر قارادى دا:

- ءۇش اي؟! ءۇش اي تىم كوپ. 2 اپتادا ۇيرەتىڭدەر. ءتىپتى ءبىر اپتادا.

- قۇپ بولادى، اسا قۇرمەتتى قارىش مىرزا! ايتپاقشى، كوشەگە پوستەرلەردى تولىقتاي ءىلىپ بولدىق. بارلىق جەردە ءسىزدىڭ سۋرەتتەرىڭىز. حالىق ءسىزدىڭ ۇرانىڭىزدى جاتقا بىلەدى.

- وتە دۇرىس! مىنا شەكاراداعى قالانى وزىمىزگە قاراتىپ الساق، ءارى قاراي ءبىزدىڭ الەمدى جاۋلايتىن ەسىگىمىز ايقارا اشىلادى. الەمدەگى ادامنىڭ ءبارى مەنىڭ قۇلىم بولادى. مەن ءۇشىن جۇمىس ىستەيتىن بولادى. توقتا… مىناۋ كىم تاعى؟!- دەپ ماعان تىكە قارادى دا، قارۋىن شىعارىپ، اتقىلاي باستادى. سول تۇستا ۇيقىدان ويانىپ كەتتىم. بۇگىن ءبىزدى اۋىر كۇن كۇتۋدە. قارىشتىڭ وزەگىن قالاي دا ءوشىرۋىم كەرەك!

***

كۇندەلىك يەسىنىڭ اڭگىمەسى وسى جەردەن ءۇزىلىپ كەتتى. بۇل تۇسىنەن سوڭ اڭگىمەنى جالعاستىرماعانمەن، جابىق زوناداعى بەينە باقىلاۋ مەن ول تۋرالى مالىمەتتەر ارقىلى وعان نە بولعانىن بىلدىك. تيراندىق بيلىك باسشىسى قارىش كەلەتىن كۇنگە ا-79 جانە ۆ-74 جوسپار قۇرىپ، ودان قۇتىلماق بولعان. بوتتار ولاردى بوگەپ، ۆ-74-ءتىڭ ەسىنەن ايىرماق بولعان. ال دوسى ا-79 ونى قۇتقارامىن دەپ بوتتاردىڭ قولىنان قازا تاپقان. ولاردىڭ شىن ومىردەگى ەسىمدەرىمەن دە تانىستىق. ا-79 بولعان جىگىتتىڭ اتى-ءجونى قايرات تالماسۇلى بوپ شىقتى. شىن ومىردە ارحيتەكتور بولىپتى. ال اۆتور ۆ-74 بولسا، جاس ستۋدەنت ءادىل ەردەمحانۇلى بولىپتى. ونىڭ ارتىندا سوعىستان زارداپ شەككەن مۇگەدەك اكەسى قالدى. 20 جاسىنا دەيىن اناسى ۇلىن تىعىپ ۇستاعانمەن، بالاسى بارىن بىلگەندەر ءادىلدى الىپ، اناسىن قۇپيا جاعدايدا ءولتىرىپتى.

پورتال تۇستاعى بەينەباقىلاۋدان بايقاعانىمىز ءادىل مەن قايرات بوتتارمەن قارسىلاستىعىندا اشىق پورتالعا ەڭبەكتەپ بارا جاتىپ، پورتالدىڭ كوك ساۋلەسىنە قول سوزعان كۇيى قايتىس بولعان. ءادىلدىڭ اڭگىمەسىن وقىپ، ءتىپتى بەينەدەن سونشا قول سوزعانىن كورە وتىرا الگى باستا ايتقانىمدى تاعى ەسكە سالعىم كەلەدى. ول ءوز تۇسىندە تۋعان جەرىن وتە قاتتى ساعىنىشپەن ويلادى. قاراپايىم توپىراقتى سەزىنۋىنىڭ ءوزى قانداي؟! ءوزىمىز شىعارعان ماقۇلىقتىڭ كەسىرىنەن تالاي ادام زارداپ شەكتى، تالاي ءادىل تۋعان توپىراعىن اڭسادى، تالاي قايرات ءۇي-ىشىنە اسىقتى. ەكى قاھارمان بۇرىنعى بيلىك باسشىسى قارىشتى ولتىرگەنى ءۇشىن قىلمىسكەر دەگەن اتقا لايىق دەگەندەر دە بولدى. بىراق قارىشتىڭ جاسىرىن 30 جىل سوعىس جۇرگىزگەنىن بىلگەن دە جوقپىز، سەزبەدىك تە. تەك باتىس اۋماقتاعى ادامدار عانا حاباردار بولعان. ولارعا قالادان شىعۋعا تىيىم سالىنىپ، ءتىپتى بايلانىستى دا وشىرگەن. بۇنىڭ ءبىر دە ءبىرىن بىلمەدىك. ءبىزدى ادام ەمەس، استىرتىن تۇردە تيراندىق بوتتار بيلىگى ۇستاپ تۇرعانىنان ءتىپتى سەكەم المادىق. قارىشتى بوت ەمەس دەپ ەسەپتەسەك تە، ونداي اشكوزدەر ءالى دە بار ەمەس پە؟! ادامزات ەسسىزدىككە سالىنىپ، ادامگەرشىلىك پەن سەزىمدى ىسىرىپ قويۋى، الداعى ۋاقىتتا ءالى تالاي جاندى جارقىن ومىرىنەن ايىرارى ءسوزسىز. جارقىن ومىرىنەن جانە تۋعان جەرىنەن ەرىكسىز ايىرادى. وقىرمان، سەنەن سۇرارىم بۇل «توپىراق» وقيعاسىنان سوڭ سەن ءۇشىن «تۋعان جەر» ءسوزى ءالى دە ستاندارتتى ما؟!

پىكىرلەر