اۋىلىمنىڭ التىن تاڭى

162

“تۋعان جەر” شىعارماشىلىق بايقاۋىنا قاتىسۋشىلاردىڭ تۋىندىلارىن پاراقشامىزعا جاريالاۋدى باستادىق. كەلەسى كەلىپ تۇسكەن تۋىندى «ۇزدىك ماقالا» اتالىمى بويىنشا كالماگانبەتوۆا گۋلدانا ماراتوۆنا.

بايلانىس تەلەفونى: 8-777-112-96-46

         بالا كەزىمىزدە بالالىق شاقتىڭ بۋىمەن اق پەن قارانى، جاقسى مەن جاماندى، ساعىنىش پەن ماحابباتتى سەزىنە المايتىنبىز. بالالىق شاقتاعى سەزىم، ويلاۋ، سانا دەگەندەردىڭ بارلىعى ءبىر الەم. دەگەنمەن، ءومىر ءسۇرىپ ءتاتتى بالمۇزداق پەن ءتاتتى كامپيتتى جەگەنىمىزگە ءمازبىز. ال تۋىپ-وسكەن اۋىلىڭدى ساعىنۋ دەگەن بالا كەزىمىزدە تىپتەن ءمۇرنىمىزدىڭ يىسىنە دە بارمادى، اۋىلىمىزدان كانيكۋل كەزىندە قالاعا قىدىرىپ كەتسەك، ساعىناتىنبىز، تەك انامىز بەن اكەمىزدى، ال اۋىلدى ساعىنۋ دەگەن ءتىپتى دە بولماپتى. مىنەكەي، جىلدار وتە كەلە ءومىر بارلىعىنا، بويىمىزدان بارلىق سەزىمىمىزدى وتكىزىپ، ءومىردىڭ اششى دا، ءتاتتى كەزەڭدەرىنەن ءوتىپ كەلەمىز. ال تۋعان جەرگە دەگەن ساعىنىش سوزبەن جەتكىزە المايتىن ءبىر بولەك الەمگە اينالدى. بوي جەتىپ سانا مەن اقىلدىڭ وسۋىنە بايلانىستى اينالاڭا، تابيعاتقا، قورشاعان ورتاعا، قاسىڭداعى جولداستارىڭا قاراپ ءتۇرلى ويعا باتاسىڭ. العا قويعان ماقسات قانداي؟ وعان جەتۋدىڭ جولىندا قانداي كەدەرگىلەر بار؟ ودان قالاي وتەسىڭ؟ تاعى سونداي ساۋالدار... بۇل سۇراقتىڭ جاۋابىن بىلەتىن ادام – ول سەن. تەك قانا سەن. سەننەن باسقا ادامعا بۇل قاجەت تە ەمەس. وسىنداي سۇراقتارعا جاۋاپ الۋ ءۇشىن، ەڭ الدىمەن تابيعاتپەن تىلدەسەتىن ەدىم. ءيا، بۇل ءبىر قيالي ادامنىڭ ءسوزى شىعار، دەگەنمەن جانىڭا شۋاق، جىلۋلىقتى سىيلايتىن، بۇل تابيعات پەن مۋزىكا الەمى. تۋعان جەرىمنىڭ تابيعاتىنىڭ كەرەمەتتىلىگىن ەندى عانا باستان كەشىرىپ جاتىرمىن. تۋعان جەرىمنىڭ ءاربىر تاسى، اۋاسى، ءشوبى بارلىعى، بارلىعى ادامعا كۇش-قۋات بەرەدى...

اۋىلىمنىڭ  شەتىندە ۇلكەن تاۋعا ۇقساس دوڭەس بولاتىن. ونى ءوزىمىز تاۋعا اينالدىرىپ العانبىز. ولاي دەيتىنىمىز ءبىزدىڭ مەكەندە تاۋ ورنالاسپاعان. سودان كەيىن بولار، ۇلكەن دوڭەسكە ۇقساستاردىڭ ءبارىن تاۋعا اينالدىرىپ الاتىنبىز. جانە وعان «الاتاۋ»، «قاراتاۋ» دەپ وزىمىزشە ەسىم دە بەرەتىنبىز. سول «تاۋدىڭ» باسىنا شىعىپ، اۋىلىمىزدىڭ توبەسىنەن قاراعانداي كۇي كەشىپ، اۋىلىمىزدى ءار نارسەگە تەڭەيتىنبىز. كۇز ايى بولسا، اۋىلىمىز بەينە ءبىر التىنعا كومكەرىلگەن، ادامدارىنىڭ بارلىعى كۇندەي جارقىراپ جايناپ ءجۇر، پىسەتىن جەمىس-جيدەكتەردىڭ بارلىعى ءار ءۇيدىڭ داستارحانىندا جايناپ تۇر. ءيا، وسىلاي ەلەستەتكەندەي، شىنىمەندە بارلىعى وسىلاي ەدى. استىقتى جيناۋ ۋاقىتى، اعالارىمىز بەن اكەلەرىمىزدىڭ بارلىعى ەگىس القابىندا ەڭبەك ەتىپ جاتىر، اۋىلدىڭ ءىشى ايقاي –شۋ، مالداردىڭ شۋى، يتتەردىڭ، قۇستاردىڭ داۋىسى، اۋىلىمىز كوك شاڭنىڭ ورتاسىندا قالىپ، بەينە ءبىر اداسىپ كەتەتىندەي كۇن كەشەتىنبىز. بۇل كۇز ايىنىڭ ءسانى ەدى. كۇز ايى مەن جاز ايىنداعى جاقسى كورەتىن تىلسىم تابيعاتتىڭ كۇشى بۇل-تاڭنىڭ اتۋى ەدى. بۇل قۇبىلىستى ءبىز «التىن تاڭ» دەپ اتاپ كەتتىك. التىن تاڭىمىزدى كورۋ ءۇشىن تۇنىمەن ۇيىقتاماي، اتا-انالارىمىزدان تىعىلىپ، تاڭ اتار ۋاقىتتا ۇيدەن قاشىپ، سول باياعى «قاراتاۋىمىزعا» بارىپ، سۋرەتشى بالالار اق قاعازى مەن قالامىن دايىنداسا، جىر جازاتىن، ەرتەگى قۇراستىراتىندار ويلارىن دايىنداپ باراتىنبىز. تاڭ اتقان كەز تۋعانداعى كوڭىل-كۇي، عاجايىپ سەزىمدى سوزبەن جەتكىزە الماسسىڭ. سۋرەت سالاتىن بالالار سول كەزدە: «تابيعات انا ءوز سۋرەتىن سالىپ جاتىر، بىزگە ەشتەڭە قالمادى عوي» -دەپ جىميىپ ازىلدەپ ايتاتىن. تاڭ اتقان قۇبىلىستان بارلىعىن كورۋگە بولادى: جاڭا كۇننەن ءۇمىت، بولاشاقتاعى  ارمان-ماقساتتاردىڭ ورىندالۋى، ماحاببات، ساعىنىش، وكىنىش، مەيىرىمدىلىك پەن قامقورلىق، وسىنىڭ بارلىعىن سەزىنەسىڭ، ارماندايسىڭ، قاعاز بەتىنە تۇسىرەسىڭ... سول تاڭداعى ادەمى بەينەنى، تۇسىنىكتى قىلىپ جەتكىزە المايتىن قۇبىلىستى كورىپ، جاڭا كۇنگە دەگەن باسقاشا سەزىممەن وقۋىڭدى، جۇمىسىڭدى باستايسىڭ. بۇل سەزىمدى ەش جەردەن ساتىپ الا المايسىڭ.

ارينە، ومىردە بارلىعى قاتار جۇرەدى، ءبىر كۇن قۋانساڭ، ەكىنشى كۇن رەنجيسىڭ، ءۇشىنشى كۇن جىلايسىڭ...تاعى سول سياقتى بارلىعى قايتالانا بەرەدى. تابيعات تا ءدال سولاي، ءبىر كۇن شۋاعىن توگىپ، الەمدى جىلىتسا، ءبىر كۇن اسپانعا قارا بۇلت  ءۇيىپ، داۋىل جەل سوقتىرىپ سەنى توڭدىرادى، جاڭبىر جاۋىپ، سوڭىنان كەمپىرقوساق شىعارىپ، الەمنىڭ اسپانىنا سۋرەت سالىپ، سامال ءيىسىن شاشادى.

اۋىلىمنىڭ تابيعاتىن، اسەمدىگىن ايتا بەرۋدەن ەش جالىقپايمىن. سەبەبى، تۋعان جەرىڭ اناڭ سەكىلدى. شالعايعا كەتسەڭ سەنى دە ىزدەپ، سەنى قول بۇلعاپ شاقىراتىنداي كۇي كەشەسىڭ. اۋىلىمنىڭ ءار جەتىستىگىنە ءوزىمنىڭ جەتىستىگىمدەي بالاشا قۋانامىن.

اۋىلىمنىڭ «التىن تاڭىمەن» قاتار، تاعى ءبىر كورىنىستى اسىعا كۇتەتىنمىن. ول كوكتەم كەزى ەدى. قىس قاھارىن شاشىپ، ايازىمەن شىمشىپ بولعاننان كەيىن، جايدارلى كۇز دە اۋىلىمىزعا ەنەدى. ونى مەن، قالادان كەلە جاتقان اناسىن كۇتىپ تۇرعان بالاداي، قارسى الاتىنمىن. جايدارلى كوكتەم كەلگەن كەزدە، مىندەتتى تۇردە ءوزىمنىڭ اتاۋ قويىپ، ۇلكەن تاۋعا اينالدىرىپ العان «قاراتاۋىما» بارىپ، سول جەردەن اۋىلىمدى قارايتىنمىن. قازىرگى كەزدە الماتىنىڭ «كوكتەبەسىندەي» عوي. سول تاۋىما بارىپ، اۋىلىما كوز سالامىن، قانداي كەرەمەت كورىنىس، اۋىلىم بەينە ءبىر سۋدىڭ ورتاسىندا قالعانداي، ءيا قورقىنىشتى ەستىلەتىنى ءسوزسىز. بۇل ءسوزدى تۋرا ماعىنادا قاراماۋىڭىزدى سۇرايمىن (ارينە ءوز ەركىڭىزدە) بۇل تەڭەۋدى قولدانۋىمنىڭ سەبەبى، ەگەر ءوزىڭىز دە قاراپ كورسەڭىز...اۋىلىم سۋدىڭ ورتاسىندا ورنالاسقانداي بەينە قالىپتاسادى. سۋدىڭ ورتاسىندا تۇرعان اۋىلىم سۋعا كەتپەي تۇر. بەينە ءبىر ۇلكەن كەمە دەرسىڭ. ال مەن سونىڭ كاپيتانىمىن دەپ قيالدايتىنمىن. (ارينە بۇنىڭ بارلىعى بالا قيال) اۋىلىمنىڭ وسى ءبىر ەكى كورىنىسىن ەشقانداي التىنعا، اقشاعا ايىرباستاي المايمىن. بۇل ەكى كورىنىس تەك قانا مەنىكى دەپ تالاساتىنبىز. كەيبىر ادامدارمەن سويلەسىپ تىلدەسكەندە وسى اڭگىمەلەردى ايتىپ بەرسەڭ، تۇسىنبەي مە، الدە ادەيى سولاي جاساي ما ەكەن ونى قايدام، ايتەۋىر، سەن ءبىر جۇرگەن قيالي ادامسىڭ دەپ كۇلەتىن. سول كورىنىستى سەن دە بارىپ كور دەپ تالاي دا اپارىپ كورگەنمىن، دەگەنمەن مەن باستان كەشكەن سەزىمدى ول سەزىنە المادى. سودان كەيىن سونداي تابيعات سالىپ بەرگەن ادەمىلىكتى دا كورەتىن ادام بولادى ما ەكەن دەگەن وي دا كەلەدى. ادەمىلىكتى كورۋ ءۇشىن دە جاقسى كوز كەرەك ەكەن. اۋىلىمنىڭ التىن تاڭى مەن سۋ ۇستىندە ورنالاسقان اۋىل بەينەسىن  مۇمكىن مەننەن باسقا جان كورە الماعان دا شىعار، دەگەنمەن مەنىڭ شابىتىما شابىت قوسىپ، قينالعان كەزدە دەمەۋ بولعان وسى ءبىر تىلسىم تابيعاتتىڭ تاماشا سىيىن مەن بار جۇرەگىممەن قابىل الدىم. ءالى كۇنگە دەيىن مەن سول تاماشا ، كەرەمەت، عاجايىپ سۋرەتتى كورگىم كەلەدى. جانە كورەمىن دەگەن ۇمىتتەمىن. جىل سايىن ەڭبەك دەمالىسىمدى مەن مىندەتتى تۇردە اۋىلىما بارىپ، التىن تاڭىمدى قۇشاق جايا قارسى الامىن. التىڭ تاڭىمنىڭ ارقاسىندا كەلەسى جىلعا، بولاشاققا ماقساتتارىمدى ايقىنداپ، بەلگىلى ءبىر جەتىستىككە قول جەتكىزۋ ءۇشىن جوسپارلار قۇرامىن. «اۋىلدان ادام كوشكەنمەن، ادامنان اۋىل كوشپەيدى» دەمەكشى، اۋىلىمنىڭ التىن تاڭى مەنى ارقاشان كۇتەتىنە سەنىمدىمىن. جانە مەن دە سول تاڭىمدى قارسى الۋ ءۇشىن ۇنەمى ساعىنىش ماحابباتىممەن بارامىن. «التىن تاڭىما» بارعان كەزدە ۇنەمى ول ماعان: «مەن سەنىمەن كەزدەسۋگە قاشان دا دايىنمىن، مەن ۇنەمى سەنى قارسى الا الامىن، تەك سەنىڭ كەلمەي قالاتىن كۇنىڭ بولۋ مۇمكىن» دەپ ءتىل قاتاتىنداي....التىن تاڭىمىز ارايلى، باتار كۇنىمىز شىرايلى بولسىن.

 

 

 

 

 

 

 

 

 

 

 

 

 

 

 

 

پىكىرلەر