جامبىل وبلىسى جاسىل ەنەرگيا بويىنشا كوش باستاپ تۇر

1611

ەلىمىز جاڭارتىلاتىن ەنەرگەتيكا ۇلەسىن 2020 جىلعا قاراي 3, 2025, ال 2030 جىلعا قاراي 10 پايىزعا دەيىن جەتكىزۋ ماقسات ەتىپ وتىر. سونداي-اق، 2050 جىلعا قاراي جالپى ەنەرگيا تۇتىنۋدىڭ كەم دەگەندە جارتىسى جاڭارتىلاتىن جانە بالامالى ەنەرگيا كوزدەرىنىڭ ۇلەسىندە بولۋى ءتيىس

وسى ماقساتقا جەتۋ جولىندا جامبىل وبلىسىنىڭ شۋ اۋدانىندا يننوۆاتسيالىق جوبا قۋاتى – 100 مەگاۆاتت. بولاتىن كۇن ەلەكتر ستانتسياسى سالىنىپ جاتىر. ينۆەستورلاردىڭ كومەگىمەن ىسكە اسىپ جاتقان اتالعان جوبا ەلىمىزدىڭ وڭتۇستىك وڭىرلەرىندەگى ەلەكتر ەنەرگيا تاپشىلىعىن جويۋعا مۇمكىندىك بەرەدى. قازىرگى تاڭدا قۇرىلىس جۇمىستارىنىڭ 70 پايىزى اياقتالىپ، شامالى جۇمىستارى قالدى.

جوبا جەتەكشىسى دجوردج ديابتىڭ ايتۋىنشا، كۇن ەلەكتر ستانتسياسىنىڭ جالپى قۇنى 61 ميلليارد تەڭگەنى قۇرايدى. سونداي-اق ول قۇرىلىستا 60 جەرگىلىكتى تۇرعىن جۇمىس ىستەپ جاتقانى، ال ىسكە قوسىلعاندا تاعى 20 ادام جۇمىسقا تارتىلاتىنىن ايتتى.

«قۇرىلىس جۇمىستارى العا اۋىلدىق وكرۋگىنىڭ ىرگەسىندەگى 500 گەكتار جەردە جۇرگىزىلىپ جاتىر. ستانتسيا كولەمى شۋ سەكىلدى 4 اۋداندى ەلەكتر ەنەرگياسىمەن تۇراقتى قامتاماسىز ەتۋگە قاۋقارلى. ءبىر سوزبەن ايتقاندا جوبانىڭ ونىمدىلىگى جوعارى ستانتسيا تولىقتاي اۆتوماتتاندىرىلعان جۇيەدە جۇمىس ىستەيدى. جەل، قار سياقتى تابيعي قۇبىلىستاردان ءوزىن قورعاي الادى. قازىر ەڭ كۇردەلى جۇمىستار اياقتالدى. تەك مودۋلدەردى ورناتۋ عانا قالىپ وتىر. بارلىق جەلى جەر استىمەن جۇرگىزىلگەن. 25 جىلعا دەيىن ۇزدىكسىز قىزمەت ەتەدى. جىل سوڭىنا دەيىن ىسكە قوسامىز. سوڭعى ۇلگىدەگى قوندىرعىلار ەۋروپا، اقش جانە قىتايدان اكەلىنگەن. قازىر ولاردى ورناتۋ جۇمىستارى قارقىندى ءجۇرىپ جاتىر. وعان 250 ادام تارتىلعان. جوبانىڭ ەرەكشەلىگى ارنايى تاقتايشالار تاڭ اتقاننان باستاپ كۇن باتقانعا دەيىن كۇنمەن بىرگە اينالىپ تۇرادى. بۇل ونىمدىلىكتى بىرنەشە ەسە ارتتىرۋعا مۇمكىندىك بەرەدى. مۇندا 350 مىڭنان استام كۇننەن قۋات وندىرەتىن مودۋلدەر ورناتىلادى»، – دەيدى دجوردج دياب.

شىنى كەرەك، وزگە وڭىرلەرمەن سالىستىرعاندا جامبىل وبلىسى بالامالى – ەنەرگيا كوزدەرىن پايدالانۋ جاعىنان كوش باستاپ تۇر. ەلىمىزدە جاڭارتىلعان ەنەرگيا كوزدەرىنەن قۋات وندىرەتىن 59 نىسان بولسا، ونىڭ 43 پايىزى اۋليەاتا وڭىرىندە ىسكە اسىرىلىپ جاتىر. قازىر ايماقتا كۇننەن، سۋدان، جەلدەن قۋات وندىرەتىن 10 ستانتسيا تۇراقتى جۇمىس ىستەيدى. بۇل نىسانداردا وندىرىلگەن قۋات وبلىس تۇتىنىپ وتىرعان ەنەرگيانىڭ 36 پايىزىن قامتۋعا جەتكىلىكتى. ال، 2023 جىلعا دەيىن تاعى 25 جوبانى ىسكە اسىرۋ كوزدەلىپ وتىر.

  «ادىرنا»

 ۇلتتىق پورتالى

پىكىرلەر
رەداكتسيا تاڭداۋى