بيلىك قازاق ازاماتتارىنىڭ باعىن بايلادى

403

ەل تانيتىن ءبىر اعامىزدىڭ ۇيىنە بارىپ، ۇنەمى اڭگىمە قىلىپ وتىرامىن. جانى تازا، ادام بالاسىنا تەك دوستىق پەيىلمەن قارايتىن اعام:
-ءبىزدىڭ ءومىر تەككە ءوتىپ كەتتى عوي،-دەدى.
-نەگە؟-دەدىم.
-ءبىز وتىز جىل بويى وسى قارىسىپ، قاتقان، ءىرىپ شىرىگەن جۇيەنىڭ جۇمىسى توقتايدى، نازارباەۆ كەتەتىن شىعار دەپ كۇتتىك،-دەدى.
مەن اعاما:
-نازارباەۆ سىزدەر تۇگىلى جاپ جاس بىزدەردى دە قارتايتىپ جىبەرەتىن ءتۇرى بار،-دەدىم.
-ءبىزدىڭ و باستا ەلگە ادال قىزمەت ەتەتىن نيەتىمىز بولعان، ءبىز بۇلارمەن الىستىق، تارتىستىق، جارماستىق، قاعىستىق، بىراق ءبىز اقىر سوڭىندا ەشقانداي دا جەرگە قىزمەتكە تۇرا الماي، ەلگە قىزمەت ەتە الماي، بويىمىزداعى بار پوتەنتسيالىمىزدى جوعالتتىق. ءبىز نە ۇتتىق؟ ءبىز ۇتىلعان بۋىنبىز،-دەپ، اعامىز مۇڭىن ايتىپ، ءۇنسىز وتىرىپ قالدى.

وسىندا ەلگە بەلگىلى ءبىر ازامات ماعان:
"سەن باس كوتەرىپ، ۇيىمداستىرىپ شىعاسىڭ. بارلىق تاكتيكالىق قادامدارىڭدى جاسايسىڭ. ەلدىك مۇددەنى كوتەرەسىڭ، ءتىلدىڭ، جەردىڭ ماسەلەسىن، الەۋمەتتىڭ ماسەلەسىن كوتەرەسىڭ. اقىرى سوڭىندا سەن قامالاسىڭ. سوندا سەنى بارىپ، تۇرمەدەن تارتىپ الاتىن ادامدار ارتىڭدا تۇر ما؟ سەن سونى ويلادىڭ با؟ قامالىپ كەتىپ جاتىر عوي اناۋ جىگىتتەر. ال، سەن ارتىڭدا وسى ازامات بار ەكەن دەپ تارتىپ الىپ شىعارىپ الاتىن قوعامىڭ بولماسا، كىم ءۇشىن تۇرمەگە قامالىپ كەتتىڭ"-دەدى.

مىناۋ جۇيە مەن نازارباەۆ بيلىگى قازاقتىڭ ناعىز جۇرەكتى ازاماتتارى مەن ادال ۇلدارىنىڭ باعىن بايلاپ، يتجەككەنگە ايداپ تاستادى. قازاقتىڭ ۇلتىنا ادال ازاماتتارىنىڭ تاۋەلسىزدىكتىڭ اشىق تاڭىندا باعى بايلانىپ، ايدالىپ، تۇرمەلەردە وتىر. جۇيەنىڭ ەڭ سوڭعى ەتاپتاردا جۇمىسى ءجۇرىپ جاتسا دا، باس كوتەرەر اردا ازاماتتارعا اياۋشىلىق تانىتاتىن ءتۇرى جوق. سونىڭ ءبىرى جاكىشەۆ. ول سياقتى عىلىم مەن تەحنولوگيانىڭ، ۇيىمداستىرۋشى ءارى تەحنوكرات ازامات بىزدە ءدال قازىر ساۋساقپەن عانا سانارلىق. وركەنيەتتى ەلدەر جاكىشەۆ سياقتى ۇلىن اسپانعا كوتەرەدى. ءبىز سياقتى ەلدەر ونداي ازاماتتى "جەمقورلىعى ءۇشىن تۇرمەدە وتىرعان شىعار. قازىر كىم جەمەيدى؟ جەمەيتىن ادام تەك جەر استىندا عوي" دەپ جۇرە بەرەدى. سەبەبى، ءبىزدىڭ قوعام سونداي تەحنوكرات ازاماتتاردى ەمەس، انشىلەر مەن سايقىمازاقتاردى، سايقالداردى، ارسىزداردى عانا جاقسى تانيدى. ءبىز مويىنداماعان اقيقات بىرەۋ عانا. ول - ءبىز ءوزىمىزدى باسقاراتىن ادامدارعا سايمىز، ولار ءبىزدى باسقارۋعا ساي. ءبىر بىرىنە تۋرا پروپورتسيونال. بىزگە ءالى ۇزاق ۋاقىت كەرەك ەكەن. سونى پايدالانعان بۇلار كەشەگىدەي ءبىرتۇرلى ويىنداردى ۇيىمداستىرىپ جاتىر. ولار ءبىزدىڭ بىرىگە المايتىنىمىزدى بىزدەن دە جاقسى بىلەدى. قاتتى ايتسام كەشىرەرسىزدەر.

نازارباەۆ اۋلەتى تولىعىمەن بيلىكتەن كەتپەي، قازاق ەلىندە عىلىم دا، ءبىلىم دە، وركەنيەت تە جوق.

 

بەكبولات قارجان

"ادىرنا" ۇلتتىق پورتالى

پىكىرلەر